EZRA 7:6 - Alkitab Singog In Mongondow Masa In Tanaa

^6-7 Ki Ezra in intau tobatú inta nosikoḷa bo nobayong in kinotaauannea in soaḷ Hukum inta inogoi i Tuhan, Allah in Israel kon i Musa. Popisí in ki Ezra binarakatan i Tuhan Allahnea, dá ki datu in nobogoi kon inia in bayongan inta pinoigumnea. Kon taong impitunea kon pinomarentaan i Datu Artahsasta, nobuatdon in ki Ezra nongkon Babel bo minayá in Yerusalem noyotakin in topaanan in intau Israel inta imang mita, intau in Lewi, mododondong bo moḷoḷukad kon ngara kon Baḷoi Tuhan, bo mogogaid mita.

EZRA 7:6 Referans Kwoze

EZRA 8:22

Akuoi in mobangkaḷ moigum kon i datu in tontara tumotakoi kon kabaḷo sin moḷukad kon inami nongkon musung kon binayáan. Sin akuoi in nogumandon kon inia, kon ki Allah nami in momarakat kon bayongan in intau inta mogundoi kon i-Nia bo mondoí poḷat mohukum kon intau inta diá mosatia kon i-Nia.

EZRA 7:28

Pinodoyon kon totuḷung i Allah akuoi in kinosanang i datu, in monononggina bo pojabatnea mita inta nongawasa tatua; ki Tuhan Allahku ain nobogoi in ibog moḷoben kon inakó dá akuoi in nokotongganutdon kon nobayong totok in tongguḷu in inanakan Israel sin mobui kon Yerusalem.”

EZRA 8:31

Kon singgai impuḷú bo doyowánea buḷan imitánea, kami in nonaḷámai kon Ongkag in Ahawa bo minayá in Yerusalem. Kon binayáan tatua kami in iḷukadan i Allah nami nongkon musung mita inta monubu bo moḷamboi.

MATIUS 28:20

Bo tundú in mosia mogaid kon onu inta aindon pinoguman-Ku kon i monimu. Bo bá kotaauan monimu, kon Akuoi in umuranbí kotaki-takin monimu modapot in singgai pangabisan.”

NEHEMIA 2:18

Bo inoumanku kon i monia naonda in ki Allah notuḷung kon inakó bo onu inta pinoguman i datu kon inakó. Mosia in notubag, “Koḻigai momangkoidon in kita moposindog!” Bo nosadiadon in mosia momangkoi mogaid.

NEHEMIA 2:8

Koḻikud intua, noigum doman in akuoi kon surat ogoi kon i Asap, intau inta moḷoḷukad kon kayuon in dodatuan, sinbá sadiaannea in kayu inta pakéon pogaid kon ḷoḻingkop in bonawang dinding kon diug in Baḷoi Tuhan, bo pakéon kon dinding in kotá bo baḷoi inta pogutunanku. Onu in pinoigumku nodait dinuduian i datu, sin ki Allah in notuḷung kon inakó.

EZRA 8:18

Popisí in kopopia in gina i Allah, mosia in nopotabá mangoi kon inami in ki Serebya, intau in Lewi tobatú inta mopandoi nongkon inanakan i Mahli. Noyotakinnea in ki adí mita doman i utatnea mita, kobayongnea in 18 intau.

EZRA 7:21

Kon i monia inta nokadai kon kas in dodatuan kon propinsi Eprat Toyopan akuoi in momarenta sinbá onu kabí in igumon i Imang Ezra, intau inta nonotaau totok in Hukum i Allah inta nongawasa kon soroga, yo ḷagi ogoi kon inia,

AMSAL 3:6

Toropbí in ki Tuhan kon bayongan in aidanmu, dá tundúon-Neabí in kobobiagmu inta mopia.

ULANGAN 28:1

“Aka moiko motoindudui kon i Tuhan Allahmu bo mosatia in dumudui kon bayongan in parenta inta pinotaauku kon inimu singgai naa, dá baḻíon-Neadon in moiko bangusa inta totok in kotango-tangoian in intau kon dunia.

ULANGAN 4:5

Bayongan in hukum tatua sinundúku kon inimu ná inta pinarenta i Tuhan Allahku. Duduiaidon intua komintan kon butá inta bain tuotan bo ḻitúan monimu tua.

KORINTUS 1 15:1

Utat mita, tanaa mako akuoi in bui moponorop kon i monimu in Habar Mopia inta nongkon i Allah inta ain pinotaauku koḻipod bo sinarimadon monimu, sahingga in nopirisayadon totok kon i Kristus in moiko.

KORINTUS 1 1:20

Dá aka natua yo diá bidon in baraguna monia? Intau mita inta mongopandoi bo intau mita inta nonotaau kon bayongan in yagi-yagi? Sin pinoniatadon i Allah kon kapandoian intau kon dunia naa diábí in baragunanea!

MATIUS 13:52

Dá ki Yesus in noguman kon i monia, “Pomuḷoi in intau inta monotaau totok kon atorang i Musa bo notarima kon totundú kon naonda in ki Allah momarenta tua, yo sia in naonda bo ki togi baḷoi inta nopoḷuai in pakakatnea nobagu bo inta nokoyongan nongkon tampat inta pinotagúannea.”

YESAYA 59:1

Dika morai kon ki Tuhan in moiḻiudon in yangkó in moposaḷamat kon i monimu, andeka bongoḷan totok in mokidongog kon kuanimu.

YESAYA 50:2

Nongonu sin nongkon umat-Ku diábí tobatúmai in intau in notubag, kon tungkuḷ in Akuoi namangoi nogoiní kon i monia? Degá mosia in tongá kibio-biómai sin kai monia kamai Akuoi in diá mokopoḷuat bo moposaḷamat kon i monia? Totuubí, podudui in parenta-Ku dagat nobaḻí noingkag, ongkag mita binaḻí-Ku padang gurun, nodapot in toyá mita minatoi bo nobódon in ḷandig.

MAZMUR 45:1

Mazmur in inanakan i Korah. Dondong tabi. Kon i itoi in mododondong. Podudui in nada: Bungang bakung.

NEHEMIA 12:36

Kon tuminea dumuduianmai in agat mita nongkon inanakannea, ki Semaya, ki Azareel, ki Milalai, ki Gilalai, ki Maai, ki Netaneel, ki Yohuda bo ki Hanani. Mosia komintan in nodia kon pakakat mita in musik notongkai ná inta pinogogitog i Datu Daud, mogogundoi i Allah tua. Ki Imang Ezra inta nonotaau totok in Hukum i Allah tua, in minayá kon muna in pipidan tatua.

NEHEMIA 8:13

Nopoikoḷomai kon singgai bayongan tongguḷu in inanakan, imang mita bo intau mita in Lewi, minayá kon i Ezra sin mobalajar kon totundú mita in Hukum i Tuhan.

NEHEMIA 4:15

Musung mita nami in nokodongog kon tomayá monia in kinotaauandon nami. Dá nosadardon kon ki Allah ain nonongkuḷabot kon tomayá monia tatua. Onda intua kami komintan in bui nogaid nonompia kon dinding tatua.

NEHEMIA 2:12

Kon dodai intua diábí pinotaauku kon i ineka kon ki Allah in nobogoi in raian natua kon inakó sin moposindog bui in kotá in Yerusalem. Nopoikoḷomai doḷom nobangon in akuoi bo nonongganut kon tongonumai in yobayat minayá in ḷuai in kotá. Koḻikud in keledai inta sinakoianku, diábí in kami nodia kon biag totakoian ibanea.

EZRA 6:22

Pitu nosinggai in koonggotnea in mosia takin sanang in gina norame kon Singgai moḷoben in Roti diá Iragian. Mosanang totok in gina monia sin ki Tuhan ain nopobaḻí kon i datu in Asyur mopia in gina kon i monia dá notuḷungdon kon i monia kon oaidan noposindog bui in Baḷoi Tuhan, Allah in Israel.

EZRA 5:5

Táe ki Allah in noindoi mako bo nogoḻiung kon itoi mita in Yahudi tatua, dá intau mita moḷoben pomarenta in Persia nonantúdon kon diádon mopogogai kon i monia kon dodai in mosia diápa mokidia in surat kon i Darius bo motarima kon tubagnea.

YEREMIA 8:8

Mokobaḻíbí totok in moiko in moguman kon moiko in mobijaksana, bo monotaau in hukum-Ku mita! Indoiaika naonda in hukum-Ku mita tatua binaḷuian in intau mita inta nonotaau totok in agama táe motombogá!

NEHEMIA 12:26

Mosia tua in nobiag kon tungkuḷ i Yoyakin ki adí i Yesua ki ompu i Yozadak bo kon tungkuḷ i Gubernur Nehemia bo i Imang Ezra intau nonotaau totok in hukum tua.

NEHEMIA 8:9

Nokodongogmai kon pinobacaan kon Hukum tatua, pinongoibu in rayat bo poḷat nongombaḷ. Dá ki gubernur Nehemia bo ki Imang Ezra inta nonotaau totok in Hukum tatua bo intau mita in Lewi inta noginsilang kon Hukum tatua, noguman kon bayongan in rayat nanaa, “Singgai naa in singgai inta mokudus kon i Tuhan Allahmu, dá dikadon pongoibúon andeka mongombaḷ.

NEHEMIA 8:4

Ki Ezra in sinimindog kon mimbar kayu inta ain pinomia sin pakéon kon poyodungkuḷan tatua. Kon dotá in koḷanannea sinimindog in intau mita tanaa: ki Matica, ki Sema, ki Anaya, ki Uria, ki Hilkia bo ki Maaseya; bo kon dotá in koḷoiginea: ki Pedaya, ki Misael, ki Malkia, ki Hasum, ki Hasbadana, ki Zakharia bo ki Mesulam.

KINOBAḺIAN 32:28

Intau tatua in noguman, “Tangoimu in deeman bidon ki Yakub. Iko noridomokdon takin i Allah bo takin intau, bo iko in nokountung; tuamai tangoimu in ki Israel bidon.”

MATIUS 23:2

“Mototundú mita kon agama Yahudi bo intau mita in Parisi aindon inogoian in kawasa monotaau kon hukum i Musa.

EZRA 7:5

Ki Abisua Ki Pinehas Ki Eleazar Ki Imang Moḷoben ki Harun

NEHEMIA 8:1

Kon buḷan noginpitu intau in Israel aindon nogutun kon kotánea-kotánea. Kon singgai imitánea kon buḷan tatua mosia komintan noyosipun kon Yerusalem, kon bosínea inta kon tayowon in Bonawang Tubig. Mosia in nopoigum sinbá Buk Hukum in gamáan i Imang Ezra, intau inta totok in nonotaau in Hukum inta inogoi i Tuhan kon Israel pinongin i Musa.

EZRA 8:1

Naa in tangoi in tongguḷu mita in inanakan inta iḷumbú kon Babel bo nobui noyotakinku, ki Ezra, minayá in Yerusalem kon dodai in ki Artahsasta nomarenta nobaḻí datu:

NEHEMIA 9:13

Nongkon ḷangit noponag in Iko kon tudu in Buḷud in Sinai, bo nongonguman in Iko takin umat-Mu tontaní. Inogoian-Mu in hukum, atorang bo parenta inta moadil, mobanar bo oyúon in mangaḻenea.

MAZMUR 80:18

Oḻiungaidon in intau inta ain piniḻí-Mu, ki adí in intau inta ain iniropotan-Mu kon ini-Mu.

MAZMUR 109:27

Dá kotaauandon in musungku kon tua in aid-Mu mita, kon Iko, ki Tuhan, inta nogaid kon tua.

MAZMUR 147:19

Sia in nopotaau in koyow-Nea kon umat-Nea, atorang bo hukum-Nea kon umat inta piniḻí-Nea.