EZRA 6:6 - Alkitab Singog In Mongondow Masa In Tanaa

⁶ Onda intua ki Darius nokidia in tubag nanaa, “Kon i Tatnai, gubernur in propinsi in Eprat Toyopan, bo kon i Syetar-Boznai, bo pojabat mita kon Eprat Toyopan. Dika monuyayow kon intau mita in Yahudi tatua,

EZRA 6:6 Referans Kwoze

EZRA 5:3

Táe ki Tatnai, gubernur in propinsi Eprat Toyopan, takin i Syetar-Boznai in ḷagi namangoi kon Yerusalem bo noḻibó kon intau mita in Yahudi, “Ki ine in nopotabá kon i monimu moposindog bo monompakakat kon Baḷoi pooibadaan tanaa?”

SURAT I PAULUS KON JAMAAT RUM 8:31

Onu in motaau naton singogon kon soaḷ mita tatua? Aka ki Allah bo noyotakin naton yo ki ine in mokoḷawang kon i naton?

AMSAL 21:30

Diábí in hikmat, bo pomomangaḻe andeka kobobijaksana inta mononoi kon tayowon in Tuhan.

EZRA 5:6

Naa in lapuran inta pinoki dia monia kon i datu,

YESAYA 27:8

Ki Tuhan in nohukum kon umat-Nea pinongin noḷumbú kon i monia kon butá in intau. Inuntun-Nea in mosia pinongin tompot moraat nongkon dotá in pomukaan.

AMSAL 21:1

Naonda bo pononompia i Tuhan kon tubig in ongkag sinbá moiḻig podudui in ibog-Nea, natua doman in pokokapit-Nea kon raian in datu.

MAZMUR 76:10

Kon tungkuḷ in Iko simindog sin monisigdon sin moposaḷamat kon intau inta dinorot kon dunia.

NEHEMIA 1:11

Indongogaipa in sambayangku bo sambayang in bayongan mogogundoi-Mu mita ibanea, inta moibog mohoromat kon ini-Mu. Tuḷungaipa sinbá kon singgai in naa mogogundoi-Mu in mokouḻídon kon totabi nongkon i datu.” Kon dodai intua akuoi in mopoposadia in oinumon i datu.

KINOBAḺIAN 43:14

Poigumon mako ki Allah Inta Totok in Mokawasa mopobaḻí kon i gubernur tatua motabi kon i monimu, dapot in moibogdon in sia mopobui mangoi kon i Benyamin bo kon i Simeon kon i monimu. Yo akuoi naa, aka mustibí kobuḻian i adíku mita, yo donaaidon mako aka tuabí in mobaḻí.”

KINOBAḺIAN 32:28

Intau tatua in noguman, “Tangoimu in deeman bidon ki Yakub. Iko noridomokdon takin i Allah bo takin intau, bo iko in nokountung; tuamai tangoimu in ki Israel bidon.”

EZRA 6:7

bo dika moḷamboi kon pogaidan monia kon Baḷoi pooibadaan monia. Pomayádon mako in ki gubernur in Yohuda bo itoi mita in Yahudi in moposindog bui in Baḷoi tatua.

EZRA 6:13

Parenta i Datu Darius tatua in inaidan kinotaridi totok i Tatnai, gubernur in Eprat Toyopan, bo i Syetar-Boznai bo totakin mita monia.