EPESUS 4:32 - Alkitab Singog In Mongondow Masa In Tanaa

³² Táe mokopopia kon gina kon tumpaḷa intau, bo moiko in musti domandon mototabian, bo mosiampungan naonda bo ki Allah inta ain nongampung kon i monimu pinongin i Kristus.

EPESUS 4:32 Referans Kwoze

MARKUS 11:25

Bo aka moiko mosambayang, táe oyúonpa intau diá kinosanang in ginamu, yo ampungaipa muna in intau tatua, sinbá ampungan doman i Amámu inta kon soroga in bayongan dosamu. [

KORINTUS 2 2:10

Aka moiko bo mongampung kon intau inta ain nogaid kon taḷá kon i monimu, yo ampungankubí doman in intau tatua. Sin onu inta ain inampunganku – aka totu-totuubí oyúon in paraḷu ampungan – yo ampungankubí kon tayowon i Kristus sin tua in kopiaanbí monimu.

EPESUS 5:1

Moiko nion in ki adí mita i Allah inta kinotabi-Nea, tuamai in moiko musti dumudui kon onu inta koibog i Allah.

LUKAS 6:35

Sabanarnea in deemanbí natua! Nanaabí in musti aidan monimu: Kotabibí in saturumu bo aidai in onu inta mopia kon i monia, bo popoḷuanaibí in mosia, táe donaai potayakan kon kauntungan in mosia. Aka natua in aidan monimu, yo moiko in motarimabí kon bungai in oaidmu inta moḷoben totok bo moiko in mobaḻí doman ki adí mita i Allah Inta Totok in moḷantud. Sin Sia in mopiabí doman kon intau mita inta diá motaau mosukur kon i Allah bo kon intau mita moraat.

LUKAS 6:37

“Donaai in moiko mohakim kon intau, sinbá diá doman hakimon i Allah in moiko. Bo donaai doman mohukum kon intau. Sinbá diá doman hukumon i Allah in moiko. Ampungaibí in intau inta kotaḷá kon i monimu, sinbá ampungan doman i Allah in taḷá monimu.

KORINTUS 1 13:4

Intau inta motabi kon tumpaḷa intau, monahangbí kon yagi-yagi bo mopia in gina. Diá in porasaan mointoi, diá kumaḷakuang bo diá doman mododia.

LUKAS 17:4

Aka sia bo nogaid kon dosa kon inimu, kopitu in tosinggai bo pomuḷoi doman mako in sia mamangoi bo moguman, ‘Maapondon akuoi,’ yo ampungaibí doman in sia.”

MATIUS 6:12

Bo ampungaidon taḷá nami, ná doman kami ain nongampung kon intau inta kotaḷá kon inami.

MAZMUR 145:9

Sia in mopiabí in gina kon bayongan in intau, bo motabi kon bayongan inta binaḻí-Nea.

YOHANES 1 2:12

Naa in pinaisku kon i monimu, uḻe Adíku mita, sin taḷámu mita aindon inampungan lantaran tangoi i Kristus.

SURAT I PAULUS KON JAMAAT RUM 12:10

Utat mita, moiko in musti umuran mototabian tobatú bo tobatú naonda bo mogutat motoḷuadí kon tombonu in baḷoi, bo mosiunaan mohoromat.

YOHANES 1 1:9

Táe aka akuondon naton in taḷá mita naton kon i Allah, dá aidan-Neabí in onu inta ain pinodandi-Nea bo pobayá-Nea doman onu inta moadil. Ampungan-Neabí in bayongan dosa naton poḷat daritan-Nea doman in kita nongkon bayongan in oaid inta moraat.

KORINTUS 2 2:7

Musti ampungan monimu in taḷánea tatua bo tongginaai, sinbá diádon totok moyoyiga in ginanea sahingga kobuḻiandon harapan in sia.

YAKOBUS 5:11

Mosia in sinangoi nosanang sin notaba. Dinongogdon monimu in soaḷ kososabar i Ayub, bo kinotaauan monimu kon pangabisannea binarakatan i Tuhan in sia. Sin tabi i Tuhan in totok moḷoben bo Sia in mopia in gina.

KORINTUS 2 6:6

Takin gina motuḻid, mobijaksana, mosabar bo mopia in gina, pinoniatadon nami kon kami in mogogundoibí i Allah. Bo takin kinumadai kon totuḷung in Roho i Allah, bo takin tabi inta noiḷuai nongkon gina inta motuḻid,

LUKAS 11:4

Ampungaidon in taḷá mita nami, sin kami in nongampung domandon kon intau inta kotaḷá kon inami. Bo donaai pomayá mako in kami kobuḻian in pirisaya kon dodai in kami koantugan in totungkuḷ.’ ”

LUKAS 1:78

Ki Tuhan naton mopia in gina bo motabi doman totok. Sia in mamangoi sinbá mosaḷamat in kita. Sia naonda bo mata in singgai inta momuká doḷo-doḷom,

YESAYA 57:1

Intau mopia bo motoindudui minatoi, diá in nomangaḻe andeka nonaridimai. Naonda in minatoi, mosia in noiḷagui nongkon bodito bo nogogai takin dame.

AMSAL 19:22

Sipat inta oḷaton mako kon intau tobatú in kotoinduduineabí. Mopia-piabí kon bogá dika in mobaḻí mouboḷ.

AMSAL 12:10

Intau mopia in umuran monaridi kon bobiagonnea; táe intau moraat in mopogutúbí.

MAZMUR 112:9

Sia in mosila-silaibí mako kon kapunyaannea, bo mobogoi in oogoi kon intau nobogá; sia in umuranbí mogaid kon inta mopia, tuamai in sia nongawasa bo ihoromat.

RUT 2:20

“Adíku, intau tatua in ginaḷumbí naton modiug,” guman i Naomi. “Siabí tua in musti moindoi kon i naton. Poigumon mako ki Tuhan momarakat kon inia. Ki Tuhan in tantúbí mogintompod kon dandi-Nea, pinomayá kon intau inta nobiagpa ande kon intau inta ain minatoi.”

PETRUS 2 1:7

Bo aka mobiag podudui in ibog i Allah yo musti intompodan in tabi kon i utat mita inta tumpaḷa mopirisaya kon i Allah bo tabi doman kon bayongan intau.

OUMAN IN RASUL MITA 28:2

Intau mita kon tua totok mongopia kon inami. Mosia in nonontuḷú kinoborambang bodongka inoiní monia in kami nonayang kon tua sin momangkoidon monguyan bo motumpingdon.

SAMUEL 2 7:21

Pinodoyon kon dandi-Mu bo pinodoyon kon ibog-Mu tontaní Iko ain nomia kon oaidan mita inta moḷoben tua sin motundú kon mogogundoi-Mu naa.

AMSAL 19:11

Intau mobijaksana in mokoigonbí kon torúnea. Sia in dayowon sin diá mopandungmai kon taḷá in intau kon inia.

YEREMIA 38:12

Ki Ebed-Melekh nokipoaip in daing mita tatua kon iyokku, sinbá diá monakit in awakku in popotogotan in tontogot tatua. Dá dinuduianku in onu inta pinoki aid i Ebed-Melekh.