DATU MITA 2 10:6 - Alkitab Singog In Mongondow Masa In Tanaa

⁶ Bo ki Yehu in bui nokidia in surat kon i monia, nanaa in bonunea, “Aka moiko moibog kon inakó, bo mosadia doman dumudui kon bayongan in parentaku, yo ḻimodon in ki adí bo ki ompu i Ahab tua, bo ikoḷom kon oras doman nanaa diádon mangoi in uḷu mita monia kon inakó kon Yizreel.” Ki adí bo ki ompu i Datu Ahab inta pitu nopuḷú tua in nogutun kon guhanga mita in ḻipú kon kotá in Samaria, bo sinompiamai monia.

DATU MITA 2 10:6 Referans Kwoze

LUKAS 9:50

Dá ki Yesus in noguman kon inia, “Donaaibí ampagan monimu in sia, sin ki ine in momayow kon i monimu, yo sia tua in yobayat monimu.”

MATIUS 12:30

Ki ine in diá noyotakin-Ku, sia in momaḷawang kon i-Nakó. Bo ki ine inta doí mogaid moyotakin-Ku yo sia tua in momoguyaat kon tomayá-Ku!

AYUB 21:19

Moiko in moguman, “Adí ihukum i Allah popisí in dosa i amánea.” Táe akuoi in moguman: Intau baradosabí tuata inta musti hukumon i Allah, sinbá mosadar in mosia kon popisí in dosa monia, dá ki Allah in nopoangoi in hukuman-Nea.

DATU MITA 2 9:32

Iḷumangag in ki Yehu kon jandela bo noguman, “Ki ine in moibog kon inakó?” Nokodongogmai kon tua, doyowa toḷu in pogawai in komaḻig iḷumongow monag.

ULANGAN 5:9

Dika mosumba kon patong ná tatua sin Akuoi in ki Tuhan Allahmu bo Akuoi in doíbí potongkaion in onuka. Intau mita inta moyaat in gina kon i-Nakó hukumon-Ku modapot in buí monia mogintoḷu bo moginggopat.

PINOGIAPAN 25:4

“Domokdon in bayongan intau inta nobaḻí itoi mita in bangusa tatua bo ḻimod in mosia kon tayowon in intau mobarong sin moponiata mogaid kon onu inta pinarenta-Ku, sinbá Akuoi in diádon tumorú bui kon bangusa tatua.”

DATU MITA 2 10:5

Tuamai in tongguḷu in komaḻig bo walikota takin guhanga mita in ḻipú bo intau mita inta noḷukad kon i adí bo ompu i Ahab tua in nokidia in habar nanaa kon i Yehu, “Kami in motoguondokbí kon i Tuang bo mosadiabí in kami mogaid kon onuka in pokiaid i Tuang kon i nami. Diábí in kami moduí kon i ineka sin mobaḻí datu. Aidaidon onu in mopia kon mata i Tuang.”

DATU MITA 2 10:7

Naonda in notarima kon surat i Yehu, guhanga mita in ḻipú in kotá in Samaria tatua noḻimod kon i adí bo ompu i Ahab inta pitu nopuḷú tatua bo uḷu mita monia in binonu kon karansi bo pinoki dia kon i Yehu inta kon Yizreel.

DATU MITA 2 10:9

Doḷo-doḷom iḷumuaidon in ki Yehu kon bonawang, bo noguman kon intau mita inta noyosipun kon tua, “Akuoi naa inta noyopopog noḷawang kon i Datu Yoram bo noḻimod kon inia; diábí in taḷá monimu kon tua. Táe intau mita tanaa in deemanbí akuoi in noḻimod.