DANIEL 9:19 - Alkitab Singog In Mongondow Masa In Tanaa

¹⁹ Tuhan, indongogaipa kaasí in kami, ampungaidon in kami, indoiaipa in kami bo ḷagidon posaḷamat! Dikabí mokopoonggot, sinbá bayongan in intau monotaau kon Ikobí in ki Allah. Sin Yerusalem bo umat-Mu in kapunyaan-Mubí inta ain sinondí.”

DANIEL 9:19 Referans Kwoze

DANIEL 9:18

Indongogaipa kaasí in kami, o Allah, ḷongowaipa in kami bo taridipa kaasí in roriga nami takin kinogoguyaatan in kotá inta sinangoi in tangoi-Mu. Kami in nosambayang kon ini-Mu deemanbí popisí in aid mita nami mopia, táe popisíbí in Iko in totok kototabi.

LUKAS 11:8

“Yo naonda?” guman i Yesus bui. “Akuoi in moguman kon inimu, umpakabí iko yobayatnea, yo diábí mobangon in sia bo mobogoi kon onu in paraḷumu. Táe aka iko bo diá mooyá in umuran monangkokó bo moigum, dá mobangonbí in sia bo mobogoi kon onu in paraḷumu.

AMOS 7:2

Pangkoḷá mita tatua in gogió bo nokopodait nokaan kon bayongan in pinomuḷa kon butá. Bo akuoi in noguman, “Tuhan Inta Totok in moḷantud, ampungaidon kaasí in umat-Mu! Mosia in moiḻiubí in intok bo moyangkó, yo umpaka mokotongod in mosia?”

EPESUS 3:10

Makusud i Allah tua in bá tanaa mako jamaat-Nea, mopotaau in bayongan yagi-yagi soaḷ kabijaksanaan i Allah kon pomarenta mita bo kon bayongan inta nongawasa kon soroga.

EPESUS 1:12

Koḻigai in kita inta muna-munamai moharap kon i Kristus, modayow kon i Allah sin oaidan-Nea inta totok in moḷoben!

YEREMIA 14:9

Nongonu sin Iko in naondabí bo intau inta notoboḻingo; naonda bo pahlawan inta diá mokotuḷung? Táe notantúbí kon Iko in naa kon yua-yuak nami, Tuhan! Kami in umat-Mu, dikabí taḷaan-Mu in kami!’ ”

YEREMIA 14:7

Umat-Ku nokuani, ‘Tuhan, umpaka dosa nami mopotaḷá kon i nami tongá tuḷungaipa in kami podudui in dandi-Mu Iko in nopobui-buimaidon in sinaḷáan nami; totuu, kami in binaradosa kon ini-Mu.

PINOGIAPAN 14:19

Tanaa, Tuhan, popisí in moḷoben totok in tabi-Mu bo Iko mosatia kon onu inta ain pinodandi-Mu, dá poigumonku, ampungaidon in dosa in intau mita tanaa ná Iko ain nongampung kon i monia pinangkoipamai mosia nonaḷámai kon butá in Mesir.”

EPESUS 1:6

Dinayo-dayowdon in ki Allah inta mokawasa, sin tabi-Nea inta totok in moḷoben kon i naton pinoniata-Neadon pinongin i Adí-Nea.

YEHEZKIEL 39:25

Ki Tuhan Inta Totok in moḷantud in noguman, “Táe tanaa Akuoi in motabi bidon kon umat-Ku Israel buí i Yakub, bo baḻíon-Ku bui in mosia mobiag motompia. Tua in aidan-Ku sinbá tangoi-Ku umuran horomaton.

YEHEZKIEL 36:22

Manangka intua, potaaudon in onu inta poguman-Ku, ki Tuhan Inta Totok in moḷantud kon bangusa in Israel, ‘Onu in pomiaan-Ku kon singgai moiduduimai deemanbí popisí in moiko, ei intau mita in Israel, táe popisíbí in tangoi-Ku inta motusi, inta ain kinotor monimu kon ondaka in bayáan monimu.

YEHEZKIEL 20:22

Táe Akuoi in diábí nogaid kon tua sinbá tangoi-Ku in diá singkuḻeon in bangusa mita inta nokoontong kon i-Nakó nodia kon Israel iḻumuai nongkon Mesir.

YEHEZKIEL 20:14

Táe diábí inaidan-Ku intua popisí in moḷukad kon tangoi-Ku, sinbá tangoi-Ku diá singkuḻeon in bangusa mita inta nokoontong kon i-Nakó nodia kon Israel iḻumuai nongkon Mesir.

YEHEZKIEL 20:9

Táe diábí inaidan-Ku intua, sinbá tangoi-Ku in diá singkuḻeon in bangusa mita inta kon pinogutunan monia. Sin kon tayowon in bangusa mita tatua, Akuoi in nopotaaudon kon bangusa Israel in diaan-Kudon ḷumuai nongkon Mesir.

YEREMIA 25:29

Akuoi in momangkoidon kon porimumudan tatua nongkon kotá-Ku tontaní. Dika modapot in mosia in moguman kon mosia in diábí hukumon. Mosia in notantú bidon kon hukumon sin Akuoi in mopoangoibí in parang kon bayongan in bangusa kon sinangkub in dunia. Akuoi, ki Tuhan Inta Totok in mokawasa, ain nosingog.

TAWARIKH 2 6:39

dá nongkon pinogutunan-Mu kon soroga igumon mako indongogan-Mupa kaasí in sambayang monia bo monotabi kon i monia. Ampungaidon kaasí in bayongan in dosa in umat-Mu.

OUMAN IN RASUL MITA 15:17

sinbá onda intau in Yahudi inta diápa nopirisaya kon i Allah komintan motayak kon i Tuhan, takin bayongan in intau inta deeman intau in Yahudi inta aindon muna inoiní-Ku mobaḻí umat-Ku.’ Natua in kai Tuhan,

PINOGIAPAN 6:27

Bo ki Tuhan noguman, “Aka mosia monangoi kon tangoi-Ku sin momarakat kon bangusa Israel, yo barakatan-Ku in mosia.”

YESAYA 43:7

Sin mosia komintan ain inoiní pinodoyon kon tangoi-Ku. Mosia in binaḻí-Ku sin mohoromat kon i-Nakó.”