AYUB 31:35 - Alkitab Singog In Mongondow Masa In Tanaa

³⁵ Diá degá in intau in moibog mokidongog kon tosingogonku mita? Mongibot in akuoi kon totuubí intua komintan. Igumon mako ki Inta Totok in mokawasa in motubag kon inakó. Aka kuma bo onu inta pinonapud in musung kon inakó pinais komintan dá koontonganku,

AYUB 31:35 Referans Kwoze

AYUB 35:14

Ayub, apadoman aka iko in moguman kon iko in diá nokoontong kon i-Nia, bo pelekaramu in kon tayowon-Neadon bo iko in mogoḷat mako kon i-Nia!

AYUB 19:7

Akuoi in nomanseḷ sin iroriga-Nea totok tua, táe diá tobatúmai in intau in nopandungmai kon inakó. “Kon onda in koadilan,” baḷúku, táe diá in nokidongog kon inakó.

AYUB 17:3

Akuoi naa in mojujur, o Allah. Pirisayadon in akuoi! Ki inepa in moginrigon kon tosingogonku?

AYUB 13:24

Nongonu sin simíbí in Iko bo momarut kon inakó? Nongonu sin inanggap-Mubí in akuoi musung-Mu?

AYUB 13:3

Táe akuoi in moibog moyosingog takin in Inta Totok in Mokawasa; moibog in akuoi mobela kon pelekaraku kon tayowon i Allah.

MATIUS 5:25

Aka iko bo koyota-yotakin in saturumu, yo ḷagidon poramuji moyobayat kon dodai in kon daḷanpa, sinbá diá posarakannea in iko kon hakim, bo hakim tatua moposarakan kon moḷoḷukad kon ponjara, bodongka bonuon monia kon ponjara in iko.

MAZMUR 26:1

Mazmur i Daud. Ogoiaipa in inta moadil in akuoi, o Tuhan, sin akuoi in nobiag takin notuḻid in gina. Akuoi in nongamang kon i Tuhan, bo diábí in ḻia-ḻiaw in gina tongopiḻikmai.

AYUB 33:6

Sin kon i Allah, iko bo akuoi in diábí in yoposinea nongkon butá ḷamentong pinomia-Nea in kitada.

AYUB 30:28

Kon bonu in sindip, diá in bayag, akuoi in moidondaḷoi; akuoi in sinimindog kon tayowon intau mobayong, mopoigum in totuḷung.

AYUB 27:7

Igumon mako musungku in hukumon baḻíon intau inta nogaid kon moraat, bo ḷawangku in bongkugon baḻíon intau inta mokotor.

AYUB 19:11

Torú i Allah kon inakó dumoko-dokot; akuoi in inanggap-Nea nobaḻí musung-Nea.

AYUB 30:20

Akuoi in nokuani kon ini-Mu, o Allah, Iko in doí notubag; aka mosambayang in akuoi, diá pandungon-Mumai.

AYUB 30:24

Nongonu sin Iko in nondangatbí kon intau inta nobodito, inta diá mokopongonu koḻikud in mopoigum tabi?

AYUB 31:36

dá takin barani potaanonku, bo baḻíonku mahkota inta poḷutudku kon uḷuku.

AYUB 13:17

Tanaa in indongogaidon kopia in tosingogonku; taridiaidon in kataranganku.