AMSAL 4:10 - Alkitab Singog In Mongondow Masa In Tanaa

¹⁰ Indongogai in akuoi, adíku! Tondudut kopira in tongginaku mita, dá moumur in kobiaganmu.

AMSAL 4:10 Referans Kwoze

TESALONIKA 1 2:13

Oyúon in totok mokopia-pia kon gina nami, sahingga in kami tantú mosukur kon i Allah. Tuata wakutu in kami nopoyaput in Habar Mopia nongkon i Allah kon i monimu. Habar Mopia tatua in diábí tongá inanggap monimu habar nongkon intau, táe totu-totuubí Habar Mopia nongkon i Allah. Sin Roho-Neabí in pinopopaké-Nea kon inimu nogaid kon tua mita, intau inta mopirisaya kon i Yesus.

AMSAL 3:2

sinbá moumur bo motompia in kobobiagmu.

ULANGAN 6:2

Moiko bo buímu musti umuran mohoromat kon i Tuhan Allahmu bo dumudui kon bayongan hukum-Nea inta pinotaauku kon inimu, sinbá moumur in kobiagan monimu kon butá tatua.

YEREMIA 9:20

Akuoi in noguman, “Indongogaipa in tosingogon mita i Tuhan, ei bayongan in bobay! Tundú kon i adímu mita bobay in dondong oamui, kon yobayatmu mita in dondong ponogumatoian.

AMSAL 3:16

Hikmat mobogoi kon inimu in umur moḷanggó, kaoyúonan bo kahoromatan.

TIMOTIUS 1 1:15

Totuubí in singog tanaa, tuamai in patusbí tarimaan bo pirisayaan komintan: “Kon ki Kristus ain namangoi in dunia naa sin moposaḷamat kon intau baradosa.” Bo akuoibí naa in intau inta totok in binaradosa bo inta totok doman in moraat.

AMSAL 8:10

Horomatbí in tongginaku moiḻiu kon saḷaka taakan, popoḷontú in sinotaau moiḻiu kon buḷawan totokan.

AMSAL 19:20

Aka iko moibog mobalajar bo mokidongog kon tonggina, yo kon singgai moiduduimai iko in mobaḻí intau inta kohikmat.

AMSAL 2:1

Abataibí in totundúku mita, adíku, bo umuran torop in tongginaku mita kon inimu.

AYUB 22:22

Tarimadon onu inta sinundú i Tuhan kon inimu; tagúdon intua komintan kon bonu in ginamu.

ULANGAN 5:16

Horomat bo ḷukadai in ki amá bo ki inámu; tuata in parenta-Ku, ki Tuhan Allahmu, sinbá moiko mobiag motompia bo moḷanggó in kobiagan kon butá inta bain ogoi-Ku kon inimu.

ULANGAN 11:21

Dá moiko takin ki adímu mita in moumur in kobiagan kon butá inta pinodandi i Tuhan Allahmu kon mogoguyangmu. Aka ḷangit bo kon ḻimonikpa in butá, dá moiko in umuranpabí mogutun kon butá tatua.