AMSAL 19:9 - Alkitab Singog In Mongondow Masa In Tanaa

⁹ Intau inta monguboḷ kon pongadilan notantú bidon kon hukumon bo yopúon.

AMSAL 19:9 Referans Kwoze

WAHYU 22:15

Táe intau mita inta nogaid kon soaḷ mita inta moromú, inta moibog monggaing, bo intau mita inta mogaid kon soaḷ mita inta mokotor, inta moḻimod, mosumba kon berhala, bo intau mita inta mouboḷ, pinomayá tosingogon ande oaid, komintan intau natua, kon ḷuai in kotá in tampatnea.

AMSAL 19:5

Intau inta monguboḷ kon pongadilan, diábí moisimparut kon hukuman.

WAHYU 21:8

Táe intau mita inta ondokon, mosia inta diá mosatia, intau moromú, moḷoḻimod, intau mokotor, intau mongonggaing, mososumba kon berhala bo komintan intau mouboḷ, toko pogambat kon bonu in dagat tuḷú bo balerang inta kodoko-dokot, tuata in popatoi inta induanea.”

WAHYU 19:20

Mahaḷuk tatua in kinodomokan takin intau mita inta morongaku nabi táe deemanbí totuu nabi inta ain norogaid kon soaḷ mita inta mokoherang kon tayowon mahaḷuk tatua. (Takin aid mita monia inta mokoherang tatua, mosia nonguboḷ kon i monia inta ain notarima kon tanda in mahaḷuk tatua bo inta ain nosumba kon patongnea.) Bo mahaḷuk tatua takin intau mita inta deeman totuu nabi tumpaḷa pinogambat kon bonu in tuḷu moḷoben inta kodoko-dokot takin balerang.

YEHEZKIEL 13:22

Intau mita mopia inta diá pomiaan-Ku ibo-ibog, in ginogondokdon monimu takin ouman uboḷmu. Intau mita moraat duíon monimu sinbá umuran mogaid kon dosa bo diá posaḷamaton.

AMSAL 12:19

Uboḷ in moibukábí doman kon bonu in tongá tokokiap in mata, táe tosingogon mita inta mobanar in mononoibí.

AMSAL 21:28

Sakusi inta mouboḷ in diábí pirisayaan; táe tosingogon in intau inta nonotaau in kinobobaḻí in pelekara, in tarimaanbí.

DANIEL 6:24

Totok in nopia in gina i datu bo pinarentaneadon sinbá ki Daniel in poḷuaiondon kon angob tatua. Naonda in inaidandon in parenta tatua, noniata magí yo diábí in kekeb topiḻikmai kon i Daniel, sin sia in nopirisaya kon i Allahnea.