AMSAL 18:7 - Alkitab Singog In Mongondow Masa In Tanaa

⁷ Tosingogon in intau bodok mokorimumud kon inia tontaní; sia in moibaaḷ kon singognea tontaní.

AMSAL 18:7 Referans Kwoze

AMSAL 13:3

Intau inta muna morai bo mosingog moaman in kobiagannea; intau inta tongá kino singo-singognea koantugan in roriga.

AMSAL 12:13

Intau moraat in koakaḷan in tosingogon mita moraat inta siningognea; intau mopia kotaḻiban in roriga.

AMSAL 10:14

Intau mobijaksana mosipun kon ilimu; aka intau bodok mosingog, sia in mokopopisí kon bodito.

MAZMUR 140:9

Dikabí duduian in ibog in intau moraat, o Tuhan, dikabí pomayá mako in tomayá monia tua motuoi.

MAZMUR 64:8

Táe ki Allah in nopopiotbí in piot-Nea kon i monia, bo indoianmai notompaḻí in mosia.

AMSAL 6:2

Bo degá iko in noitogotdon kon onu in siningogmu bo noibaaḷdon kon dandimu tontaní.

AMSAL 10:8

Intau inta mopandoi, moibog motarima kon tonggina; intau inta tongá kino singo-singognea in moiḷangkambí.

HAKIM MITA 11:35

Naonda in inontong i Yepta in sia, noajardon totok in gina i Yepta dá sia nomisi-misídon kon ḷambungnea, poḷat noguman, “Kaasí adíku, morumbundon in dodobku! Nongonu sin mustibí iko in mokororiga totok kon ginaku? Akuoi ain nongibot kon i Tuhan, bo diá bidon intua motaauku inggamáan bui!”

AMSAL 18:8

Moponapud tua in mopiabí in korasaan; intau moibog moḻiom kon tua.

AMSAL 5:22

Dosa in intau moraat in naonda bo poyogaḷap inta modomok kon intau tatua.

AMSAL 14:3

Popisí in ḷoḷatúnea, dá intau bodok dumuí tontaní; intau mobijaksana in ḷukadanbí in tosingogonnea tontaní.

AMSAL 16:22

Kobobijaksana in nobaḻí pangkoi in kopiaan kobiagan in intau mopia; intau bodok in rorigaan in bodoknea tontaní