AMSAL 13:25 - Alkitab Singog In Mongondow Masa In Tanaa

²⁵ Intau inta mopia tantúbí oyúon in pakéonnea, táe intau moraat umuran kodaitan.

AMSAL 13:25 Referans Kwoze

MAZMUR 34:10

Horomatdon in ki Tuhan, ei moiko umat-Nea, sin intau inta mopirisaya in diábí kodaitan.

AMSAL 10:3

Ki Tuhan in diábí mopomayá mako in intau mopia in gogoyon; táe sia in moḷamboibí kon intau moraat sinbá diá in intau tatua mokouḻí kon onu inta kinoibognea.

IBRANI 13:5

Aka mobiag yo dikabí kawasaan in ibog kon doit, táe kosanangbí in momaké kon onu inta nouḻímu sin ki Allah nogumandon nanaa, “Akuoi in diábí mopomayá mako andeka monaḷámai kon inimu.”

TIMOTIUS 1 4:8

Latihan in awak naa in tongábí topiḻik in baragunanea, táe aka molatih moibada yo moibaragunabí kon bayongan in yagi-yagi, sin oyúon in dandi kon kobiagan tanaa mako bo kobiagan kon singgai moiduduimai.

AMSAL 6:11

Táe kon dodai in sia nosiug, sia inangoi in malarat bo diá koonu bo onu, tua in namangoi naonda bo mogogagow inta nodia kon pakakat in parang.

ULANGAN 32:24

Mosia in matoibí popisí in morintonow bo gogoyon, bo popisí doman in takit inta mokoondok. Pomayá-Kudon mako in mosia domokon in mahaḷuk moraat, bo tobakon in uḷag mobisa.

TESALONIKA 2 3:10

Sin kon wakutu in kami kon yua-yuakpa monimu naa in atorang inta pinoguman nami kon i monimu, “Aka intau doí mogaid yo donaai mongaan in sia.”

AMSAL 24:34

kodaitan bo mobiag mobogá mamangoi monubu naonda bo mogogagow inta kodia-dia in ḷoḷutam.

MAZMUR 37:16

Moyakagkabí in nouḻí in intau mopia tuabí in mopia-pia nongkon kapunyaan mobayong in intau moraat.

MAZMUR 37:3

Popirisayadon kon i Tuhan, bo aidaidon in inta mopia, pogutundon kon butá tatua bo kotoḷutuidon.

ULANGAN 28:48

Tuamai moiko musti mogundoi kon musung mita inta pinoangoi i Tuhan sin moḷawang kon i monimu. Moiko in aputondon in gogoy, yogang bo mopilang bo diá koonu bo onu. Ki Tuhan in mondorot totok kon i monimu modapot in moiko moyopú.

LUKAS 15:14

Naonda in doitnea tatua nodaitdon komintan, kotá inta binayáannea tatua kino antugan in malarat, sahingga in sia nomangkoidon doman mokorasa kon roriga sin diádon koonu bo onu.

MAZMUR 103:5

Sia inta nopoorop kon kobiaganmu in inta mopia, dá iko in umuran moguod naonda bo ḷagapan boniá.

MAZMUR 132:15

Bayongan in kaparaḷuannea in ogoi-Kubí kobayongon, intaunea mita inta nobogá in pokaanon-Kubí modapot in mobotug.

AMSAL 13:18

Intau inta doí tundúon in mobaḻí mobogá bo tososingkuḻe; intau inta moibog mokidongog kon tonggina in horomatonbí.