AMOS 9:11 - Alkitab Singog In Mongondow Masa In Tanaa

¹¹ Ki Tuhan in noguman, “Moiangoibí in wakutunea Akuoi monompia bui kon dodatuan i Daud. Tanaa dodatuan tatua in nobaḻídon naonda bo baḷoi inta noumpag. Táe dindingnea mita in tompiaan-Kubí bui bo posindogon-Ku bui dá mobaḻídon bui ná dungkuḷmai.

AMOS 9:11 Referans Kwoze

YESAYA 16:5

Onda intua intau tobatú nongkon buí i Daud in mobaḻí datu, bo sia in momarenta kon bangusanea podoyon kon tabi bo satia. Sia in moposindog in inta moadil bo moḷamemet in mogaid kon inta mobanar.)

MAZMUR 80:12

Tanganea in noiḷandai nodapot kon Dagat Toyuak, ḷuntungnea mita in noidapot kon Ongkag in Eprat.

YESAYA 63:11

Bo mosia in nokotorop kon inta dungkuḷmai, Sempo i Musa mogogundoi i Tuhan. Mosia in noḻibó “Kon onda in ki Tuhan inta nodia kon itoi mita in umat-Nea nongin dagat? Kon onda in ki Tuhan inta nobogoi in kawasa-Nea kon i monia?

HOSEA 3:5

Táe moiangoibí in wakutunea bangusa in Israel mobui kon i Tuhan Allah monia, bo kon i datu monia nongkon buí i Daud. Bo moondok in mosia poḷat mohoromat kon i Tuhan, poḷat motarima kon barakat-Nea mita.

YEHEZKIEL 36:11

Intau mita inta nogutun kon inimu takin bobiagonnea in dugangan-Kubí, dá mobaḻídon mobayong totok mobayo-bayongdon kon inta muna, bo mosia in mononggadí mononggompubí kon mobayong. Mosia in mobiagbí kon tua ná dungkuḷ bo baḻíon-Kudon mobiag mooyúon, ná inta diápa kon dodai in onda in kinoyitakan monimu. Dá kotaauandon monia kon Akuoibí in ki Tuhan.

YEHEZKIEL 17:24

Bayongan in pangkoi in kayu kon butá in monotaaudon kon Akuoibí in ki Tuhan. Pangkoi in kayu inta moḷantud in pupuḷon-Ku; pangkoi in kayu inta moompá in baḻíon-Ku moḷantud moiḷontú. Pangkoi in kayu inta motoḷubú in ingkagan-Kudon; bo pangkoi in kayu inta noingkag in poponubú-Kudon bo momungai. Akuoi, ki Tuhan, ain nosingog, bayongan inta siningog-Ku in mobaḻíbí.”

OMBAḶ 5:21

Oo Tuhan, diádon in kami mobui mangoi kon ini-Mu; kami in mobuibí mangoi kon ini-Mu! Popobuidon in kaadaan nami ná dungkuḷmai.

YEREMIA 46:26

ogoi-Kubí kon i Nebukadnezar datu in Babel bo tontaranea inta moibog moḻimod kon in monia. Táe moiduduimai, Mesir in utunanbí bui ná dungkuḷ. Akuoi, ki Tuhan, ain nosingog.”

YESAYA 5:5

Nanaa in aidan-Ku kon gobá in anggur-Ku tatua: Tondok inta pinoḻibu in rabuton-Ku, dinding inta pinogoḻingoi kon inia in umpagon-Ku, bo pinomayá-Ku mako in mahaḷuk moraat momoguyaat bo moritak-ritak mako kon inia.

AYUB 1:10

Sia, motoḷuadínea bo bayongan in kaoyúonannea umuran iḷukadan-Mu. Oaidannea in binarakatan-Mu bo inogoian-Mu in sia in bobiagon nobayong totok kon butá tanaa.

MIKHA 7:14

O Tuhan, ḷukadaidon in umat-Mu, umat inta piniḻí-Mu. Mosia in nogutun noitontaní kon kayuon mai-maí, kon yuak in butá inta mopia. Biódon mako in mosia mokouḻí kon kaanon kon rawang bonok in Basan bo kon Gilead ná dungkuḷmai.

MIKHA 5:2

Dá, ki Tuhan in mopomayádon in umat-Nea kawasaan in musung mita monia modapot in bobay inta ain sinantú mobaḻí ki iná in mongongawasa tatua mopononggadídon kon i-Nia. Mopaḷut mako kon tua intau mita tongobangusanea inta kon pinoḷumbúan in potobatúondon bui in bangusa monia.

YEREMIA 30:9

Moiko in mogundoi bidon kon i-Nakó, Tuhan Allahmu, bo kon intau tobatú buí i Daud inta duíon-Ku mobaḻí datu.

MAZMUR 143:5

Kinotoropanku in singgai mita inta ain kinotaḻiban; iraiku in bayongan in aid-Mu, sinano-tanobku in bayongan mia-Mu.

MAZMUR 89:40

Pinilat-Mudon in dodandian-Mu takin in mogogundoi-Mu, mahkotanea in pinogambat-Mu kon bonu in yoná.

PINOGIAPAN 24:18

Butá in Edom in ḻitúanbí in musungnea, táe Israel momia kon oaidan inta moroton.

YESAYA 58:12

Kotá inta noonggotdon in nobaḻí rumbunnea in posindogonmudon bui kon tudu in orotan koyongan. Moiko in tangoiondon ‘Bangusa inta moposindogdon bui in dinding mita bo monompia kon baḷoi mita inta ain nogoguyaat.’ ”

YESAYA 65:9

Tongosilai in Intau in Israel nongkon suku in Yohuda in barakatan-Ku, bo buí monia in mokadai kon butá buḷud-Ku. Intau mita inta piniḻí-Ku inta mogundoi kon i-Nakó in mogutunbí kon tua.

YEREMIA 18:9

Noyotoḻikud kon tua, aka Akuoi monantúdon kon moposindog andeka moginrigon kon bangusa tobatú andeka dodatuan,

OBAJA 1:17

“Táe kon Buḷud in Sion, oyúonbí in mosaḷamat, bo buḷud tatua in mobaḻíbí tampat inta tondíon kon i-Nakó. Dá buí i Yakub in buidon mokadai kon butá budel monia.

MIKHA 7:8

Diábí in kinodoyonan in musung mita naton in moḷunganga in gina sin kon kinorimumudan naton. Sin umpakabí noḷabú in kita, yo kita in bui mobangon. Tanaa kita in kon bonu in sindip, táe ki Tuhan in monimbayagbí kon i naton.

MIKHA 7:11

Ei Yerusalem! Wakutumudon bui moposindog in dinding mita in kotámu. Kon singgai tatua butámu in dugangandon in kooḷadnea.

ZAKHARIA 6:12

Potaau kon inia kon Akuoi ki Tuhan Inta Totok in mokawasa in noguman, ‘Intau inta dinonoi ki Inta Tokat, in mokoḷongasidon kon tampat inta pogutunannea bo sia in moposindog bui in Baḷoi i Tuhan.

ZAKHARIA 12:7

Akuoi, ki Tuhan, in muna-munamai mopountung kon tontara in Yohuda, sinbá kahoromatan inta sinarima in buí i Daud takin intau in Yerusalem in diá moiḻiu kon kahoromatan inta sinarima in intau in Yohuda ibanea.

ZAKHARIA 14:10

Sinangkub in butá nongkon Geba kon utuan modapot in Rimon kon toḷatan, in mobaḻí butá motondodai. Táe Yerusalem in moisindogdon moḷantud totok, moḷantu-ḷantud nongkon butá mita inta kon diugneamai; kotá tatua in moibendar nongkon Bonawang in Benyamin modapot in Bonawang Sikunea, tuata in bonawang Dungkuḷ bo nongkon Ḷangkeang in Hananeel modapot kon pomomugutan kon anggur kapunyaan i datu.