AMOS 5:27 - Alkitab Singog In Mongondow Masa In Tanaa

²⁷ Kon tungkuḷ in ḷumbúon-Ku in moiko kon butá tobatú inta noyayú nongkon Damsyik. Akuoi ki Tuhan inta tangoi-Ku ki Allah Inta Totok in mokawasa ain nosingog.”

AMOS 5:27 Referans Kwoze

OUMAN IN RASUL MITA 7:43

Sin ki dewa Molokhbí in umuran untu-untuon mako monimu kotaki-takin patong ki adí in sapi inta ki Repan; tuata in patong inta pinomia monimu sin sumbaan. Tuamai in ḷumbúon-Kudon in moiko koyayúon kon ḻimako, kon ḻipú in Babel.’

DATU MITA 2 17:6

– inta taong noginsiow kon pinomarentaan i Hosea – ki Salmaneser nogagow kon Samaria. Bo intau in Israel in dinianea nobaḻí intau mita inta sinoko dakop pinobayá in Asyur. Tongosilai kon i monia pinobayánea in kotá Halah, tongosilai in kon diug in Ongkag in Habor kon butá in Gozan, bo tongosilai doman in kon kotá mita in butá in Madai.

AMOS 4:13

Buḷud bo tompot, ki Tuhanbí in nomaḻí; tomayá-Nea in pinoniata-Nea kon intau. Sia in nomia kon singgai bo doḷom; kon popod mita in butá Sia in nodondaḷoi, Ki Tuhan Allah Inta Totok in mokawasa, tuata in tangoi-Nea.

DATU MITA 2 15:29

Kon tungkuḷ in pinomarentaan i Pekah, ki Tiglat-Pileser Datu in Asyur nogagow kon kotá in Iyon, Abel-Bet-Maakha, Yanoah, Kedes, Hazor, butá in Gilead, Galilea bo Naptali. Intau mita inta nogutun kon tua in dinianea doman nobaḻí intau mita inta dinakop bo dinia kon Asyur.

YEREMIA 38:17

Bo akuoi in noguman kon i Zedekia kon ki Tuhan Inta Totok in mokawasa, ki Allah inta sinumba in intau in Israel, noguman nanaa, “Aka iko tumungkud kon pojabat mita i datu in Babel, iko in diábí ḻimodon, bo kotá tanaa in diábí doman turubon. Iko takin motoḷuadímu in mosaḷamatbí.

AMOS 5:26

Táe tanaa moiko in nosumba kon Sakut inta inanggap monimu datumu tatua, bo Kewan, tundi inta sinumba monimu tua. Tuamai in patong mita inta ain pinomia monimu tua in musti akuton monimu tontaní.

AMOS 6:1

Moboditodon in moiko inta nobiag nopia kon Sion, bo moiko inta noodom kon Samaria – moiko ei itoi mita in ḻipú in bangusa in Israel inta notondí naa, moiko inta biasamai inangoian in rayat sin pokituḷungan!

DATU MITA IMITÁNEA 14:15

ki Tuhan in mohukumbí kon Israel dá modandúdon ná tampiring kon bonu in tubig. Ki Tuhan in morabutbí kon rayat in Israel bo nongkon butá inta mopia tanaa inta inogoi-Nea kon mogoguyang monia. Sia in moporaritbí kon i monia kon ḷoḷan in Ongkag in Eprat, sin mosia in nopomukádon in torú-Nea sin nomia kon patong mita i dewi Asyera.

DATU MITA 2 17:23

dá kon imbuitnea ki Tuhan in doídon noindoimai kon i monia, noidapotdon in iḷumbú in mosia nongkon butá inta inogoi-Nea kon i monia. Tua in nobaḻí notongkai ná tompoingat inta ain inogoi i Tuhan kon i monia pinongin mogogundoi-Nea mita, inta nabi mita. Natuata in nobaḻí intau in Israel in dinia iḻumbú kon butá in Asyur, bo kon tuadon in pinogutunan monia noidapot in tanaa.

AMOS 6:7

Tuamai in moikodon inta muna-munamai akuton pobayá in pinoḷumbúan. Bobutungan mita bo pongaanan monimu moyotakin in moinggamádon.