ZAKHARIA 8:13 - Allah Wene Fano Wene Hupla Inane

¹³ Yago, hit Israel hinap inom Yehuda hinap inom yoma sani! O attak-attak andoma nen engge it ap pok mene nen inane homan ekhe nen ekhe inoba figik, ekhe nen ekhe inoba figik hilingirik wagunem, ’It Yehuda mene inom, it Israel mene inom inoba enggin-fenggin agaikhe mene andoma hakhogo hat hoba ogo a'nogo aga logouwak!’ ikhi lagaukwaba nen, An nen hit telhinabumo it ap pok mene andoma nen ikhi logolik, ’It Yehuda inom, Yerusalem inom inoba fanotfisili'lago mene andoma hit hinoba ogo a'nogo hilinghinobagakhi logouwak! Ikhi logogun,’ iluk ikhi lagaikhanggere hiren hinailo agi'lek hinendawinggen hambukhogo logoni o!” ugunem holhi.

ZAKHARIA 8:13 Referans Kwoze

ZAKHARIA 8:9

Tuhan nen At againafuri inoba ikhi logolik, ”Hinendawinggen wurikhogo logoni o! Yogondak he, o An Nawi ambotkwe wusugun mene ubule fogoin oba it nabi nen wene ugunem holhi lagagip mene a'nogo re yogondak ogo holhi lagebat andi.

ZEFANYA 3:20

O ekhe asi wesigin meneba re, afuni hit mene o ekhema-ekhema sagarek welagaikharek mene andoma An nen hondoginarek fisa wesigin. Hit he, o kweangma yoma fano logobagaigen he An nen hinenu werek hilingisogo hinobagagin, Nen hit hinangge yi mene ti mene oba heilarogo welagagip mene omanogo re, An nen hobuk ambotkwe sik-pikhogo logobagaigiluk hilingisogo hinobagagin aro,” iluk Tuhan nen ikhe o, iluk isikhe.

MAZMUR 72:17

At raja enu andi re afuni nen he hundik-handik andoma ebethugu mondok logouwak, nen mo yatu werek kwelek andem he at enu re ekhe inom legeisogo fikhi logouwak, nen it afuni inunggulenu lombok omanogo nen ogore, at hakhogo fanot fisikhi logouwageluk kinoti logogun, it afuni mondogaren at faget he agaiyek hikhi logouwak, ikhi logogun.

1 KORINTUS 16:13

Hinebe hebelogo logolik he, hinendawinggen Allah oba himbiret fuluk, mendegat logoino o. Hinobabut hinailo lekhogo logolik he, hinomamerogo logoino o.

YEHEZKIEL 5:15

An nen hat hele wathafi logolik na'mage nen unggum wokhetunem, inunggulenu amu mene hera'lukwe haningisogo logogun mene omanogo nen ineilenggen healuk he hagaisethafi logogun. Iren he hat li'nothafi logolik ineilenggen kumut healuk inali'lip aga logogun.

YEREMIA 29:18

An nen it inebe weim en inom, sumburu ouwagen inom, ou amben weak mene nen inom, siginarek muginarek nugunem he yi afuni ti afuni inunggulenu lombok inanggweangma welagaikharek mene andoma nen it inoba hilingik mene andoma ineilenggen isaluk inamel-mel enek aga logogun. An nen mondogat telfol isagain kwe andoma afuni nen it inoba hilingik mene andoma isaluk he inamel-melhogo inailoti logogun. It he aben puliap inafi logolik homan ikfisouwogeluk he it inenu ulugen homan ikfisikhi logogun.

HAGAI 2:19

We gandum enggen werek mene ogore mondogat lek, nen anggur inom ara inom, e delima inom e zaitun inom ogore, enggen oan iti'legat werek. Oba nen o yogondak yiba nen he An nen hit fanoabet hinobagakhi logogin o,” iluk yagaisasikhe.

DANIEL 9:11

Nit afuni Israel mene mondogaren he, Haren, Yi'nogo hilingiti logoino, ti'nogo hilingiti logoino, iluk komotninafigin wene andi ninesanggo hologo hilingiti'lek herakfisaluk, hunogo mene hilingiti lagagu o. Hat hane sagalogo weak hilingiti lagagumo, Haren he, Homan hinobagagin o, iluk hombuk palogo yaganisasigin mene andi hamingmingengge Musa nen lisu palogo fesikhe mene a'nogo ninoba fegenma o.

YEREMIA 24:9

An nen mondogat wil-wal hambik inebe alomat fisamo re yi afuni ti afuni o kweangma welagaikharek mene mondogaren he inailoti logogun. O it loageluk hilingfisagain oba andoma lagunem he afuni nen it faget puliarinafik, endo yagaisogo pelaginafik, sebelfisigik, hilingiti logogun. Aben homan ikfisikhi logolik he it inenu hombuk palogo ikhi logogun.

KEJADIAN 26:4

Hat hamlogomi inom, hombawi inom he pogoroba hesagalenggen hokhorogo werek andi hakhogo wokhetik, nen haren tagomangge mene inoba kweang yi abirengge it wogisigik, igin. Nen at Abraham An nane holfuluk nawene melalek inom, yi'nogo hilingi'no ti nogo hilingi'no iluk melalhu mene inom, tiphogo hilingiti lagaikhemo at alisikhogo re hat fanot hobagagin. A'nogo hilinghafunem neambik, it yi afuni ti afuni inunggulenu lombogen yaganeti logolik he, Abraham Ishak inombawi fanot fisikhi lagagin hak, nirogo higithogoat fanotninabin iluk yaganesugun,” iluk yagatikhe.

YEREMIA 42:18

An Tuhan, afuni Israel mene ineisena Allah a'nogo nen na'mage lagagunem, nanini hokho mene aga lagaikhe mene a'nogoba afuni Yerusalem mene inoba fesigi hak, hit o Mesir logoin mene hinoba ogore An nen andi higirat hinoba fagain o. Afuni nen inamel-melhogo nek kwelakhisikhi logogun. Hit he litnot hinobagakhi logolik, hinenu re afuni homan ikfisagarek mene iluk salogo yagahisikhi logogun. Hit he hinanggweang hinamep pisikheba yoma ekhe hogoin lek ikhe o,’ iluk yagaisigi.

MAZMUR 79:4

Nit he afuni inunggulenu fena nit horok horokwe werek mene oma nen li'not ninobagagu mene hilinglagosik welago, iren he nit endo ya'ninafik, inabit ninoba figik hilingninabi'lagwi.

YEHEZKIEL 37:11

Allah ane an noba ikhi logolik, ”Afuni wa'lagaikharek mene yi, ap oak andoma ebere it inunggulenu Israel mene faget ilirenggerogo hilingik. Iren ikhi logolik he nit he iringik welago, ninendawinggen wenggelek mene werek lek, nen hobuk ekhe logogun legat, iluk inane ikho wikho werek.

MAZMUR 44:16

Linggene hundik-hundik an nobaget yiginik tiginik iluk yaganeti logolik, it naselei mene nen inom, nen it wene inendawimo sebelek logolik werek mene andoma nen inom, puliap nobagaluk hilingitunem he an nenggali hikhi logolik nelokhe wamborogo welagi o.

ULANGAN 28:37

O kweang At hineisena Tuhan nen nalek-falek hinobagagin oba andoma nen he afuni nen inamel-melhogo ineil kumuthisikhi logolik he pilibethinafik, endo yakhinafik, hilinghinafi logogun.

GALATIA 3:14

At Allah nen he, Abraham fanot fesikhe hak, yi afuni ti afuni mondogat Kristus Yesus inom hunetunem fanorinabuageluk, Yesus wa'lagaikhe andi. At a'nogo wa'lagaikhesik oba nen, Allah Areagun wokhisagain iluk abok tak yaganisasikhe a'nogo, ninendawinggen At oba himbiret fugunem wo'nisikherek andi.

ZAKHARIA 9:13

Yehuda re ap sikhe fisogo mene inogogwi inasikhe asuageluk inom woginabigin, nen, Israel he tok pisinget houwogeluk sikhe enggelaba lirik welagaikharek hak logouwageluk inom An nen woginabigin. Nen it afuni Sion mene re An nen karok higit woginabigin. Nen An nen he, karok andiba it afuni Yunani mene inoasi kwigin.

ZAKHARIA 1:19

A'nogo hasigisik an nen malaikat ane an noba isikhe mene a'nogoba heinok wokhikhi logolik, ”Andimuk andoma re, wene ebe ninggi'nogo mene faget?” iluk yagati. A'nogo yagatimo aren onggo yaganeti logolik, ”Andimuk andoma ebere o ”kerajaan” mondok omame mene nen afuni Yehuda mene inom, Israel mene inom, Yerusalem mene inom, pugulogo nalek-falek hilingfisasukwa mene ilirenggerogo were'ma hegen o,” iluk yaganete.

RATAPAN 4:15

Afuni nen ikhi logolik, ”Hit he hinebe emerek welagep, nit senisugu lek, yoma nen sugulogo lani!” iluk agarek. Ma re it inebe o leil warik it inunggulenu lombok werekwe omanogo nen it inunggulenu ekhe mene werekwe lili'lagwiba nen, ap misigen iluk ekhe yoma femhogo logoni, iluk yagaisili'lagwi lek.

YEREMIA 44:22

Hiren tugwi kembu obaget yi mene ti mene fuluk wogoti lagep mene andoma re Tuhan nen kwelakhinarek logou re abit mondok hisili'lago, hiren hilingiti lagep mene andoma re, mondok hineloukhogo hinali'norek mene nek hilingiti lagep. Hiren he, Aren yi'nogo hilingi'no ti'nogo hilingi'no iluk yagahisikhe mene omanogo hologo hilingitep lek andiba re Tuhan oba weak hilingiti lagep. Ma re, yogondak ari hit hinanggweang mondogat weaget fisikhemo re afuni ekhe logou re elo'lek ari o, nen aben homan fisouwogeluk he o andi enu igisogo agarek. Nen, ap ineilenggen hagarek mene nen he, inamelmel inaferek,” iluk yagaisigi.

YEREMIA 44:12

Nen, afuni Yehuda mene fena ineluk werek mene nen o Mesir andoma femhogo logogun anggili'lagwi mene re o andoma nen inebe mondogat legasugun. It inebe mondogat yenggerugwi inom, inaluendek inom he sumburu ouwagen inom, weim oba nen inom, wa'lasugun. Nen afuni homan fisouwogeluk he it inenu igisogo fisikhi logogun.

YEREMIA 33:24

”Afuni nen it Israel mene inom, Yehuda mene inom faget ili'lagwi mene andoma haren futfikhi lagen a? Iren ikhi logolik, An nen it inunggulenu pire wenaginafigi andem faget he huginafikhe mene ili'lagwi. A'nogo ikhi logolik a'luk he An nagainafuri re maben hak anggili'lagwi, nen it yi re inunggulenu misik werek he anggili'lagwi lek.

YEREMIA 26:6

Hiren we hinendawinggen omamerek aple omanogo nek hilingiti logogun halok he, o wene kabogeti logolik, An nobaget hilingiti lagep oba ari re An nen o Silo hilingfesigi hakhogo hilingfagain o. Ma re yi afuni ti afuni inunggulenu lombok kweangma welagaikharek inaben he o Yerusalem enu igisogo homan fisikhi logogun,” ikhe.

YEREMIA 25:18

Yerusalem inom, o Yehuda ba nen kota abirengge andoma inom, ap raja-raja inom, kaindek yabu legoma hilingitarek inap inom he an nen anggur agai a'nogo noageluk wogisugunem nunggunem he it inebe re lei mondok pirimhogo esi lek andi higit aga lagaikha. Nen, yogondak huli nen he it inenu igisogo aben homan fisagarek.

MIKHA 5:7

Afuni Israel mene fena ineluk werek mene andoma, afuni inunggulenu lombok inanggelekwe andoma werek mene re enggama mene singa nen paik watik, nen oloba nen he wam domba senggelhik ikherek hak hilingiti logogun. Mene singa nen he wam domba omanogo eisogen tandamerisaluk he, aigen libik-labakhogo ninggik, ugunem afuni nen ambemangge telu elo'lek andi hak hilingik logogin.

YESAYA 43:28

ap An eisewerek mene nen An nawi wuri'mo omanogo emerogo figik isukwa andi. Ma re, hit afuni Israel mene it ekhe nen inendawimo seramet hinobagauwagaluk inenggiba hinobagagik, hit Yakub en tagomangge mene yi hinebe mondok legethinabuageluk herakhinobagagik, igin andi o,” iluk ikhe.

YEHEZKIEL 34:26

An nen he it inebe fanot fisambik an nandom horek mene a'nogo era'lukwe andoma logouwageluk yagaisagain. Nen iren meiso inamolo halok An nen wogisikhi logogin.

HAGAI 2:5

Hit o Mesir en wulibi wagunem omanogo, An nen hit fethinarek logolik wokhinarek mondok nikhi logogin iluk wene wathisasigi mene a'nogo higithogo re yogondak ogo An nen nawe a'ma hinobagaluk fethinarek welagi hilingi'mo re, hiren hinendawi fisu fugo.

ZAKHARIA 8:15

Oba nen he, yogondak An nen afuni Yehuda mene inom, Yerusalem mene inom fanoabet fisikhi lagi hilingi'mo re hinailo asu fuk.

ZAKHARIA 14:11

A'nogo hilingi'mo afuni inailo legengge logolik inebe inanggomo kagalogo inoatarek mene andoma legengge logogun.

ULANGAN 26:19

Nineisena Tuhan Allah nen afuni inunggulenu ekhe elalinafikhe mene andi, inunggulenu, we, endep elo'lek hangge werek kwelek, hirenek he, hinunggulenu hokho mene hilinghinabigin o. A'nogo hilinghinafunem, it afuni andi nen hit agaugwet hinafik, foget hinafik, ikhi logogun o. Nineisena Tuhan Allah nen wene wathisikhe hagat, hit hinebe at onggwarek againafuri mene hilinglasimbik logogun o,” iluk yagaisasikhe.

ZEFANYA 3:16

Inenggi ekhe asi wesigin sambul he hobuk it afuni nen ikhi logolik, ”Yago, hit Yerusalem mene yi, hinendawimo youk uluk hinailosu fugo.