ZAKHARIA 12:10 - Allah Wene Fano Wene Hupla Inane10 Andi nen it Daud ambisangma mene inom, afuni Yerusalem mene inom inoba An nen it inendawinggen hundik welagaikharek mene inom, samban ugu welagaikharek mene inom hilingisogo fisagain. Iren he, at talogo warek logogin mene a'nogo ineilenggen yerogo logolik, afuni inomalik manggusa tago wa'lagunem le agu welagaikharek hak hilingiti logogun, nen, ap inomalik misigenek engge legagunem inendawimo mondok heiselogo le agu welagaikharek hak hilingisugun. Gade chapit la |
ZAKHARIA 12:10
39 Referans Kwoze
A'nogo hilinglaga andi nen, At Tuhan nen againafuri faget mel ikhe: ”Hit hinaselei mene nen hinoasugun mene andi re, hit hinobakhe palek were'ma hinoasi wesugun andi nen he, hinasu karung su laberogo wulkwe limbik lambak laga logolik, inagainafuri manggusa mene wa'lagunem, fong watu logolik le mondok weakhogo agaikharek andi hak, li le aga logoino o,” iluk ikhe.
A'nogo mondogat hilingiti logolik he, Allah nen lebethisoageluk samban ikhi logoino. At Areagun hinendawimo logolik hinendawimo kagaligin hagat, hundik-handik samban oba Allah ayonggo figik, kino yagatik, ugu mondogat logoino. A'nogo ikhi logolik he, hinendawimo puk agi'lek, hinobabut hebelek mondok logoino. A'nogo logolik he, Allah againafuri mondogat faget samban Allah ayonggo fikhi logoino aro.
An nen hit hinebe misi'mo andoget fuluk, pesta hilingiti lagep mene andi afuni ware'ma fong watarek andi hak wasubagaik iluk hilinghinafik, wuni wati lagep mene andi le asubagaigen iluk hilinghinafik, hinendawimo weak a'luk welagep mene andi enegat asuagaluk hilinghinafik, hinesi hogologo palubagaigeluk hilinghinafik, hinasu karung mene labesubagaigeluk hilinghinafik, igin o. A'nogo hilinghinabumo, hit hinebe ap ekhe agwe emberek omalik manggusa takhogoin mene wa'lagunem le agaikharek andi hak le hokhorogo asugun o. Andi sambul fano mene ekhe higi'lek weak mondok hikhi logogun,” iluk ikhe.
A'nogo laga logolik, omanggum ninendawinggen Yesus oba himbiret fouwageluk, arenat ninendawimo kagalhik, huli wurep oba fano katokhogo mondok asi loageluk, arenat kwelakninarek welagik, ikherek andi nen he, arat nit nineilenggen en waluk murok laga logouwogo. At endawimo nen he, ”Inenggali warogo inebe eba menfisaluk inoatarek andi hak, an a'nogo noasugun nenggali,” iluk anggigi'lek, we, ”An hobuk nendawimo nagaiyek anggagain,” iluk at ebe watu kwelek afe morogo wa'lagaikhesigen, hobuk eluk agaikhesik yogondak Allah kain welagarek oba andoma era'lu kainat werek.
A'nogo pi wagaikhemo, it afuni inagap inenggalimo mene palek logolik wene eberogoat iluk wanhukwa mene ekhe Petrus inom o Yobe nen wagaukwasik were'ma, Allah nen Areagun a'nogo it endakwe mene inoba pelakfei wagaikhemo, helasukwasik, wene it ekhe inane inonggot meneba elalinat igik, Allah fogeratik, ugunem, ineilenggen higik, inesanggo holhik, isukwasik he, mel isukwa: ”Allah nen Areagun it afuni endakwe mene higirat wogisikhemo higi. Nailo e,” iluk fogeratukwa. A'nogo fogeratukwama, at Petrus nen he, mel yagaisasikhe:
Aren he, mel isikhe: At Allah nen ikhi logolik he, O wurep oba an Nareagun andi, hokhorogoat afuni mondogat inoba pelakfei wesigin o. Pelakfei wagunem he, hinagainafuri alage yenggerugwi inom, en helimenggerugwi inom, iren an nane afuni yagaisigik, hinagoromi alage nen inabikanggo higik, hineisenalak yamanugwi nen inabiba higik, ikhi logogun o.
A'nogo waga logolik le arik-arik wagunem he, An nen koninafik, inendawimo fanorogo hondogoisogo fisa wagik, igin o. An nen he i hokhorogo werekwe nen hondoginarek wagik, kweang tonggorekwe nen it ineisok unggut tunghogo wara lekwe hondoginarek wagik, igin. Ariginigin andi re An he it Israel mene ineisena welagi nen Efraim he An namlogo manggusa mene werek andi nen hilingisigin o,” ikhe.
Sue ayam ane arat isikhemo, at Petrus nen he, ”I o. Yesus nen an yaganeti logolik, Sue ayam ane igi'lek werek kwelek, haren he, Yesus nonggoro, iluk henggi henagan oba labeligin, iluk yaganete mene a'nogo ebe arat labelhi yi higi,” iluk, endawimo ebetfuluk wulifikhesik he, le mondok hokhorogo endawi fit-fit le agaikhe.
Niren Hat herakhobagaluk mondogat wilifugu meneba nen Haren komotninafi lagen andiba re, niren hilingito mene andi faget ninendawimo warikhi lago. Haren nit unggum wo'nisegenma re nit ninendawinggen heiselhu nen ninunggul wamborogo welago. Nit ninebe alageba nenat weak hilingiti lagoma re, nit ninenggali nen sebel fakhogosik welago o, nineisena,” ugunem holhi.
We minggilogo fena sepertiga nen enek he linerisogoin. Andi nen he, it andem enek he afuni nen perak endu oba ebe mene weinam asuageluk weratarek andi hakhogo enogo horinabigin o. Nen, it he emas ebe meneba nen weak mene iluk walhagarek a'nogo hakhogo it andi re An nen inobabut paligin. A'nogo hilingiti logolik iren samban An noba ugunem An nen onggo yagaisikhi logogin. Nen An nen it inoba re hit An nagainafuri o iluk yagaisagain, nen iren ogore An faget Nineisena Tuhan Allah re At aro, iluk fakhogo ugun o,” iluk isikhe.
A'nogo yagaisasikhemo at Yusuf a'nogo agoromi it pemerintah inobaget yabu hilingiri'lagwi mene omanogo ineilhanem endawinggen mondok sebel ha elo'lek hilingitu nen he, at agaila'lak inoba an nebe yi eberogo Yusuf aro, iluk yagaisagain anggasikhesik he, it agoromi yabu hilingiti lagaukwa mene omanogo inoba o elonggoma a'nogo nen herak fisaluk wulibi loageluk yagaisasikhe.
It pegawai pemerintah inobaget yabu hilingitu mene omanogo o elonggoma nen mondogat wulibi lagaukwama at Yusuf a'nogo le hokhorogo ane hokhoba agaikhe. A'nogo le agunem, it ap o Mesir mene enda'ma welagaukwa mene omanogo inom inesanggo holhukwasik, at Yusuf le agaikhe mene a'nogo faget abok o raja were'ma ogo kwi lagaikhe.
Piblisite