YOHANES 19:4 - Allah Wene Fano Wene Hupla Inane

⁴ A'nogo wati lagaukwama, at Pilatus a'nogo hobuk it ap Yahudi mene isa wulibi wagaikhesik he mel yagaisasikhe: ”Ap yi sani. Yethani! At wene oba fegep mene pilingiti menere, at weak ekhe hilingitemo higi mondok lek mene andi hit hinelu asubagaigen iluk wulakhisa wagi o,” iluk yagaisasikhemo,

YOHANES 19:4 Referans Kwoze

YOHANES 19:6

it ap Allah eisewerek mene inogogwi kaindek inom, it ap Allah awi kagalek welagaikharek mene inom, Yesus ineilenggen hasukwasik inane hokhorogo paksilak ikhi logolik he, ”At ebe eba menfembik wa'no o! Eba menfembik wa'no o!” iluk inane ninghogo yagatukwama re, at Pilatus nen he, mel yagaisasikhe: ”An nen, at weak hilingite mene ekhe higi mondok lek andi nen he, hit hinonggwarek hinoba lombogen at ebe waganogo eba menfembik wa'no o,” iluk yagaisasikhemo,

YOHANES 18:38

at Pilatus nen he, ”Wene ebe wene andi nena wene nogo,” iluk yagatikhe. Wene a'nogo yagatikhesik he, at Pilatus hobuk ap Yahudi mene inoba wulibi wagaikhesik he, mel yagaisasikhemo: ”An nenat wene oba fegep mene pilingiti mene re, at weak ekhe hilingitemo higi mondok lego.

LUKAS 23:4

at Pilatus nen he, ap Allah eisewerek mene inogogwi kaindek inom, afuni hokhorogo andogorek welagaukwa mene omanogo inom, yagaisikhi logolik he: ”An nen, at yi anema wanhi mene, at weak ekhe hilingiti'lego,” iluk isikhemo,

LUKAS 23:47

A'nogo hilingitikhemo ap tentara mene inoe kain a'nogo eilenggen hasikhesik Allah fogerati logolik he, ”Ap yi eberogoat weak hilingiti'le'ma higi o,” iluk isikhe.

1 YOHANES 3:5

At Kristus onggwarek weak hilingiti'lek logolik, nit weak hilingitorek mene sebelogo legetfisageluk, ebe weinamhogo wagaikhe andi hineluo.

1 PETRUS 3:18

Nit afuni weak hilingitorek andi faget ninenggi elugun oba, at Kristus hobuk wa'lagi'lek logoigeluk misigam fagerat katokhogo wa'lagaikhe. Ninebe Allah oba wo'ninarek lageluk he, at obabut higit hilingiterek mene nen, nit ninobabut weak hilingitorek mene faget wa'lagaikhe andi. Ebe nit afuni mene andi watukwama wa'lagaikhe meneat he, areagun mene andi Allah nen eluget fesikhe andi.

1 PETRUS 2:22

Aren he, ”Weak ekhe hilingiti'legat. Nen, eranen ugunem, afuni ekhe inesanggo holhi'legaro.”

1 PETRUS 1:19

Athe, onggo hokho meneba palogo telhinafikheo. Wam domba eak weak meneba fuk, we, domba eak mondok fano mene Allah faget amep wulagaisogo waresu hak, at Kristus amep wulagaisogo wa'lagaikhe andiba, hinonggo palogo telhinafikhe andi.

2 KORINTUS 5:21

Nit Kristus ninom huneto halok, at Allah nen onggwarek ninom ninambotkwe hunogo ninobagauwageluk nit fagerat nit ninobabut weak hilingitorek mene andi, at Kristus weak hilingiti'lek mene oba fesikhe andi.

LUKAS 23:41

Nit he, weak hilingiti lagoma ninobabut oba ninoasugun higithogoat ninoata meneat he, at yi nek he, weak ekhe a'nogo hilingiti'lego,” iluk yagatikhesik,

MATIUS 27:54

Nen, ap tentara mene inoe kain mene inom, agoromi fena Yesus era'lu kagalek welagaukwa mene omanogo inom, lugul langethigik, yi elalin mene hilinglagik, isikhe omanogo ineilenggen hasukwasik inailo hokhorogo agaukwasik he, ”Ap yi re, Allah amlogo eberogoat higi o,” iluk isukwa.

MATIUS 27:24

A'nogo yagatukwama, at Pilatus nen he, ”It afuni yoma nen, wasugunat, iluk inane ninghogoat ikhi logolik wurep oba weak asigin meneat, an nane tulemat alemarogo ikhi lagi higi,” iluk, i hinago ekhe wanhikhesik he, afuni omanogo ineilenggen werek kwelek enggibene sobalhi logolik he, mel yagaisasikhe: ”Ap yi amep he, an noba asigin lego. Hirat hinoba asigin o,” iluk, yagaisasikhemo,

MATIUS 27:19

wene ero pilingitare'ma aremnogo hurek were'ma, at Pilatus agwe nen ap ekhe wene warogo lakfei wagaikhe. Lakfei waga logolik he, mel isikhe: ”An hubanggo nogo ugunem ap andi fagerat nabi mondok weak higirigo. Halok he, at obabut fano mene andi hat hinomen wene oba fugubo,” iluk isikhemo yagasi wagaukwa meneat he,

MATIUS 27:4

”Eige! Ap andi weak hilingiti'le'maat wasubagaigeluk yonggo wagimo o. Halok he, weagat hilingitimo higi o,” iluk, yagaisasikhemo, it omanogo nen he ”Wene andi nit ninoba agama anggegen? Lego. Andi hat hoba lombogaro,” iluk yagatukwama re,

IBRANI 7:26

Nit ninendawimo nen he, ”Ap ekhe Allah eisewerek nit faget fano katokhogo yi'nogo kain logolik hilingiti logoilebe,” iluk anggogorek mene, Allah nen ninoe Yesus andiat menfesikhemo werego. At obabut he, weak ekhe hilingiti'lek, fano tegelek mondok were'ma, afuni weak hilingitarek mene inendawimo nen tegelogo pogot abel ponggwe po'lima liakfesikhemo nit faget werego.

YOHANES 18:33

It Yahudi mene nen a'nogo yagatukwama, at Pilatus wene inoba figik, kotik agarek oba a'nogo ambotkwe kwisikhesik, at Yesus ane fakhasikhesik he, mel yagatikhe: ”Afuni Yahudi mene inoe kain Henupogot hara?” iluk yagatikhemo,