YEHEZKIEL 3:11 - Allah Wene Fano Wene Hupla Inane

¹¹ Hebe re it hat hunggulenu mene hele warogo huginabi lagaikhama werek mene andoma inambit lan o. Lambik he, An Tuhan Lego Mondok welagirek mene nen it faget ikhi lagi mene andoma iren holhi logogun hea, athe holu inabit logogun hea, andi hilingik kwelegat yagaisa lan o,” iluk yaganete.

YEHEZKIEL 3:11 Referans Kwoze

YEHEZKIEL 2:7

An nen wene it inobaget yi'nogo ti'nogo iluk mondogat yagaheti lagi mene andoma iren holugun hea, lek hea, hilingik kwelegat yagaisa lano o. Nen it inobabut he wene sagalharek inap welagaikharek a'nogo helurogo.

YEHEZKIEL 3:27

Oba nen he An nen hobuk hat ninom nane masigiluk halok he, nekhengge hamelinggen serogo hilinghobagaumo haren afuni inoba An nen uageluk yagahetu mene omanogo yagaisikhi logogin. An Tuhan Lego Mondok welagirek mene a'nogo nen it faget nane ikhi lagi mene andoma yagaisikhi logogin. A'nogo ugunem it mene fena nen he holhi logogun oba nen fenakwe re holhi logogun lek. Andi re it eberogo inunggulenu wene sagalharek inap hilingi'mo a'nogo hilingiti logogun andi o,” iluk yaganete.

YEHEZKIEL 33:30

Tuhan ane ekhe ikhi logolik, ”Afuni wa'lagaikharek mene yi re, hat he it hat hunggulenu mene o leget pa'leget waganekwe horok horokwe inom athe o kwe ambe palekwe inom kaboge'luk, it ekhe nen ekhe inoba ikhi logolik, ”Yago. Nit yogondak yi, Tuhan nen he, Allah wene ninggi'nogo mene ekhe igin he,” iluk agarek mene omanogo nen habok tindel-tandel hafarek mene welagen o.

YEHEZKIEL 33:17

Oba nen he it inunggulenu andi nen ikhi logolik he, An nen hilingiti mene andoma re, higithogo hilingiri'lago iluk agarek lek! Oba nen it inonggwarek enek he, higithogo hilingiti legengge nen ili'lagwi.

YEHEZKIEL 33:12

Afuni wa'lagaikharek mene yi re, haren afuni Israel mene yagaisan, ap fano mene ekhe nen weak hilingitu halok he, aren attak fano hilingiti laga mene andi nen lebetha lek hak. Nen, ap kwanirogo hilingitarek mene nen aweak herakfisugu halok, at unggum wogosugun lek. Nen, ap fano hilingitarek mene nen weak hilingitu halok agap teligin legat.

YEHEZKIEL 33:2

”Afuni wa'lagaikharek mene yi, haren it ap inunggulenu mene andoma inoba yagaisano, An nen o kweang misik ekheba weim lakfei wesigin sambul andi re yi mene hilinglaga logogin. Afuni andoma werek mene nen ap misik ekhe kagalinarek logogin mene heragaisogo menfogoin.

YEHEZKIEL 2:5

Iren holugun inamolo halok ogo inabit halok ogore ebe esin he nabi it inanggele'ma werek iluk inelu asugun andi esin o.

DANIEL 12:1

A'nogo yaganetesik malaikat asu lenan su meneba laberek mene a'nogo nen nekhengge yaganeti logolik, ”Linggene andi sambul he, at Mikhael malaikat hokho mene hat hunggulenu mene kagalinarek welagarek mene andi weinam asi wesigin. Andi nen he inenggi ekhe enggin-fenggin hokho mene hogoin oba attak yi afuni ti afuni inunggulenu lombok welagaukwaba ogo ekhe hasukwa lek mene logogin. Oba nen he afuni hat hunggulenu mene mondogat inenu buku Allah nen meneba lisu palek werek mene andoma re inagap telinabigin.

YEHEZKIEL 37:18

A'nogo hilingfagain halok it hat hunggulenu mene andoma nen heinok wokhikhi logolik yi ebe ninggi'nogo faget,

YEHEZKIEL 3:15

A'nogo nen arat lagarik he, o hele warogo lakfisa lagaukwama inawi wurogo welagaikharek oba o Tel-Abib i Kebar aigoba andoma kwilagarik linggene sabiren inukhogo welagi. A'nogo logolik an nen nesanggo holhik, neilenggen higik, igi mene omanogo faget ebethikhi logolik he noba fokhogo wamborek mondok welagi.

ULANGAN 9:12

A'nogo wo'netikhesik, at nineisena Tuhan nen he mel yaganetikhe: Afuni o Mesir en woginarek wagen omanogo nen weak mondok hilingita andi nen he, hat weak-weak pin o. Iren he wene An nen, Yi'nogo hilingiti logoino, ti'nogo hilingiti logoino, iluk komothinafi mene a'nogo sagalogo herakfisagasik he, tugwi kembu fogerati logouwogeluk ekhe alik hilingisogo faga o, iluk yaganetikhe andi.

KELUARAN 32:7

A'nogo hilingiti lagaukwama, At nineisena Tuhan nen Musa mel yagatikhe: ”Afuni hat mene o Mesir en woginarek wulibi wagen mene omanogo nen weak mondok hilingita andi nen, hat hebe weak-weak pin o.

YEHEZKIEL 3:10

Hobuk ekhe inomat Allah ane ikhi logolik, ”Afuni wa'lagaikharek mene yi re, An nen yi wene ti wene hat hoba yagaheti lagi mene andoma fanorogo fut-fuluk wenggelhi logoin o.

YEHEZKIEL 3:12

A'nogo yaganetemo nen Allah Areagun nen an legeisogo nobagaikhemo re, nambotkwe fikhiren ane kululuk eti logolik yi'nogo ugunem holhi, ”Tuhan pogoroba ombak-bak werek mene nek fogeratu mondok logouwak!” iluk ikhi laga.

YEHEZKIEL 20:27

Enggere, afuni wa'lagaikharek mene yi, haren it ap Israel mene inoba re An Tuhan Lego Mondok welagirek mene nen it inoba yagaisikhi lagi mene yi yagaisano: Ekhe walhigik he, it inambu inombalak andi nen ninggi'nogo hilingiti logolik ogore An weagerogo nobagagik, An noba inendawinggen tibet figi'legengge welagik, ikhi lagaukwa.

YEREMIA 29:20

Nen, hit mondogat An nen o Babel hukhinabi lagagi mene re An Tuhan nen nane ikhi lagi mene yi holini o,” ikhe.

YEHEZKIEL 2:4

It inungguloak helep hangge logolik, An legeisogo nobagali'lagwi lek. An nen hat hebe it inoba lakhobagakhi lagi yi re, An Tuhan Lego Mondok welagirek mene a'nogo nen wene it yagaisoagaluk yagahesigin mene yi, yagaisa lanogen inoba lakhobagagin o.