YEHEZKIEL 3:10 - Allah Wene Fano Wene Hupla Inane

¹⁰ Hobuk ekhe inomat Allah ane ikhi logolik, ”Afuni wa'lagaikharek mene yi re, An nen yi wene ti wene hat hoba yagaheti lagi mene andoma fanorogo fut-fuluk wenggelhi logoin o.

YEHEZKIEL 3:10 Referans Kwoze

MAZMUR 119:11

An nen Hat helokhoma weak hilingiti hanogoluk, Hat Hawene melalek yaganeti lagen mene a'nogo nendawimo fakhigirik welagi.

AYUB 22:22

At Tuhan nen yagaheri'lago mene andi re furogo helaluk he, mondogat andoma hendawimo foukhogo fisogo logoin o.

1 TESALONIKA 4:1

Nerugwi nagaila'lak. Wene wurep oba ekhe yi yagahisak. Nit ninoe Enupogot Yesus nen: ”Hinobabut Allah endawimo fanorogo, yi'nogo hilingiti logoino, ti'nogo hilingiti logoino,” iluk, isikhemo yagahisa wagagu a'nogo hinelu. A'nogo yagahisasugumo, hiren a'nogo hilingiti lagep meneat he, hobuk ekhe inomat hokhorogo hilingiti logobagaigeluk ninoe Enupogot Yesus ninom hundik logolik komorogo yagahisigi andi.

1 TESALONIKA 2:13

Niren wene Allah ane a'nogo yagahisasugumo, hiren he, ”Wene andi afuni inane mene lego. We, Allah ane aro,” iluk wanhigip andi re, eberogoat Allah aneat wanhigibo. Andi nen nit kamo igi'lek Allah hai wato mondok welago. At Allah nen hit hinendawinggen Kristus oba himbiret fesigip mene halok hinendawimo kagalhu mondok welagarego.

LUKAS 8:15

Nen, kweang fanoma pisikhe andi ebe re, it afuni ekhe fano wene andi inesanggo holharesik he, inendawinggenma mondok furogo helagaresik herakfigi'lek fisogo logolik, enggen hokho iterek andi aro,” iluk yagaisasikhe.

YEHEZKIEL 2:8

Hat afuni wa'lagaikharek mene yi. An nen hat hoba yagaheti lagi mene andoma fanorogo holin. Hat he it hinom wene sagalhu mene hilinglasu fuk. Hambele anget fuluk he An nen wokhesigin mene ari nan,” iluk ugunem holhi.

AMSAL 19:20

Haren komo wene holhi logolik ekhe inom nelu a'lep iluk anggikhi lagen halok he, hobuk he hat hebe ap hebelek mene asigin.

AMSAL 8:10

Uang perak andiba inom, emas ebe mene andiba inom, we endebat hangge wanhi logogun meneat he, wene an nen komorinafirek wene andi inom, yi wene ti wene inelu agaikharek wene andi inom enek he, mondok hokhorogo wanhi logoino o.

YEHEZKIEL 2:7

An nen wene it inobaget yi'nogo ti'nogo iluk mondogat yagaheti lagi mene andoma iren holugun hea, lek hea, hilingik kwelegat yagaisa lano o. Nen it inobabut he wene sagalharek inap welagaikharek a'nogo helurogo.

YEHEZKIEL 3:9

Hat he An nen helep uk haroweak andi hakhogo inom, nen no intan wurik weak kengsek welagarek andi hakhogo inom hilingisogo hobagagin enggere, it wene sagalharek inap andi faget hailorinabu fugo,” iluk ikhe.

YEHEZKIEL 3:11

Hebe re it hat hunggulenu mene hele warogo huginabi lagaikhama werek mene andoma inambit lan o. Lambik he, An Tuhan Lego Mondok welagirek mene nen it faget ikhi lagi mene andoma iren holhi logogun hea, athe holu inabit logogun hea, andi hilingik kwelegat yagaisa lan o,” iluk yaganete.

MAZMUR 85:9

Niren ninambotkwe sugulogo weak hilingisi lago lek halok he, hit hinendawi serogo logobagaigen hinobagagin iluk Aren nit againafuri ninoba wene watnisikhe. Arigini'mo an he, At nineisena Tuhan Allah ane ili'lago mene andi nek nesanggo holek logoile namolo welagi o.