WAHYU 21:1 - Allah Wene Fano Wene Hupla Inane

¹ A'nogo higiri'mo nen ombo'ne re, Allah nen pogot inom kweang inom attak mene legetfigik, i laut yenggelek legetfigik, ikhesik obali'mo re pogot inom kweang inom ket mene hilingisogo fikhemo were'ma higi.

WAHYU 21:1 Referans Kwoze

2 PETRUS 3:13

A'nogo hilingiti logolik ninendawimo nen he, ”Allah nen wene watnisikhi logolik: Pogot ket mene hilingisogo figik, kweang ket mene hilingisogo figik, igin oba andoma kwimbik higithogo nek hilingiti logogun,” iluk, wene watnisasikhe mene a'nogo nenangorogo welago.

YESAYA 66:22

Pogot ket mene inom kweang ket mene inom An nomameba hambukhogo logogin andi hak, hit hinerembul oba nen tagomangge mene inom, hit hinenu inom, mondok-mondok logogin.

WAHYU 21:5

Nen, at Allah ebe kain welagarek mene obuluk a'nogoba logolik, mel ikhe: ”Yi mene ti mene mondogat ket mene elalogo figi yoma yethani!” iluk ikhesik, an mel yaganete: ”Wene yi faget, afuni nen he, Wene andi eberogoat, iluk futfogoin mene andi nen he, lisu palin o,” iluk yaganete.

2 PETRUS 3:10

A'nogo werek meneat he, afuni inonggorat werek kwelek yi mene ti mene yogot wani kwagarek andi hak, ninoe Enupogot wesigin andi re, a'nogoat wesigin o. Andi sambul, pogot ebe misik sambulat sogoi ane hangge ilik-ilik legagik, yi mene ti mene pogoroba welagarek mene ero inomat endu ninggik, kweang ebe inom, yi mene ti mene kweangma welagarek mene inom, mondogat legagik, igin o.

WAHYU 20:11

A'nogo higiri'mo nen, ombo'ne re, Allah kain welagarek oba obuluk hokho kut mene were'ma, at ebe andoma welaga higi. A'nogo were'ma pogot kweang mondogat at agaiserogo legasugun andi nen he, hobuk ineilenggen hogoin legat aga laga higi.

YESAYA 27:1

Andi sambul he Tuhan nen enggarok omame mene enggat mondok merengsek mene andi waganogo re no Lewiatan kisu ambolebene pololangerik nikherek mene, mase masengge liaferek mene andi inom, kisu menawe i laut oba werek mene andi inom unggum wogisagain.

DANIEL 7:3

A'nogo hilingitunem he, paik sou hangge mene inebe 4 en mene re, mondok hokhondek ebe yinik-hunik mene ima nen wulibi wagunem yethigi.

WAHYU 13:1

A'nogo yethigiri'mo nen, ombo'ne re, mene olomene hangge hokho mene ekhe andimuk unggul oba ebe 10 nen wulibik welaga, nen unggul he, 7 nen hilingi'mo, i laut yenggele'ma nen wulibi wagunem yethigi. Andimuk 10 nen andi, ebe lombok oba re, kware-kware ap kaindek ikfisagarek andi hak ugu were'ma, nen unggul 7 nen andiba, ebe lombok oba re Allah enu wiik-weakhogo hilingitarek mene lisu palek welaga yethigi.

YESAYA 57:20

Oba nen, ap ina'mage weak mene re i laut agum founalhu were'ma, aloget figi'lek welagarek andi higit werek. Nen i eil omame nen al alengge inom, fesi inom ha'luk wagarek andi higit werek.

YESAYA 51:11

Andiba afuni Tuhan nen fikhalogo fisagain mene re sugulogo we'luk, it o Yerusalem kwi waga logolik inagaiyegen ngai-wai liafi logogun, a'nogo hilingitunem inagaiyek hokhorogo hilingiti logolik inoba mondok heanerogo nek logogun. Fong watu mene inom, enggin-fenggin hugu mene inom omanogore mondogat legasumo re iren inagaiyegetik, inanggilugetik, hilingitu mondok logogun.

ROMA 8:21

A'nogo werek meneat he, hobuk Allah nen fanot fagain oba weregaro. Andi sambul he, afuni hele warek weak were'ma, hele fikhalogo telinafarek hak, pogot kweang yi mene ti mene mondogat alomat fisikherek mene nen omameba ferinarek were'ma, Allah nen hele fikhalogo telogo fisagain o. A'nogo fisagain andi, at againafuri inebe hunogoat hilingisogo fisugunem fogerinabugun andi hak, pogot kweang yi mene ti mene a'nogoat hunogoat hilingisogo fisugunem fogerasugun aro.

WAHYU 6:14

pogot andi re, lisu palek yinggilik mene andi hak, yinggilogo legagik, tom unggul inom, i enggen kwe inom, welagarek kwe omanogo lombogen higilogo amumu lagunem yethigik, ugunem yethigi o.