TITUS 1:6 - Allah Wene Fano Wene Hupla Inane

⁶ Afuni Allah againafuri ekhe kwelaginarek logouwageluk menfisogoin andi re, inobabut he, yi hangge mene menfisogoin. Afuni ekhe nen, ”At weak,” iluk wene oba fili'lagwi lek mene halok, agwe misigat waganek mene halok, againafuri inendawinggen Allah oba himbirik welagaikharek mene halok, it ekhe nen ikhi logolik, ”Ap yi againafuri komorinabi'logo lek hesanggeat hilingiri'lagwi andi ninabit,” iluk, abok pali'lagwi lek mene halok, menfisogoino.

TITUS 1:6 Referans Kwoze

1 TIMOTIUS 3:12

It ap Allah againafuri ekhe leberisugu mene logogun andi re, inagagwi misigat waganek logolik, inagainafuri inom, inagoromi inom, fanorogo tegelogo ferinarek welagaikharek mene halok menfisogoino.

TITUS 1:10

It afuni ekhe hokhorogoat ebe wene hologo higithogo hilingiti'lek hilingiri'lagwi andi. A'nogo hilingiri'lagwi andi, inebe hokhokwe re, it Yahudi inagap inenggalimo mene palek mene, fano wene wanhukwasigenat he, hobuk ebe wene le'maat, we, tulemat afuni inawene mene ikhi logolik, it ekhe lalinabi'lagwi andi.

EFESUS 5:18

Anggur enggen amusu hokhorogo nunggunem andi mene nen hinebe lugulugwi palhi logolik weagethinabinogo nen he, ninggi logogubo. Oba nen, we Allah Areagun andiat hinendawimo peterogo wanino.

YEHEZKIEL 44:22

It imam he inagagwi tugum mene ap inagap inonggot mene Israel mene halok enek he woginafik, nen it imam mene inagagwi sogwe fisugu mene woginafik, ikhi logogun oba nen, ap ekhe nen herakfisugu mene re woginafi logogun lek.

IMAMAT 21:7

It imam andi An nonggwarek nangge hilingi'mo re, iren hemi yugunat hilingitarek lek mene inom, he ap agap onggot mene inom, aben lologo herakfisigi'lek mene inom halok enek woginafi logogun.

1 TESALONIKA 5:14

Nerugwi nagaila'lak. Hiren he, it ekhe yabu wanhi'lek inaberali weak mene andi komorinafik, inailo mene andi komorinafik, inomame lek mene andi leberisigik, ikhi logolik he, afuni mondogat faget hinendawinggen uanhogo ebeti logoino o.

LUKAS 1:5

Ap enupogot Herodes o Yudea oba ferinarek were'ma andem, ap ekhe enu Zakharia, ap Abia nen tagongge mene, inebe imam logolik hilingiti lagaukwa mene, welagaikhe. Nen, at agwe enu re Elisabet, imam Harun en tagongge mene welagaikhe.

AMSAL 28:7

Alage souge wene melalek higithogo hilingiterek mene andi re ap hebelek mene re andi aro, oba nen ap yugunengge nalek-falek hilingitarek mene inom sebetu halok he eisena enggaliaphogo fikherek andi.

1 SAMUEL 2:22

A'nogo alue agu kwelek, at Eli ebe mondok yaman agaikhesik were'ma, againafuri nen afuni Israel mene mondok wiik-weakhogo hilingisogo fisugunem, inabok holhi lagaikhe. Nen ekhe re, hemi o Tuhan awi At ebe weinam asi wagarek oba ebekhalem andoma kagalek logolik Allah eabu hilingiti lagaukwa mene inom nogo ikhi lagaukwa mene inabok holhikheat.

1 SAMUEL 2:11

A'nogo fogeratikhesik he, at Elkana againafuri inom o Rama inambotkwe lagaukwa. A'nogo meneat he, omalik Samuel a'nogo o Silo andoma herakfuluk lagaukwama, ap Eli Allah eisewerek mene a'nogo nen fisogo werek kwelek nineisena Tuhan faget hilingiti lagaikhe.

KEJADIAN 18:19

Aren he, nagainafuri inom, aren tagongge mene inom, an nen wene it warisigi mene a'nogo fisogo logolik higithogo hilingiti logouwageluk komorinafi logouwageluk wenagaisogo menfigi anggigi. Iren a'nogo mondogat hilingisugun halok, An nen Abraham wene wareti mene andi ebe mondok wogisagain o,” iluk anggasikhe.

MALEAKHI 2:15

Nineisena Allah Enupogoren hinebe pire lek, misigat logouwageluk hit hinagagwi hinom hinebe hinendawinggen misigat hilingisogo hinobagaikherek lek nogo? At Tuhan nen a'nogo hilingiterek andi nenahalok nogo? Hiren hinagainafuri Allah againafuri ebe mene taginabubagaik iluk a'nogo hilinghinaferego. Andi nen he weak hilingito hanogoluk hinonggwaregen hinendawinggen sebel fakhikhi logoino. Hinagagwi hinebe alageba woginafigip mene andi ineil salinafi'lek inoba lomborogo logoino.

1 TIMOTIUS 1:9

Eberogoat he, wene Allah nen komotninafikhe wene andi, afuni higithogo hilingitarek mene faget isikhe fuk. We, afuni komore'lek inesanggo holhi'lek hilingitarek mene inom, Allah inabit logolik weak hilingitarek mene inom, inebe Allah faget fisigi'lek Allah ane sebelogo hilingitarek mene inom, ineisena inagaisalak inebe mondok inoatarek mene inom, afuni ekhe hesanggeat inebe mondok inoatarek mene inom,