MIKHA 6:8 - Allah Wene Fano Wene Hupla Inane

⁸ Lego! We nineisena Tuhan nen nit fano mene hilingiti logouwageluk weinamhogo yaganisikhe mene ebere yi: Afuni amu mene inoba higithogo nek hilingfisigik, nen, inendawi hundik hilingitarek mene andi ero omamet figik, ninendawinggen sebelek logolik Allah ninom hundik welagik, hilingiti logogun andi nek he mondok esin o.

MIKHA 6:8 Referans Kwoze

AMSAL 21:3

Yi mene ti mene Tuhan obaget fagarek andi re maben hak oba nen he, tiphogo hilingitik eberogo mene hilingitik agarek andi nek he, Tuhan endawimo agaiyek anggikherek mene hilingitarek.

KOLOSE 3:12

Hit hinebe Allah nen wenagaisogo onggwarek faget fakhasikhesik he: ”An nonggwarek nagainafuri o,” iluk endawirogo welagarek andi. Halok he su ket mene labetarek hak, hinobabut yi mene wanino. Inebe inendawirinafarek mene andi inom, inobabut enago welagaikharek mene andi inom, inonggwaregen fogerakhigi'lek inendawinggen seberogo welagaikharek mene andi inom, inobabut liokhogo hilingitarek mene andi inom, inafe morogo welagaikharek mene andi inom, hinobabut andi mene wanino.

YEREMIA 22:3

”Hiren hinobabut higithogo hilingiti logolik katokhogo hilingiti logoni o. Afuni enggin-fenggin inoba fisugunem werek mene andoma it enggin inoba fugu mene inenggimo nen lologo wulakfisikhi logoni. Hiren ap pok mene inoba inom, yenggerugwi suarek mene inoba inom, hemi sogwe mene inoba inom sebelogo fisigik, hinaniniba hilingfisigik, u fuk. Afuni o yi nen weak hilingiti'lek kwelek inebe pinggi inoasu fugat.

HOSEA 6:6

Hiren wam, yi mene ti mene An nobaget warogo nolneti lagep andi nabit hangge. Oba nen he, An nebe tukhumhogo hinelu agik, hinendawinggen hundik mondok welagik, ikhi logogun andi nek he, an namolo re andi o,” iluk yagaisasikhe.

1 SAMUEL 15:22

A'nogo yagatikhe meneat he, at Samuel en he, ”At nineisena Tuhan amolore, At ane hologo hilingisugun andi esin a? Athe, wam warogo nolesugun andi esin a. At nineisena Tuhan ane hologo hilingisugun andi esin mondok meneat he, at wam warogo nolesugun andi re elo'lek hangge o. Wam asei andi re elo'lek hak oba nen he, yi'nogo hilingi'no iluk ikherek mene andi hologo hilingitu mene nek he mondok fano o.

YESAYA 66:2

Yi mene ti mene mondogat oma re An nenat elalogo fesigimo werek. Andi nen he An nendawimo namolo re, afuni inendawinggen sebelfakhaluk, weak hilingitarek mene herak fisigik, An noba inailorogo welagik, nane hologo hilingitik, ikhi logogun andiat namolo welagirego,” iluk ikhe.

1 PETRUS 3:8

Wene andi wurep kobokhogo mel yagahisak. Hit hinebe mondogat hinendawimo nen he, ”Ninebe Allah againafuri ninerugwi ninagaila'lak ninom,” iluk, hinendawinggen hundik logolik, hinendawimo misigat mene anggigik, hinendawinggen misigat mene ebetik, ikhi logoino. A'nogo ikhi logolik, hinonggwaregen fogerakhigi'lek, hinendawinggen seberogo logolik, hit-hit nendawi-hendawirogo hilingiti logoino.

LUKAS 6:36

Halok he, Nineisena nen endawirinaferek andi hak, hiren afuni a'nogoat hinendawirinafi logoino o,” iluk yagaisasikhe.

LUKAS 11:42

Mene re, hit ap Farisi mene Allah nen weaget hinabigin o. Hiren he, Allah ebe inendawinggen hundik welagaikharek andi inom, afuni ekhe faget higithogo hilingitarek inom, hilingiti logou werek kwelegat he, a'nogo hilingiti'lek logolik, larengga hangge inom, heinde hangge inom, su'lingga hangge inom, hinenggi wenagaisogo hinomoloba asi wagunem, misigat ekhe Allah faget fisikhi lagep andi, wene ebe esanggoma mene andi fano hilingiti lagep meneat he, wene esin mene hilingiti'lek herakfisikhi lagep andi weago!

AMOS 5:24

Hit hinobabut he, i elesi wulibisogo lagarek andi hak, wene higithogo pilingitarek mene andiat esinet figik, i elesi agai lagu mondok welagarek andi hak, higithogo nek hilingiti logouwogeluk esinet figik, ikhi logogun andi nek he mondok fano.

MATIUS 5:7

Nen, afuni inebe inendawirogo welagaikharek mene andi, nineisena nen it endawirinabigin andi nen he, inendawimo inagaiyek hikhi logouwak.

EFESUS 4:32

Herakfisaluk he, hit-hit hinobabut enago lioksek logolik he, hit weak hilingiti lagagip mene at Kristus nen sebelogo legetfesikhe mene, Allah nen legetfisasikhe andi hak, hinerugwi hinagaila'lak ekhe nen weagethinafu halok he, wene andi legetfisikhi logoino o.

KEJADIAN 18:19

Aren he, nagainafuri inom, aren tagongge mene inom, an nen wene it warisigi mene a'nogo fisogo logolik higithogo hilingiti logouwageluk komorinafi logouwageluk wenagaisogo menfigi anggigi. Iren a'nogo mondogat hilingisugun halok, An nen Abraham wene wareti mene andi ebe mondok wogisagain o,” iluk anggasikhe.

PENGKHOTBAH 12:13

Andoma mondogat an nen wil-wal hasigisik, wene andi ambisangma lambulogo an nen anggasigi mene re yi: Allah nen afuni elalinafe andi re At oba inailorogo logolik hilingiti logouwageluk elalninafikhe hilingi'mo re, afuni inebe lombogen At awane fano wene pukhogo fisogo logolik hilingiti logogun andi esin o.

HOSEA 12:6

Allah andi re Tuhan ekhe mene-ekhe mene hilingisu hagenek mene a'nogo. At enu re Tuhan andi. At endawimo nen he afuni nen An nobaget fogetnafi logouwak anggikherek.

YESAYA 57:15

Andi re At Allah Lego Mondok logolik Amu Horek were'ma, mondok-mondok faget Enu legeisogo fagarek mene a'nogo nen yi'nogo ikhe, ”An nebe re obalik mondok legoma hore'ma po'lima welagi o, oba nen he, ap inendawinggen sebelfakhaluk hilingitarek mene inom, inaweak faget inendawi warili'lagwi mene inom, inagaiyek lek were'ma ambotkwe inagaiyeget figik, inobakhe palek were'ma inelugerinafik igirego.

MATIUS 5:3

”Afuni inendawimo nen, An he, Allah eilhanem elo'lek welagi, we Allah oba nek tibet fuluk logogin iluk anggagarek mene andi, Allah awe a'ma fisikherek oba andoma eisewerek irat agaikhasik werek andi nen he, inendawimo inagaiyek hikhi logouwak.

ZEFANYA 2:3

Yago, hit afuni o kweang yiba welagep mene nen hinendawinggen sebelfakhaluk hilingiti lagep mene inom, nen Tuhan Awene melalek hologo hilingiti lagep mene inom, sugulogo Tuhan ambit waga logoni o. At elokhoma sebe iluk At endawimo anggikherek mene nek hilingiti logoni. A'nogo hilingisugun halok he, At Tuhan awi mondok anini oba louksek awi a'nogo weinamet fei wesigin sambul andi re hit hinagap telhinabigin logou hak.

DANIEL 4:37

Ma re, yogondak an Nebukadnezar en Allah Enupogot pogoroba mene esinet figik, legeisogo figik, fogeratik, ikhi lagi. Aren he, higithogo hilingitik, eberogoat mene hilingitik, ikhi logolik, afuni inonggwaregen leget fakhaluk foget fakhagarek mene re aren sebelogo pelakfisikhere'ma higi o,” iluk isikhe.

MAZMUR 37:26

It afuni inobabut higithogo hilingitarek mene andi re, inangge afuni ekhe elama faget wogisigik, ekhe weat wogisigik, ugunem he, it andi inagainafuri inom, iren tagomangge mene inom, fanot fisikhi logogin o.

NEHEMIA 9:13

Hat hebe pogoroba nen tom Sinai ba pi wagagindik, hat honggwarek hagainafuri hane yagaisasigin andi. Yagaisikhi logolik, yi'nogo hilingiti logoino, ti'nogo hilingiti logoino, iluk higithogo komorinafik, hane eberogo mene yagaisigik, isigin mene andi re, oba tipsek logolik hilingiti logogun mene isigin andi.

MAZMUR 112:4

Afuni nen higithogo nek hilingitik, katokhogo nek hilingitik, inendawi hundik welagik, inelagaik mene fanot fisigik hilingisugun oba re, mum mene anggele'ma nen selegerinafi logogin.

RATAPAN 3:26

Enggere Tuhan nen nit lebetnisa wesigin iluk nenangorogo logolik hambuget fakhaluk logogun fano.

MAZMUR 112:9

Aren he angge yi mene ti mene it afuni inenggi lek mene leberisigik, nen at ebe along werek mene hilingik logolik lego were'ma re, afuni nen along anggaluk legeisogo fugunem, aren fano mene nek it inoba hilingfisugu, welagarek.

MAZMUR 73:28

A'nogo meneat he, an enek he nebe Allah hera'lu horokhogo werek aple andi re mondok fano hilingi'mo hikhi lagi, Neisena Tuhan Allah nen fetnarek logoinogoluk, hawe a'ma andoma kuluk logolik he, Hat hilingiti lagen mene mondogat yagaisilik laga logogin o, iluk wuni watikhe.

2 TAWARIKH 34:27

haren hendawimo waregendik, hendawimo sebel fakhegendik welagen. An nen he o Yerusalem inom, it afuni o andoma werek mene inom mondogat inoasigin iluk arat nane walhogo figirik welagi oba nen he, An nen a'nogo hilingisigin iluk hilingitigi mene a'nogo re hat hesanggo mondogat holhendik, fong warikhi logolik hakhogo re le yagaisogo hasu tilip-talaphogo lakfisegendik, welagen. Andiba re haren samban egen mene andi re An arat nesanggo holhigi o,

YAKOBUS 2:20

Hat he kembu nen ikhi lagen andi ri! Allah eberogoat iluk andi mene nek anggikhi logolik, henggiba leberisigi'lek halok, we tulemat anggikhi lagen iluk enegat futfeinogen wene yi yagahesik.

ROMA 7:16

An nendawimo nen namolo anggigirek mene lek. We, nabit anggigirek mene hilingiti lagi andi re, ”Wene Allah nen komotninafikhe wene andiat fano,” iluk u hagat hilingiti lagi o.

2 TAWARIKH 32:26

Oba nen he it afuni Yerusalem mene a'nogo inom, at Hizkia inom, Tuhan a'ma sebeluk sebel fakhasukwama re, at Hizkia ebe eluk logolik oba re unggum wene a'nogo it inoba fikhi lagaikhe lek.

1 SAMUEL 12:23

Nen, an nebe re, hit faget samban igi'lek, nineisena Tuhan ane sagalogo herakfisaluk an weak hilingisigin he, nabiro. At he, hiren yi mene ti mene fano higithogo hilingiti logobagaigiluk an nen wene yagahisugu mondok logogin o.

ROMA 9:20

Eige! Nagot yi. At Allah ane ugunem, haren at ane oak lagaligin nogo? Elo'lego. Afuni nen iwak temul mene hilingitunem kweang temul andi nen he, at hilingite mene andi yagati logolik: ”Haren an yi'nogo nenahalok hilingnafen,” iluk yagasigin nogo? Elo'lego.

LUKAS 10:42

Meneat he, wene misik ekhe hilingisu werek kwelegat he, haren yi mene ti mene faget enek hilingiti lagen. Hagot Maria yi nek he, wene fano wene misik andiat wenagaisogo eisewerek agasi'mo re, Herakfisan iluk yagasigin mondok lego,” iluk yagatikhe.

YEHEZKIEL 16:63

An nen hobuk hat weak hilingiti lagen mene andoma sagalogo leget fisagain, oba nen haren enek he honggot asigin lek, yi wene ti wene faget hane u re henggali nek aga logogin. Iluk An Tuhan Lego Mondok welagirek mene a'nogo nen nane mondogat igi,” ikhe.

2 TAWARIKH 33:23

Oba nen he at eisena nen endawinggen sebel fakhaluk hebekhogo Tuhan ambit wagaikhe hakhogo re, hilingiti'lek weak enek hokhorogo hilingiti lagaikhe andiba re, at eisena nen hilingiti lagaikhe mene inom he higitsek lek welagaikhe.

2 TESALONIKA 2:16

At ninoe Enupogot Yesus Kristus, nineisena Allah inom inobabut fano a'nogo nen, inendawit ninafukwasik, ninendawinggen abolok lek mondok logouwageluk ago watninobagagik, fano asigin iluk oba eberek logouwageluk ninendawimo kagalhik, agarek.

KEJADIAN 5:22

Nen, at Henokh Allah inom hundik werek kwelek enek he 300 tahun huli welagaikhesigen, aren againafuri helime inom alage inom taginafikhe.

IMAMAT 26:41

Andiba An nen nomameba mugusogo it afuni hinaselei mene inanggweangma hukhisa lagagi. Ariginhigi andiba re, hiren tagomangge mene nen inaweak hilingitik, nane sagalhik hilingita mene An nobaget inendawinggen sebel fakhaluk hilingisugun halok he,

2 TAWARIKH 33:19

A'nogo at Manasye nen samban isikhemo Allah nen onggo yagatikhe mene inom, at ebe endawinggen hebelhi le'ma aweak hilingiti lagaikhe mene inom, kembu fogerati lagaikhe kwe inom, kembu he mene dewi Asyera alik waganek welagaikhe mene inom, aren tugwi kembu ekhe mene ekhe mene fogerati lagaikhe mene inom, omanogo mondogat he buku it nabi nen hilingiti lagaukwa mene tindelogo palek mene a'nogoba mondogat palogo fesukwa.

1 KORINTUS 7:16

Hat he yi, hendawimo nen he, ”Hobuk nagun teligin elo'lek asigin,” iluk anggikhi lagen a? Ninggi'nogo nen helu. Hat ap yi, hendawimo nen he, ”Hobuk nagwe teligin elo'lek asigin,” iluk anggikhi lagen a? Ninggi'nogo nen helu.

2 TAWARIKH 30:11

Oba nen he it fenakwe inunggulenu Asyer mene inom, Manasye mene inom, Zebulon mene inom, o Yerusalem wesugun inamolo mene ogo welagaukwaat.

LUKAS 12:14

at Yesus nen he, mel yagatikhe: ”Hinebe tegelogo hinobagaluk hinagarek lombok sumbuthisagain andi, an mennobagagama anggegen?” iluk yagatikhesik he,

ULANGAN 30:15

Arigini'mo re, fano logolik hineluk logogun mene andi wenakhogoin a? Athe, weak logombik wa'lasugun mene andi wenakhogoin a. Hiren o yogondak yibaat hinonggwaregen wenakhani o.

YESAYA 56:1

Tuhan nen againafuri inoba ikhi logolik, ”Eil misik wela'luk An waga logolik hinagap telhinabi wagik, nen katokhogo hilingitirek mene a'nogo weinamet figik igin enggere, An nawene melalek werek higithogo katokhogo nek hilingiti logoni o.

YEHEZKIEL 33:14

Ekhe re, An nen ap weak hilingitarek mene re wa'lasugun iluk ineluet fesigi aro. Oba nen ap a'nogo weak hilingitarek mene herakfuluk agaumhogo fano mene hilingitik, higithogo hilingitik, hilingitu mene eroratu halok, ekhe walhigik he, ap inangge wanigin mene omanogo oak waganogo wogisigik, athe hinate mene omanogo inonggwarek wogisigik, andi nen wene melalek elu logogin wene higithogo hilingitik, hilingitu halok he, at andi ebe hobuk wa'lasigin lek.

MIKHA 6:9

Tuhan omame werek iluk anggikhi logolik hilingitarek mene andi re, ap mondok hebelek mene nen hilingitarek he andi aro. Nen, Aren afuni o kota ba werek mene inoba yagaisikhi logolik, ”Yago, hit afuni o kota ba welagep mene andoma hinesanggo holini o!

ZAKHARIA 7:9

”O attak andoma nenat tahun mondok hokhorogo hilinglarik wagaikhe andomaba nen engge An nawene melalek yi An nagainafuri mene inoba yagaisilik wagirek andi. An nen yagaisikhi logolik, ’Hit hinobabut higithogo nek hilingitik, hinendawi hundik hilinginafik, hinagaila'lak hinom nendawi-hendawirogo welagik hilingiti logoino o.

ULANGAN 27:10

A'nogo meneat he hiren hineisena Tuhan ane hologo nek hilingiti logolik, an nen yi'nogo ti nogo hilingiti logoino iluk yogondak yagahisigi mene andi mondogat higithogo hilingiti logoino,” iluk yagaisasikhe.

YOSUA 24:14

A'nogo yagaisasikhesik, at Yosua nen wene ekhe mel yagaisasikhe: ”Nineisena Tuhan nen a'nogo yaganisasikhe andi. Halok he, yogondak hiren he, at agaukhogo hilingiti logoino o. At amingmingengge a'luk, hinendawinggen misigat logolik, oba lombokhogo mondok logoino o. Ninombalak o Mesopotamia inom, Mesir inom, logolik hunogo mene faget, Nineisena ebe andiat, iluk oba himpirik logolik fogerati lagaukwa andi hangge, andi mene ekhe fogerati'lek, we, nineisena Tuhan amunek amingmingengge a'luk logoino o.

MAZMUR 101:1

Daud Awuni. Tuhan neisena, an he Haren hendawi hundik hilingnapluk, tiphogo hilingitik, katokhogo hilingitik, hilingiti lagen mene andi faget, wuni Hat fogethafu awuniba ikhi logogin o!

YEREMIA 9:23

A'nogo yagaisigimo Tuhan nen mel ikhe: ”Ap ekhe endawinggen kagalek andi nen fogerakhigik, it ekhe inomame hokho andi nen fogerakhigik, it ekhe inangge yi mene ti mene mondok hokhorogo werek andi nen fogerakhigik, ugun mondok lego.