MAZMUR 86:9 - Allah Wene Fano Wene Hupla Inane

⁹ Tuhan neisena, afuni yi inunggulenu ti inunggulenu Haren walhogo fisegen mene omanogo, Hat handungdang welagen mene andi faget foget hobagagik, hapne wanhik, hilingiti logogun nen waga logogun.

MAZMUR 86:9 Referans Kwoze

WAHYU 15:4

Nineisena Henupogot hat halegat tegelek logolik, Afuni wene inoba figik, kotik, ikhi logolik, Afuni mondogat ineilhanem, Eberogoat mondok hilingitendek. Afuni inunggulenu lombok mondogat, Hawe a'ma kwi we'luk, Ineindep awi yagaisogo, Fogethafik, hai wathafik, ugunem, It afuni sani hagen hat inailo lek logolik, Fogethafi'lek kamo ugun, Lek,” iluk wuni wati lagaikha holhi.

YESAYA 66:23

Tugi ket meneba inom linggene sabat sambul oba inom he, afuni mondogaren An foget nabuogeluk hundik-handik o Yerusalem andogosi waga logogun.

MAZMUR 66:4

Afuni o kweangma yoma werek mene mondogat he Hat ha'ma sebe i we'luk, iren wuniba Hat henu nek fogethafu werego,” iluk ikhi logoino.

WAHYU 11:15

A'nogo isigiri'mo nen, it malaikat inebe 7 nen omanogo, inebe falfalik mene inambinggong arat anet hagasi'mo nen, ekhe ambinggong anet hugunem he, pogoroba nen inane hokhorogo yi'nogo ugunem holhi: ”Attak afuni kweangma mene nen inawe a'ma fisaluk ferinarek welagaukwa mene re, yogondak nineisena Enupogot Allah nen ninoe Kristus nen telninabuageluk menfesikhe mene a'nogo emberegen inawe a'ma arat ninobagagasik, at Kristus nen fetninarek mondok-mondok logogin o,” iluk ikhi lagaikha.

MAZMUR 102:15

O andi mondogat afuni nen molulukhogo lakfaga oba nen he, nit Hat hamingmingengge mene nen he o andi faget ninendawi hundik hilingik welago. Nen, o andi mondogat wul age palogo taik ekheba nen he, iren inendawirati logolik werek.

ROMA 15:9

nen, it afuni endakwe mene Allah nen endawirinafikhe andi nen fogeratik, uageluk, Yahudi mene inawe a'ma kwisikhe andi. Wene andi faget Allah aneba lisu yi'nogo iluk palek werek: ”Andi nen he, an it afuni endakwe mene inanggele'ma logolik, hat fogethafik, wuni wati logolik hapne wanhik, ikhi logogin o,” iluk isikhemo lisu palogo fesukwa.

ROMA 11:25

Nerugwi nagaila'lak. Wene Allah endawimo welagarek wene yi hinonggot logogun andi, an nabit. Hit hinonggwaregen he: ”Nit wene ninelu o,” iluk fogerakhegep hanogo iluk he, wene yi yagahisak. It afuni Israel mene ekhe inendawinggen ningsek andi re, elama fagerat werego. Nen, hobuk it afuni endakwe mene kwi wesugun mene huli elok kwi wagaikha halok he,

ZAKHARIA 14:9

Andiba re, Tuhan ebe yi afuni ti afuni o kweangma welagaikharek mene inebe mondok faget inoe raja logolik melalinafi logogin. Nen, afuni inebe lombogen At Allah amu oba inendawinggen himbirek fuluk logogun, nen, we At amu Enu nek inelu logogun.

YESAYA 59:19

At omame werek aple inom, esinet fagarek mene inom he, afuni mondogaren mo eroma nen he, erumbul fikhit andoma huli inailoti logogun. At ebe wagunem he, i eil omamerogo wagarek hak, athe sogoi omame nen i agum foinak lenggak hikherek hak hilingirik wesigin.

YESAYA 11:9

Allah andom Sion fano Horek meneba andoma re inaninirogo hilingitarek mene inom, weak hilingitarek mene inom, logogin lek. O kweang andiba mondogat he, i nen laut agum hopot fikherek andi hak, Allah inelu agaikharek mene andi nen hoporek logogin.

MAZMUR 102:18

It afuni At againafuri mene inebe mondogat inomame lek a'luk werek mene nen, At Tuhan oba samban agarek mene re, Aren mondogat esanggo holherek. Iren kino yagatarek mene re Aren nabit iluk herak fisikherek lek.

MAZMUR 72:19

At enu esin mondok welagarek andi nen he, fogeratu mondok logouwok. Nen o yi awi ti awi mondogat he At ombakbagen enek sagorek logouwak. Eberogo nen a'nogoat aga logouwak Amin, iluk igi andi.

MAZMUR 67:7

Allah, Allah nit nineisena, yi mene ti mene yago mene ebe hokhorogo wo'nisikhi lagen, ninebe fanotninafi lagen.

1 PETRUS 2:9

Mene re, hit enek he, ”At Allah nen fano hilingninabi'logo,” iluk abok yagaisilik loageluk, hinebe o mum oba were'ma, at ebe elalinat selek mondok welagarek oba wesuageluk hinayonggo fesikhesik, hirat againafuri asuageluk wenakhinafik, at ebe eisewerek kaindek logouwageluk menhinobagagik hinunggulenu at onggwarek unggulenu mene salogo hinobagagik.” Nonggwarek nagainafuri,” iluk hinebe wokhinafik, isikhe andi.

EFESUS 1:12

At ebe fogeratu mondok welagaikharek mene a'nogo, niren fogerati logouwageluk, ninendawinggen omanggum Kristus oba himbiret fesugu mene halok wenagaisogo wo'ninafikhe andi.

MAZMUR 72:8

Nen o kerajaan at ebe logolik a'ma ferinarek logogin kwe re i laut ekheba nen laut ekheba andoma hilingik logouwak, nen, o mo wulibi wagarek fikhiren he mo ubuk ikherek huli andomaba wialarik laga logouwak, neisena.

2 TAWARIKH 6:33

Hat hebe pogoroba welagen oba andoma nen, aren samban ugu mene andi holinapluk, kino igin engge andi wogo'no aro. A'nogo hilingisigin oba re, it afuni mondogat o kweangma yoma welagaikharek mene mondogat he, it hagainafuri Israel mene hilingik hakhogo Hat hebe inelu asimbik, hane hologo hilingitu logogun. Nen, o an nen hat hawi wene kabogetuba iluk wuti mene yi inelu asugunat.

ZEFANYA 3:9

Iluk a'nogo anggasigiba nen he, An nen it afuni inunggulenu lombok andoma inendawinggen hebel fisamo re, iren An noba nek samban ikhi logogun. Nen, kembu ilah amu mene oba ekhe ikhi logogun lek. It afuni inunggulenu andoma mondogaren he, An nobaget enek hilingiti logogun.

MALEAKHI 1:11

Afuni inunggulenu lombok o kweangma yi awi ti awi welagaikharek mene nen An agaukhogo fogetnafarek andi nen he, iren an fogetnafi logolik, o ekhema-ekhema nen dupa amben fano mene Nenuba nolnetik, wam, yi mene ti mene An nobaget nobagaluk nolnesubaat nolnetik, agarek andi. Andi re, yi afuni ti afuni mondogaren An fogetnafu welagaikharek andi nen o.