MAZMUR 42:11 - Allah Wene Fano Wene Hupla Inane

¹¹ It naselei mene nen, an hundik-hundik yaganeti logolik he, ”Allah haren fogerati lagen mene a'nogo koma werek?” iluk yaganetu mondok were'ma re, an nendawinggen warikhi lagi o.

MAZMUR 42:11 Referans Kwoze

MAZMUR 42:5

O attak afuni inebe hokhorogo andogosuogeluk lagunem, At Tuhan Awi wuri'mo laga logolik, it afuni esa logalogo lagu kwelek attak laga logolik, wuni At fogeratarek awuni watik, nagaiyegetik, hilingirik laga-lagagi mene aremnogo ebet haluk he, an nendawimo mondok heiselhi lagi o.

YEREMIA 33:6

Oba nen he hobugen An nen kota yi inom, afuni werek mene inom inebe halogo fisagain o, andi nen he it inebe nekhengge inomame asugunat. An nen he it inoba inendawinggen serogo welagik, inailo legengge welagik, hilingik logouwageluk sik-pikhogo hilingisogo fisagain.

YEREMIA 30:17

Hit hinaselei mene nen ikhi logolik, ”Sion he hugusagama re afuni nen ekhe eberisogoin lego. Oba nen hit he An nen hinebe fanot hinobagagin, hit hinoumo andoma An nen obat oba fano hilinghinobagagin o,” ikhe.

MAZMUR 43:5

An nendawimo warikhi logolik, fenggekhugu mondok logogin andi re nenahalok nogo? Haren telnabigin iluk hoba eberek logogin. A'nogo telnafunem hobuk neisena Allah telnafendek mene hai wathafik, fogethafik, iginat anggikhi lagi o, iluk wuni watikhe.

MATIUS 9:12

A'nogo yagaisasukwama, at Yesus esanggo holhikhesik, mel yagaisasikhe: ”It afuni ekhe inoba fano mene, dokter lagen ou higirinabuageluk inayonggo fogoin nogo? Lego. We inoba ou werek halogat dokter lak inayonggo fogoin o.

MAZMUR 79:10

It afuni inunggulenu amu mene nen nit faget ikhi logolik he, ”It ineisena Allah andi ebe koma werek?” iluk heinok wani nogo. At he nirogo it ap inunggulenu inap andoma nen Hat hamingmingengge inoata mene omanogo inunggulmo hilingfisugunem hogoin aro.

MAZMUR 102:9

It naselei mene nen he linggene hundik-handik an puliarogo pela'nafu mondok werek, it ap an wena'neri'lagwi mene andoma nen he an nenu igisogo homan i'nobagagunem welagi.

MAZMUR 115:2

It afuni inunggulenu lombogen he, ”It ineisena Allah ebe koma werek,” iluk nenahalok agarek nogo?

YOEL 2:17

Nen it ap Allah eisewerek logolik, At faget hilingiri'lagwi mene andoma re, mezbah honggolek, solombon elokhoma mene honggolek tulem andoma nen le asuak. A'nogo le aga logolik, mel uak: Allah henupogot mene, neisena. Hagainafuri hendawirinabin o. Hat honggwarek hangge mene andoma afuni nen weagerinafunem he, it inunggulenu amu mene nen inane asegen wogisikhi logolik, It ineisena Allah re ebe koma werek? iluk ikhi logoinogo,” iluk ayonggo fouwagaluk yagaisasigi.