MAZMUR 33:16 - Allah Wene Fano Wene Hupla Inane

¹⁶ Ap raja at agoromi tentara inebe hokhorogo werek andiba, omame asu lek hak. It ap tentara mene inomame hokho andi nen inebe tela lek hak.

MAZMUR 33:16 Referans Kwoze

MAZMUR 44:3

It Hat hagainafuri mene it ekhe inunggulenu amu mene inanggweang oba andoma logouwageluk he, Harenat mugusogo wulak fisasigin o. It afuni inunggulenu amu mene re Haren it inebe alomat fisikhi lagagin oba nen he, it hat hagainafuri mene nek he inebe saga ilik laga logouwageluk hilinginafi lagagin.

YEREMIA 9:23

A'nogo yagaisigimo Tuhan nen mel ikhe: ”Ap ekhe endawinggen kagalek andi nen fogerakhigik, it ekhe inomame hokho andi nen fogerakhigik, it ekhe inangge yi mene ti mene mondok hokhorogo werek andi nen fogerakhigik, ugun mondok lego.

2 TAWARIKH 20:23

A'nogo nalek-falek isasikhemo re it a'nogo hebekhogo laga logolik he, ekhe nen ekhe wat fugunem he, ekhe nen ekhe watik, mondok elo'lekhogo wat-wat aga lagaukwa. A'nogo hilingiti logolik he it tentara Amon mene inom, Moab mene inomen he, it tentara Edom mene mondok al perelogo inoatukwa.

HAKIM–HAKIM 7:2

A'nogo wusi lagaukwama, Tuhan nen Gideon mel yagatikhe: ”Hat hagoromi inebe mondok hokho-pokhorogo werek. Hobuk it inomame asimbik inendawimo nen anggikhi logolik he, ninonggwarek ninomameba ninomame agagu, iluk inendawimo anggambik, An legeisogo nobagagi'lek hilingisinogo nen he, hit hinebe hokho-pokhorogo hilingik kwelek afuni Midian mene hinenggiba fugu aplere nabiro.

KELUARAN 14:28

Andi nen he, i a'nogo ambotkwe nabung-habunghogo afuni inebe inangge kereta elonggoma welagaukwa mene inom, tentara afuni Israel mene muginarek i yenggelek a'nogo enggen tulem ki wagaukwa mene ekhe mondogat inom, sebelinafikhemo wa'lagaukwa.

2 TAWARIKH 32:21

A'nogo samban isukwama re linggene misik sambul he, Tuhan nen it afuni Asyur mene inogogwi perwira omanogo inoasuageluk malaikat misik ekhe lakfei wagaikhemo re, mondagat inoasi wagaikhe. It a'nogo inoarik lagunem he hun raja a'nogo enggali mondok hokho mene agaikhesik he, aiba o Asyur omanogo ambotkwe lagaikhe. Oba nen he linggene misik sambul ekhe re at alegenek anggembu aiba omanogo kwisikhesik were'ma nen he, at onggwarek againafuri inebe fenakwe ekhe wagaukwasik he at ebe karok oba pinggi watukwa.

2 TAWARIKH 20:12

Nineisena Allah re, we Hat hamuat! Nit he niren hilingisu elo'lek mene nek agama re, Haren lebe'nisan iluk Hat hambit wagoma re, niren ap tentara hokho-pokhorogo andoma nen nit noasuogeluk hilingitunem nit he ninomame legen he, haren it unggum wogisan,” iluk samban isikhe.

1 SAMUEL 17:4

A'nogo hilingik kwelek ap misik ekhe aiba kota Gad mene, weim ailo'lek yaferek mene enu Goliat, ap Filistin mene inawi tenda wuri'mo nen ap tentara Israel mene inoasigiluk wulibi wagaikhesik ane asegen wogisikhi lagaikhe. At oagese re, mondok uan 3 meter hangge.

YOSUA 14:12

Ariginik enggere, an ninom ap an ninom welagaukwa mene inomen wene hilinglagaikhe mene waluk lagagumo, Tuhan nen abok yaganetikhe mene o tomkwe omanogo an wo'nom o. A'nogo sambul he, hat ogo hesanggo tomok holhigin anggigi, o andoma re ap inoagese uan mene inunggulenu Enak inap werek ugunem holhiginat a'nogo. Athe inawi kota re leget haningisogo kwelabek ugunem hesanggo holhiginat a'nogo. Tuhan nen ikhe hakhogo an nen ap andoma mugusogo wulaginabuageluk lebetneagain logou hago.” iluk yagaikhe.

1RAJA-RAJA 20:10

”Nit ninoe raja andi nen he ap sikhe fisogo mene hokhorogo lakfisa wesumo re, hat hawi kota wolelenggenhogo fogoin o, a'nogo foumo re o meisalogo fogoin mene andoma re it inenggi nen enek ologoilongengge furogo lagarek andi hak waluk logoin o. Nen, aren a'nogo hilingisigin lek halok he, kembu dewa nen an wene noba fagain a? athe nebe pinggi noasigin a? aren at hilingisigin, iluk hombuk palhe o,” iluk yagatukwa.

HAKIM–HAKIM 7:4

A'nogo hilingitukwama, At Tuhan nen Gideon oba mel yagatikheat: ”Hat hagoromi yoma inebe hokhorogoat. Ma re, hat hobaget An nen hilinginabigin nen he, ima woginarek lan o. A'nogo woginarek lagunem An nen he, ’At yi hat hemberek lano,’ iluk yagaheti halok, elok lagain o. A'nogo meneat he, An nen, ’At yi hat hemberek lagain lek,’ iluk yagaheti halok lagain legaro,” iluk yagatikhe.

1 SAMUEL 2:9

Neisena Tuhan hagainafuri hane hologo hilingitarek mene wea'ma lanogoluk henggi fetninarek mondok welagendego. A'nogo meneat he, it afuni inobabut weak mene andi, o mum hik-hakse'ma lakfisamo alomat lasugun o. It afuni inonggwaregen yi'nogo ti'nogo ekhe hilingitarek lek andi nen he, it inonggwarek inomameba inomame asugun mondok lego.

1RAJA-RAJA 20:15

Andiba re at raja nen he, agoromi sikhe fisogo mene inebe alage mene inom, ap o kota faget kagalek werek mene inogogwi kaindek inom tegelogo fisasikhe. Fisasikhesik ap sikhe fisogo mene omanogo inebe 232 nen wenagaisogo fisilik lagaikhe. Nen andem higithogo re, aren it Israel mene sikhe fisogo welagaukwa mene inoba a'nogo hilingfisasikhemo re inebe lambulogo re 7.000 nen hilinglagaukwa.

2 TAWARIKH 13:8

Hit hinebe esa hokho ari nen hit hinanggo sapi emas mene kembu dewa iluk at Yerobeam en wuthisikhe mene andiet werek andi nen he, Tuhan nen at Daud ambisangma meneba inomame werek inap logouwageluk wokhisikhe mene ari sagalogo fogoin iluk hilingiti lageba?

AYUB 36:7

Afuni inobabut higithogo hilingitarek mene re, Aren futfisaluk hilingfisikherek, it inebe re ap raja-raja logolik melalinafarek omanogo hakhogo inalong logouwageluk hilingfisugunem he, it afuni nen inenggi hundik-handik omanogo re inalong anggaluk foget fisikhi logolik enek werek.

AYUB 39:11

Haren he, At omame mondok hokho, iluk anggaluk, heabu enggin weak mene aren hilinghobagauwageluk enggiba fou hak nogo?

MAZMUR 20:8

It ap ekhe fena nen he inangge kereta amboloba lagaluk weim yabik lagaikharek mene a'nogoba inendawinggen tibet fagarek. Nen it ekhe fena re inanggo kuda ba inendawinggen tibet fagarek. Oba nen nit he nineisena Tuhan Allah a'nogoba nek tipsek mondok welago.

PENGKHOTBAH 9:11

O kweangma yoma ekhe yi'nogo hilingitunem isigiregat. Afuni inebe lombok inoba hilinglasigin ilugat hilinglagarek andi nen he, it afuni sa awewerek-sa awewerek walhugunem at ekhe awe werek agarek mene andi nek onggo helikherek fuk. Nen, weim yafi logolik inomame agaikharek mene andi, hobuk yafi logolik inomame agunem isigirek legat. Nen, it inendawinggen kagalek mene andi, inebe mondogat inamburu yi mene ti mene oba heilarogo nek nunggunem isigirek legat. Nen, inobabut hebelek mene andi, inebe mondogat inangge yi mene ti mene hokhorogo nek hilinglagunem isigirek legat. Nen, it yi wene ti wene inelu mene andi, inebe mondogat inenuwerek agunem isigirek legaro.

YEREMIA 48:14

Ap Moab mene nen ikhi logolik, ”Nit he, weim yaforek ninap, tentara sikhe inenggi puk mene weim oba nen wil wal haluk welago ninabo, iluk he, ninggi'nogo u hak nogo?

HOSEA 10:13

Oba nen a'nogo hilingisu mene werek kwelek haren agaumhogo amu mene hilingiti lagen, haren weak aple hilingitu mene faget enek hilingiti logolik, enggen ugu hakhogo re katokhogo hilingitarek lek mene a'nogo palhi lagen. Hat he hane heranhogo ugu meneba enggen ugu palhigik, ninggik,” ikhi lagen. Tuhan nen ane nekhengge ikhi logolik, ”Yago hit hinunggulenu Israel mene yi! Hiren he inangge kereta weim yafi lagep mene omanogo inom, nen hinagoromi sikhe fisogo inap hokho-pokhorogo werek omanogoba inom, inoba himbiret fuluk logolik hilingiti lagep,

AMOS 2:14

A'nogo hilinghinafunem, hit ekhe hineisok werek mene re weak-weak siakhogo wulibugun mondok lego. Nen, hit afuni ekhe hinomame hokho mene ogore hinomame legagik, nen ap inobabut hibilik-hebelek mene ogore inonggwaregen inebe teligik, ugun mondok legaro.

AMOS 2:15

Nen, ap sikhe enggi pagat weak mene ogo re hambuget hare elo'lek asigin, nen it ap ineisok a'ne weak mene ogore la elo'lek asiginat, nen it ap wam kuda amboloba lagaluk lagaikharek mene ogore inebe telogoin legaro.