LUKAS 24:25 - Allah Wene Fano Wene Hupla Inane

²⁵ A'nogo yagatukwama, at Yesus nen he, ”Eige! Hinebe kembu a? Ap Allah ane yagaisikhi lagaukwa mene omanogo nen wene mondogat yagaisikhi lagaukwa a'nogo eberogoat iluk hit weak-weak futfigi'lek welagep yi ri!

LUKAS 24:25 Referans Kwoze

MARKUS 9:19

Yagatikhemo re, aren it afuni omanogo mel yagaisasikhe: ”Hit afuni o yogondak welagep mene yi re, hinendawinggen noba himbiret figi'lek welagep yi ri! An nafe morogo nenggi miren oba ninom logogun nogo. Yenggerek ari an noba waluk we'ni o,” iluk yagaisasikhemo oba waluk wagaukwa.

MARKUS 7:18

Heinok wanhukwama re, aren he, mel yagaisasikhe: ”Hit ogo re, it hinom higirat wene andi futfigi'lek welageba? Yi mene ti mene inambema kwelafu halok inalabutmo pelafunem weagerinabigin lego, iluk futfigi'legat welagep higi.

MARKUS 16:14

A'nogo hilingirik waga lagaikhesik, ebe hobuk he, irat Yesus agoromi inebe 11 nen omanogo hurek sumburu ninggi logolik were'ma, ”Ineilenggen neoak,” iluk inoba kwisikhesik inelokhoma menlagaikhesik mel yagaisasikhe: ”Hit yoma hinendawimo nen he, eberogoat iluk anggigi'lek hinendawimo pugat yoma ri! Allah nen an nebe arat nelugetnafemo were'ma, it ekhe nen ineilenggen neagasik yagahisa wagaikha meneat he, hinendawimo nen eberogoat iluk anggigi'legat welagep yoma ri!” iluk wenagisasikhe.

MATIUS 26:24

An abat ta'lasi wagagi a'nogo, hilingisigin mene lisu palek werek higithogoat hilingisigin meneat he, at ap nebe noasuageluk yonggo lagain mene andi nek he, Eigo. Mondok weagat asigin o. At ap andi ta'la'lep le'ma re, fanoat logoilep mene,” iluk yagaisasikhemo,

LUKAS 24:24

Nen, nit ninagaila'lak fena oumo warek fagaba andi ha wagaikha mene re, ebe legen he, hemi yaganisa lagaikha a'nogo eberogoat higi, iluk, Yesus ebe ineilenggen higi'lek lagaikha aro,” iluk Yesus yagatukwa.

YOHANES 5:39

Hiren anggikhi logolik, nineluk mondok logogun he, Allah ane lisu palek fisogo welago yibaat logogun o, iluk lisu palek andi fanorogo futfikhi lagep meneat he, lisu palek andi, an nebe fut nobagauwageluk palhukwama werek kwelegat he,

1 KORINTUS 15:3

Wene an attak wanhigi mene, hit hobuk yagahisasigi andi re, ebe mel anggigi. Nit weak hilingiti lagagu mene faget, at Kristus ninenggi elugun oba wasugun iluk lisu palogo fesukwa higithogoat ebe watukwa andi.