LUKAS 16:23 - Allah Wene Fano Wene Hupla Inane

²³ Nen, ebe re, wa'la'luk lagaikhare'ma andoma lagaikhesik mondok weagat logolik he, elokhe hebekhogo liakhasikhe re, Lazarus Abraham era'lu were'ma eilenggen liagisasikhe.

LUKAS 16:23 Referans Kwoze

2 PETRUS 2:4

It malaikat Allah nen yonggo pelakfisa wagarek mene ekhe weak hilingitukwama Allah nen herakfisigi'lek, we, wene hobuk inoba feigeluk he, o mum wea'ma inenggi hele warek logouwageluk pelakfisasikhe andi.

MATIUS 23:33

Hit kisu nen tagongge mene hinebe kisuat welagep yoma ri! Afuni Allah nen wene inoba fembik endu ai'mo hokhorogo lakfisugunem hit heise wulibugun nogo? Elo'lego.

MATIUS 18:9

Nen, hineilenggen nen weagethinabu hak hilinglaga halok he, fena hemelogo lakfisaluk, hineilenggen fena nek logolik ineluk mondok logogun oba andoma kumo fano. Hineilenggen pireat were'ma endumo lakhinobagaumo weago. Halok he, fena hemelogo lakfisano,” iluk yagaisasikhe.

MAZMUR 9:17

At Tuhan ebe weinam aga logolik he, Aren wene mondok katokhogo palherek andiba, it afuni weak hilingitarek mene re it inonggwaregen hilingituba ambisangma saburagarek.

WAHYU 20:10

A'nogo nunggu kwelek, at mene olomene hangge a'nogo inom, at ekhe nen, ”An Allah ane yagaisikhi lagi,” iluk eranen lalinaferek mene a'nogo inom, i laut endu mene yenggele'ma hendali al hangge amben weak mene enu belerang inom endu amulok nunggu mondok welagare'ma andoma hambokhogo pelakfisasikhe mene a'nogo andoma were'ma, Iblis a'nogo hobuk inoba hambokhogo pelakfisikhemo inom andoma logolik, linggene hubanggo heinet wato mondok-mondok logogun isigi.

MATIUS 5:29

Halok he, heilenggen ebekwe nen weagethabu hak hilinglaga halok he, hemelogo lakfisano. Hebe abirengge endu ai'mo lakhobagainogo nen he, hemelogo lakfisaluk fenakwe nek logoumo fano.

MATIUS 5:22

Mene re, an nen wene ekhe yi yagahisak. Hat sa nen hagailak faget ha'mage lagagu halok he, wene ekhe hoba fagain werego. Nen, hat sa nen hagailak ekhe yagati logolik he: Hat he, hebe kembu yi re! iluk ugu halok he, it ap wene ero pilingitare'ma andoma wokharek laluk, wene hoba fogoin aro. Nen, hat sa nen: Hat he, hendawinggen mondok lek yi ri! Iluk ugu halok he, wene hoba fuluk endu amuilo'ma andoma lakhobagagin o.

YESAYA 14:15

A'nogo anggikhi lagagin oba nen he eberogo mene re kweangma ap wa'la'luk lagaikharek oba fem a'ma ma'lima pilagendik welagen andi.

YESAYA 14:9

Kweangma ap wa'lagaikharek mene omanogo nen ap raja Babel mene a'nogo hondosuogeluk inanggilukhogo weri'lagwi o. A'nogo wagunem o attak o kweangma yoma inomame hokho mene logolik ferinarek welagaukwa mene omanogo inaheimengge inabologetik, nen it ap raja-raja attak ferinarek welagaukwa mene inaheimengge omanogo nen ogore it inebe hurek werek oba omanogo nen menlagik, ili'lagwi.

1 KORINTUS 15:55

”Wa'lagaikharek ero yi, homame ki. Haigen libilinafi lagen a'nogo, haik anini ki,” iluk isikhemo wene lisu palogo fesukwa mene andi ebe asigin o.

MATIUS 11:23

Nen, hit afuni o Kapernaum mene yi hinendawimo nen he, Allah nen pogoroba liak ninobagambik esinet ninobagagin, iluk fogerakhikhi lageba? Mondok lego. We, afuni wa'la'luk lagaikhare'ma andoma mondok pelakhinobagagin o. Afuni nen hilingisu lek mene an nen elalinat hit ninom logolik hilingiti lagi a'nogo o Sodom andoma hilingiti logoilema re, it andoma inebe lek agi'lek yogondak ya mondok hundigat logoilebo.

MATIUS 8:29

inane hokhorogoat mel yagatukwa: ”Allah amlogo yi. Haren he, nit ninggi'nogo hilingninabigeluk wagen. Nit ninoasigin oba oan werek kwelegat he, hat tak ninoasigiluk wagen yoma ri!” iluk yagatukwa.

AMSAL 15:24

Ap hebelek mene re ebekwe liabek inelugerinaferek meneba lagagarek, oba nen he ebekwe wa'lagaikharek meneba pelabek pagarek lek.

AMSAL 9:18

It he andi nen wolinafunem lagaikharek mene andoma re he andi ambelemangge asugun a'nogo inonggothogo lagunem andoma nen inebe nalasi lagaikharek, nen it fena he andi aiba kwi lagaikha mene re yogondak he inebe afuni wa'la'luk lagaikhare'ma omanogo asi lagaikhasik werek.

AMSAL 7:27

Hemi ariginik mene andi inaiba logoin halok he, wa'lasugun nen iluk kwe horok meneba herakhilik logoin andi.

AMSAL 5:5

A'nogo were'ma, hat hebe lisogo wokharek kweangma afuni wa'laluk lagaikharek oba pelakhabumo re, andoma pilambik ebekwe wa'lasuogeluk lagaikharek oba andoma kwi lagain.

MAZMUR 86:13

Haren he hendawi hundik mondok hokho meneba hilingnafu welagenma a'luk he, an neluk a'nogo wa'lagu mene ambelema nen ogalnobagegen.

MAZMUR 49:15

Inanggo wasuogoluk anggomo palogo fisogo welagaikharek higit, it andi re a'nogoat wa'lasugun o. Wa'lagaikhare'ma andoma woginarek lagain. A'nogo meneat he, it fano hilingitarek mene re o hubet werek kwelek inomame asimbik it andi mabenetfisamo, inebe warek he afuni wa'la'luk lagaikharek oba andoma fili asugun o. It inaiba fano logogun oba omanogo herakfisaluk yatmaat asi lambik andomaat logogun.

LUKAS 16:24

Eilenggen liagisasikhesik, ane hokhorogo mel yagatikhe: Abraham neisena e! An endu aik hokhoma yoma heinet hokho wati lagi yoma hendawi nean o. Lazarus nen enggi tum ima pelakfembigen, i magaisogo re, nameliba sakho uageluk, fei wesuageluk yagasin o, iluk yagatikhemo,