IBRANI 4:2 - Allah Wene Fano Wene Hupla Inane

² Wene fano wene andi it attak yagaisasikhe andi hagat, nit a'nogo yaganisasikheat. Mene re, wene yagaisasikhe mene andi, it inesanggo holhukwasigat he, futfigi'lek hilingiti lagaukwa andiba, wene andi it faget he, elo'lek agaikhe andi.

IBRANI 4:2 Referans Kwoze

1 TESALONIKA 2:13

Niren wene Allah ane a'nogo yagahisasugumo, hiren he, ”Wene andi afuni inane mene lego. We, Allah ane aro,” iluk wanhigip andi re, eberogoat Allah aneat wanhigibo. Andi nen nit kamo igi'lek Allah hai wato mondok welago. At Allah nen hit hinendawinggen Kristus oba himbiret fesigip mene halok hinendawimo kagalhu mondok welagarego.

IBRANI 11:6

Afuni inendawinggen Allah oba himbiret figi'lek halok he, at endawimo fanorogo hilingisugun mondok elo'lego. Nen, at oba wesuogeluk halok, iren he, ”Allah eberogoat werek,” iluk anggigik, ”At ebe inelu asuogeluk hilingisugun halok, aren onggo ebe mene wogisikheregat,” iluk anggigik, ugun andi.

IBRANI 3:12

Halok he, nerugwi nagaila'lak. Hit ekhe hinobabut weak a'luk, hinendawinggen Allah eluk mondok welagarek mene oba himbiret figi'lek logolik, at ebe herakfisaluk hinambotkwe wulibi lanogo iluk, hinobabut hebelogo logoino o.

1 TIMOTIUS 4:8

Afuni inebe faget mep elukhogo inenggingge wanharek andi, yogondak ya elama faget endebat fano hak hilingitarek. Meneat he, ninendawinggen faget Allah awe a'ma logolik, at eabu wanhi logoumo, at Allah nen he, ”Yogondak hineluk welagep mene faget inom, hobuk hineluk mondok logogun mene faget inom, fano mondok asigino,” iluk, abok yaganisasikhe andi eberogoat.

ROMA 2:25

Hit he, wene Allah nen komotninafikhe wene a'nogo hologo hilingiti lagep halok he, hinagap hinenggalimo mene palhi lagep andi re, fano mondok ugun. Meneat he, wene andi hologo hilingiti'lek halok he, hinagap hinenggalimo mene palhi lagep andi alemarogo palhi lagep andi nen he, palek lek mene hak welagebo.

KISAH PARA RASUL 13:46

A'nogo isukwa meneat he, it Paulus Barnabas emberegat inailo lek hogoat logolik he, mel isukwa: ”Allah ane andi hit tak yagahisa hagat yagahisa wago meneat he, hit hinabiren herakfisikhi lagep, hinonggwaregen he, nit nabulal-habulal hilingninabigin he, ninabiro, iluk u hagat ikhi lagep andi nen, nit nineisena Allah nen ninayonggo fikhi logolik yaganisasikhe hagat hilingisugun. Aren: An nen he, afuni endakwe mene selegerinafik, o wurep oba werek mene telinafik, igeluk he, esage ibilik hangge, hit hinebe heragaisogo menhinobagagi o, iluk yaganisasikhe higithogo, hebekhogo it afuni endakwe mene yagaisa logoin o,” iluk yagaisasukwa.

YAKOBUS 1:21

Andi nenat, yi weak ti weak inenggali lek hilingirik nikhi lagep mene andi herakfisigik, weak hokhorogoat hilingirik nikhi lagep mene andi herakfisigik, ikhi logoino o. Wene fano wene Allah nen hinendawimo awi yagaisogo fikhe mene andiba elok telhinabigin andi nen he, at awe a'ma kuluk, aren wene hinendawinggenma kagali'logo mene andiat wanhi logoino o.

IBRANI 4:6

Omanggum he, iren fano wene andi inesanggo holhukwasigat he, hologo higithogo hilingiti'lek andi nen, Allah nen he, ”It set walogoin,” isikhe andi, set ebe waligi'lek. Andi halok he, it afuni hunogoat mene ekhe elok set walogoin, iluk futfogoin o.

1 KORINTUS 13:3

Yi mene ti mene an nenggim mene mondogat afuni inagarek lek mene sumburisigik, nebe mondok warogo endu noageluk neranenat igik, ikhi logolik meneat he, afuni ekhe inebe nendawirogo logogin lek halok he, we, tulemat alemarogo ikhi logogin o.

1 PETRUS 1:12

Heinok wanhunem, at Allah nen he, ”Wene andi re, hit hinonggwarek faget he, lego. It hobuk oan mene faget hilingiti lagebo,” iluk hit fagerat isikhe. A'nogo yagaisasikhesik welagaikhesigen, hobuk Allah Areagun pogoroba nen pelakfei wagaikhemo, it ap fano wene Yesus Kristus hilingitikhe wene a'nogo yagahisoageluk hinanggele'ma logolik yogondak fakhogo yagahisili'lagwi ebe andi faget ikhi lagaukwa andi. Wene andi, it malaikat Allah nen yonggo pelakfisa wagarek mene omanogo nen he, ”Eige, nit wene andi furogo ninelu a'lo e,” iluk anggagarek.

1 TESALONIKA 1:5

Nit fano wene waluk yagahisa wagagu a'nogo re, ninaneba nek yagahisikhi lagagu fuk. We, Allah Areagun a'nogo ninendawimo logolik, omamerogo lebetnisugu kwelek, ninendawimo nen: ”Wene yi eberogoat,” iluk ninendawinggenma futfesugusigenat yagahisikhi lagagu andi. Nit o andoma ninom logolik, hit fagerat hilingiti lagagu a'nogo hineluaro.

GALATIA 3:8

Attagat wene ebe a'nogo oan hilinglagi'lek werek kwelegat, it afuni endakwe mene inendawinggen Allah oba himbiret fugunem, aren he, ”Wene hinoba mene korogo wokhaluk ninom hobuk hinambotkwe hunogo hinobagagin o,” iluk, wene fano wene oan yagaisigi'lek logolik, Abraham tak wene abok mel iluk yagatikhe: ”Yi afuni ti afuni mondogat an nen fanorinabigin andi, ero hararo,” iluk isikhemo, lisu palogo fesukwa.

GALATIA 4:13

Attak an noba ou wanhigi andi nen fano wene yagahisasigi a'nogo hineluaro.

KISAH PARA RASUL 3:26

Allah nen he, wene andi waretikhe hak, hit weak hilingiti lagep mene hinebe lombok hinambotma herakfisoageluk amlogo ebe fanothinabigin mene hit tak hinoba pelakfei wagaikhe andi,” iluk komorinafikhe.

ULANGAN 1:32

An nen a'nogo iluk yagahisasigi oba nen ogore hiren hineisena Tuhan Allah oba hinendawinggen himbiret figi'legat welagagip.

ROMA 3:3

Mene re, it afuni Yahudi mene it fena wene andi hologo logolik inobabut humbunhogo hilingitarek lek andi nen ninggi'nogo hilinglasigin anggegep? It inobabut Allah ane hologo logolik humbunhogo logou lek andi nen he, Allah obabut humbunhogo hilingiterek mene andi lek a'luk obakhe nene hilingisigin anggegep?

GALATIA 3:2

Wene Allah nen komotninafikhe wene a'nogo higithogo hilingiti lagagip andiba Allah Areagun wokhisasikhe a? Athe, niren fano wene yagahisasugumo holhigipsik he, ”Eberogoat,” iluk hinendawinggen Kristus oba himbiret fesigip andiba wokhisasikhe a. Wene misigat andiat yagane'ni o.