HOSEA 12:2 - Allah Wene Fano Wene Hupla Inane

² Yi'nogo ti'nogo ap Israel mene nen huberen pikhit hubanggo hilingiri'lagwi mene andoma re, alomarogo nek hilingiri'lagwi, obaburugwi re sogoi timur fikhiren furogo legetfikherek hak hilingitik, inobabut haferogo nek inaniniba hilingitarek mene andi it inanggele'ma nen hokhoabet fili'lagwi. Iren he it afuni Asyur mene inom sebe'luk, ninom hundik logouwogo iluk wene wat-wat uogeluk enegengge re minyak wokhagaresik o Mesir logoin iluk hilingiri'lagwi,” ikhe.

HOSEA 12:2 Referans Kwoze

MIKHA 6:2

Hit tom inom kweang huli werek mene inom, Tuhan nen wene hinoba hikhibet hisageluk ili'lago mene andi holini o. Allah nen he againafuri Israel mene unggum inoba fagain iluk hilingiri'lago andi.

HOSEA 4:1

Tuhan he, afuni o yi werek mene inom wene werego. Enggere Israel mene yi sani, Aren ane ikherek mene andoma furogo holhi logoni o, ”O kweang yiba re tiphogo hilingitu mene inom, inendawi hundik hilingitu mene inom werek lek. It afuni oma werek mene nen ogo An Allah iluk eberogo inambeba nen fageri'lagwi mondok legat.

YESAYA 10:6

It afuni An nagainafuri mene An inambot wo'ne'luk lagaikharek mene inom, na'mage kwelafarek mene inom andoma inoasuageluk An nen Asyur lakfei wesigin o. Nen, afuni An nunggulenu mene andoma inangge hugul heligik, hinakhigik, nen kweang age ebekhe kwe were'ma sebelisagarek hak, sebelisigik, hilingisuageluk An nen Asyur lakfei wesigin o,” ikhe.

GALATIA 6:7

At Allah lalfalhogo yagasugun nogo? Mondok lego. Mene re, ”A'nogo yagasugun elogat,” iluk anggogoin halok, hinonggwaregen lalogoin o. Afuni nen yi mene ti mene awi yatarek mene, enggen andi meneat wurik agunem, ebe palharek andi hak,

MATIUS 16:27

An abat ta'lasi wagagi a'nogo re, hobuk neisena fogeratu mondok welagaikharek andi hagat hilingla'luk, it malaikat Allah pogoroba nen yonggo pelakfisa wagarek mene omanogo ninom wesimbik, andi sambul he, afuni mondogat inobabut lombok hilingitarek mene higithogoat onggo wogisa wesigin o.

HOSEA 8:13

Iren An noba wam warogo wo'netu aplere mondok inagaiyek. Nen wam a'nogo eino palek he it nili'lagwi, oba nen An Tuhan nen he iren a'nogo warogo fei weri'lagwi mene andoma re mondogat nabit. Yogondak he An nen it inaweak hilingiri'lagwi mene andoma eberek logolik he it inaweak onggo unggum inoba fagain o, An nen it inebe inambotkwe sugulogo o Mesir lakfisagain.

HOSEA 4:9

Ma re, afuni inoba enggin-fenggin hili'lagwi andem higit he hirogo a'nogoat hogoin o! Nen hiren hilingiti lagep andem higithogo re An nen unggum hinoba wokhisagain aro.

HOSEA 2:13

Aren An noba onggorasimbik, ninhup-nanhup amben fano mene tugwi kembu Baal andi faget enek noletik, alilingge fano mene waganogo ap inom nikharek mene andi heraginabi lagik, ikherek andi nen he, An nen wene at oba fagain o, iluk An Tuhan nen nane arat igi,” iluk ikhe.

YEREMIA 25:31

At ane ugu mene re o kweang wurep-wurep andoma mil esi lili'logo. Tuhan nen he yi afuni ti afuni inunggulenu lombok inoba wene paligiluk hilingiri'logo, Afuni mondogat wene inoba figik, kotik imbik he, ap inanini mondogat weak mene re unggum wogisagain,” iluk ugunem higi.

YESAYA 59:18

Aren aselei mene omanogo iren hilingitarek mene andoma higithogo unggum wogisagain. Nen, inunggulenu mene i alonggen kwe yatkwe welagaikharek mene ogore Aren unggum wogisagain mene andiba nen wulibugun mene ekhe werek lek.

YESAYA 24:21

O andi sambul Tuhan nen he it pogot tulem oma inomame welagaikharek mene inom, raja-raja kweangma welagaikharek mene inom, unggum wogisagain.

YESAYA 10:12

Oba nen Tuhan nen ikhi logolik he, ”An nen punu Sion oba inom nen o Yerusalem oba inom hilingiti lagi mene andoma mondogat neilenggen hambik he, An nen ap raja Asyur mene andi winik-wonok ikhi logolik onggwarek legeisogo fakhili'lago mene andi unggum wogosigin o,” ikhe.

YESAYA 3:11

Oba nen ap inaniniba nek hilingiri'lagwi mene andoma re, iren afuni amu mene inoba hilingfisili'lagwi andi hakhogore it inoba ogo a'nogo hilingfisagain enggere inaplurogo logouwak.

HOSEA 9:9

Hiren hinobarogo mondok hokho mene fikhi lagep mene andoma re, afuni o Gibea mene nen hilingiti lagaukwa hakhogo hilingiti lagebo, ma re hit kwanirogo hilingiti lagep mene andoma Allah nen ebethambik he, hinaweak oba unggum wokhisagain.

HOSEA 7:2

Iren ina'mageba hilingiri'lagwi mene andoma faget An nen eberisagain mene a'nogo inendawimo eberi'lagwi lek. Oba nen he it inaweagen sebelinafunem An nen weinamat isikhi lagi.”

HOSEA 9:15

Tuhan nen ikhi logolik, ”Iren weak mondok hokhorogo hilingiri'lagwi mene andoma re, o Gilgal en eroratukwa. A'nogo hilingitukwa andem huli nen An nen it inoba nabit anggugu mene a'nogo eroratigi. Nen, iren ina'mageba hilingitarek mene andi nen An nen o An nanggweang oba yoma nen mugisogo wulaginabigin, An nen it inoba nendawi hundik hilinginabigin lek; it inogogwi ferinarek mene andoma mondogaren he, An nane oak sagalogo mondok hilingiri'lagwi.

AMOS 2:4

Tuhan nen ikhi logolik he, ”It afuni Yehuda mene re hundik-handik weagenek hilingitu weregen he, An nen eberogoat unggum inoba fagain o. It he An nen nane yi'nogo hilingi'no ti'nogo hilingi'no iluk yagaisikhi lagi mene taganetfigik, An nen yagaisikhi lagi mene a'nogo futfigi'lek hilingitik, hilingiri'lagwi. It he it inombawi nen kembu ilah amu mene apne wanhi lagaukwa mene nineisena ebe yi aro iluk, fogerari'lagwi andiba inebe lalinaferek andi.

2 RAJA-RAJA 17:4

Oba nen linggene ekhe sambul Hosea nen raja Mesir agun hun enu So a'nogo nen lebetneoageluk lisu palogo oba lakfei lagaikhe. A'nogo lakfesikhemo aren hun Asyur meneba onggo fei laga lagaikhe mene a'nogo re palfesikhe. A'nogo hilingitikhemo Hosea nen hilingitikhe mene a'nogo re, at Salmaneser elu agaikhesik Hosea a'nogo hele warogo afuni inenggi hele warogo fisagarek oba omanogo kwelakfesikhe.

MAZMUR 78:36

Oba nen he, iren At oba henarogo nek hilingitu logolik, it inane ugu mene ogore ineranhogo wene nek ikhi lagaukwa.

PENGKHOTBAH 5:15

Andi re inendawinggen mondok heiselu hak! Nit logoin aple andi re yogondak wagalago yi hak hilingi'mo re, nit set hoporogo sogoi faget murok laga lago mene andoma re, ambisangma ki mene weinam asigin iluk nogo?

YESAYA 30:6

Tuhan nen wam higit mene abel selatan fikhit weregengge andoma faget he yi'nogo uageluk ikhe, ”Ap yonggo lakfisagarek mene andoma nen keledai inom, unta inom amboloba re inangge yi mene ti mene inagaiyekhogo iluk wogisagarek mene omanogo liak fuluk waluk he o inailorekwe inom, nen kisu aik palinaferekwe inom singa werekwe inom, nen kisu racun mene werekwe inom naga agerabul werek mene werekwe inom, andoma logoin o. Laga logolik he hinagaiyekhogo iluk mene andoma re iren inunggulenu it leberisa elo'lek mene andoma inoba wogisa logoin.

HOSEA 7:1

A'nogo isikhesik Tuhan nen ikhi logolik, ”Hundik-handik An nen nagainafuri Israel mene inebe fano hilinginafik, inambotkwe pugunhogo fisigik, hilingisigin iluk hilingitu sambul aremnogo isikhi lagimo re, weak hilingisugun mene inom, inaniniba hilingisugun mene inom enek hilingiri'lagwi. Iren he, ineranhogo wene lalalengge hilingitik, afuni inaiba yogot hinasi kwigik, ebekhe kwe nen telogo heligik, hilingiri'lagwi andi.

HOSEA 7:11

Israel he, sue yalma mongol mene nen lagik wagik ikherek hak hilingiri'lagwi. Attak he iren Mesir mene nen lebetninapni o iluk kino lagaikha. Andi nen hobuk he Asyur mene nen lebetninapni iluk yagaisa lagaikha!

HOSEA 8:9

Linggene keledai maro mene nen kwanit hikherek hak Israel mene re inendawimo nen anggaluk enek hilingiri'lagwi. Iren he Asyur en lebetninabuageluk heraginabik lili'lagwi, nen inunggulenu amu mene inoba ninom sebesuogen iluk onggo palinabi'lagwiat.

HOSEA 8:10

Oba nen An nen it inebe andogorogo fisambik unggum wogisagain. It inebe raja Asyur mene nen alperelinafunem he we horok yogondak arem obaat ouen heinet wasuogeluk werek.