FILIPI 2:12 - Allah Wene Fano Wene Hupla Inane

^12-13 Nerugwi nagaila'lak. Hinebe nendawi e. An ninom logolik, nane hundik-handigat ugunem hologo hilingiti lagagip andi hagat an yogondak nebe weat werek kwelek, nane andiat esinet fuluk he, hologo mondok hilingiti logoino o. At Allah nen, hiren hilingiti logobagaigeluk, hinendawinggen wenggelogo hilinghinafunem, hit hinendawimo nen he: ”I, nit a'nogo hilingiti logou ninamolo,” iluk, Allah endawimo amolo mene hilingiti lagep andi nen, at ebe hinailorogo hinoak elekwe lei'leik ikhi logolik: ”Aren telninabigin,” iluk andi fagerat hilingitu mondok logoino o.

FILIPI 2:12 Referans Kwoze

1 KORINTUS 15:58

Andi nenat, nerugwi nagaila'lak. Hinebe nendawi e. Hinendawinggen en wurikhogo, hambukhogo logoino. Ninoe Enupogot ninom hundik logolik he, at faget yi mene ti mene hilingitunem alomat lasigin lego, iluk, hundik-handik ninghogo hilingitu mondok logoino o.

IBRANI 4:11

It attak Allah ane hologo higithogo hilingiti'legen, set waligi'lek andi hak, nit ekhe it inobali'mo set walogo lek hanogoluk, ninomamerogo hilingiti logouwogo.

1 PETRUS 2:11

Nerugwi nagaila'lak. Hinebe nendawi e. Hit hinebe ap pogat afuni inawilokwe pugulogo laluk andoma logolik he, yi mene ti mene hinendawimo nen kagalogo lagai wagunem, hinendawinggen en nunggunem namolo anggikhi lagep mene andi re, selei mene nen inoatarek andi hak hinebe weagethinabigeluk, hinendawimo nen kagalogo lagai wagarek mene andi herakfisikhi logobagaigeluk yagahisikhi lagi andi o.

MATIUS 11:29

An nasungge kwalek su a'le sakhore'ma re, fano kwalogo wokhisamo se weagat hogoin andi nen he, hinomoloba waluk, an nobabut enago logolik inawe a'ma hak welagirek a'nogo furogo yagaisilik nikhi logoino o. A'nogo nikhi logogun halok, hinendawinggen hambuk igin o,” iluk yagaisasikhe.

FILIPI 1:27

Wene fano wene Kristus nen hilingitikhe wene a'nogoba: ”Yi'nogo hilingiti logoino o, ti'nogo hilingiti logoino o,” iluk yagahisagarek meneat hilingiti logoino o. A'nogo hilingiti logolik, hinebe lambulogo hilingiti logoumo, it afuni ekhe nen hinabok ikhi logolik he: ”It inobabut he, fano wene yagaisugunem holi'lagwi higithogoat inendawinggen Allah oba himbiret fuluk ninghogo mendek werego,” iluk, an nebe yatma were'ma yaganesugun hea? Hinoba wesimbik neilenggen hisagain hea? Wene Fano wene yagahisogorek hak, hinom lambulogo logolik, weim yafi logolik ninghogo yafarek hak, wene andi faget ninghogo hilingiti logoino.

YESAYA 66:2

Yi mene ti mene mondogat oma re An nenat elalogo fesigimo werek. Andi nen he An nendawimo namolo re, afuni inendawinggen sebelfakhaluk, weak hilingitarek mene herak fisigik, An noba inailorogo welagik, nane hologo hilingitik, ikhi logogun andiat namolo welagirego,” iluk ikhe.

2 PETRUS 3:18

Ninoe Enupogot telninaferek mene obabut fano a'nogo nen wo'nisikherek mene andi wanhik, ebe hinelu agik, ikhi logolik he, hinendawinggen wurik a'luk logoino. Yogondak ya inom, hobuk inom, at Yesus Kristus alegat fogeratu mondok logouwogo, iluk, ”Amin,” igi andi.

IBRANI 5:9

A'nogo yanggulhi logolik, wurep kobokhogo hilingitikhemo nit at ane hologo logogun mene halok ninebe mondogat nineluk mondok-mondok logouwageluk at ebe telninaferek mene ero hilingisogo fesikhe andi.

2 TIMOTIUS 2:10

Andi nen he, it afuni ekhe Allah nen wenaginafikhe mene halok, Kristus Yesus inom hunisumo inebe telinafik, ineluk fano mondok logouwageluk fanorinafik, uageluk he an a'nogoat weagetnafu kwelek nafe morogo welagirek andi.

AMSAL 13:4

It afuni ekhe yabu hilingisu inaberali mene andi, inendawimo nen yi mene ti mene inamolo anggagarek meneat he, ebe misik iluk ogo ekhe helagarek lek. Nen, it afuni ekhe yabu inomame mondok hokhorogo hilingitarek mene andi nek he, yi mene ti mene inendawimo inamolo anggagarek mene andi, higithogoat helagarek.

IBRANI 4:1

Andi halok he, Allah nen againafuri set waloageluk abok yagaisasikhe mene andi lek agi'lek werek kwelek hobuk nit set waloageluk wo'nisagain oba andoma hit ekhe kwigi'lek kamo inogo iluk hinailorogo logolik higithogo hilingiti logoino o.

IBRANI 12:1

It afuni attak hilingirik wagaukwa mene inabok ilik wago andi, inebe esa hokhorogo ninera'lukwe yiling-waling ineilenggen kwelakninarek werek andi nen he, sa awewerek-sa awewerek louwogeluk yi mene ti mene inoba enggin mene korogo fuluk lagaikharek andi hak, nit ninoba enggin-fenggin welagarek mene andi inom, ninobabut weak hilingitorek mene ninoba laberek mondok welagarek mene andi inom, mondogat korogo herakfisaluk, Allah nen, ”Huli yi huli lano,” iluk yaganisasikhe andi, ninendawimo nen he, ”Ninelokhoma pikhit huli andibaat louwok,” iluk, ninomamerogo laga logouwogo.

FILIPI 4:1

Andi nenat, nerugwi nagaila'lak. Hinebe nendawi e. Ninoe Enupogot hinom hundik logolik ninghogoat logoino o. Hit hinobabut hilingiti lagep oba an nendawimo nagaiyek anggigik, fogerakhigik ikhi logolik, hinoba we'luk nebe ninom logoilo e, iluk, anggikhi lagi.

ROMA 2:7

At Allah nen he, it afuni fena nen inebe fogerinafarek mene inom, agaugwerinafarek mene inom, fili agarek lek mene inom, eise asuogeluk inafe morogo logolik inobabut higit hilingitarek mene halok, inebe ineluk mondok logouwageluk hilinginabigin.

1 TESALONIKA 1:3

Nineisena Allah eilhanem samban a'nogo ikhi logolik he, hit hinendawinggen Allahba himbirik logolik hinobabut hilingiti lagep mene inom, afuni ekhe hinendawirogo logolik hinomamerogo leberisikhi lagep mene inom, hinendawimo nen: ”Ninoe Enupogot Yesus Kristus nen fano hilingninabigin,” iluk hinafe morogo welagep mene inom, niren hit hilingiti lagep mene andi faget hinoba kamo igi'lek eberek mondogat welago.

FILIPI 1:29

At Allah obabut fano nen, hit hinendawinggen Kristus oba himbiret fouwageluk enek hinayonggo fesikhe fuk. Lego. At faget yi enggin ti enggin hikhi logouwageluk hinayonggo fesikhe aro.

MAZMUR 119:120

Hat hoba nendawimo ailo agunem he noak leigeti lagi, wene Haren tekhogo ikhi lagen mene andoma faget an he nailo nek ari'lago.

MAZMUR 2:11

Tuhan ebe hinailorogo logolik, At faget enek hilingiti logoino o.

2 KORINTUS 7:15

Aren hit hinebe endawi welaga meneat he, ebe hinoba wagama re, hinailo agik, hinoak lei'leik igik ikhi logoligat at ebe wanhepsik, aren yagahisugunem ane hologo hilingitep mene andi hinoba ebethinafi logolik he, hit mondogat hinebe mondok endawithinabi'logo o.

1 KORINTUS 2:3

Nendawimo a'nogo anggasigisik ebeti logolik, an nonggwarek nebe lebelegatma nailo nen noagelekwe lei'-leigat hinoba wagagisik welagagi anggigi.

EFESUS 6:5

Hit afuni inamingmingengge mene nen he, Kristus ane hologo hinendawinggen misigat hinailorogo logolik hilingiti lagep hak, hinogogwi kaindek inane hologo agaukhogo hilinginafi logoino.

YESAYA 66:5

Yago, hit At awene melalek faget inailorogo welagik, ane hologo hilingitik, hilingitu welagep mene yoma sani, Tuhan ane ikhe mene hologo hilingiti logoni o. Hit hinendawinggen An noba himbirik logolik tiphogo hilingiti lagep oba, hit hinunggulenu mene inanggele'ma nen inabithinafi logolik, hinom seberogo hilingitu aple ogore mondok inabit weregat. Iren hit hinoba li'not hinafi logolik yi'nogo ili'lagwi, ”Hit hinagaiyegen hilingitu mene andoma nit nineil hogoin nen he, Tuhan Omame Mondok hokho werek mene a'nogo inukhoago,” iluk ili'lagwi. Oba nen he it inonggwaregat inenggali asugun o.

AMSAL 10:16

Ap fano hilingitarek mene andi ambisangma re ineluk fano welagaikharek mene eise agaikharek, oba nen ap weak hilingitarek mene andi ambisangma re weak hokhorogo hilingitarek.

MATIUS 11:12

At Yohanes ima pelaginafi laga andi huli nen he, yogondak ya huli, it inobabut weak asialoksek mene nen, nineisena Allah nen awe a'ma fisikherek a'nogo inabiren mabenet fisuogeluk inomamerogo walhili'lagwi.

EZRA 10:3

Nit he haren komo wene yaganisagain mene inom, it Allah wene melalek yaganisugu mene a'nogo esinet fuluk hilingitu inaben inom, komotninabugun mene andoma niren higithogo nek hilingitik, At Allah nen wene melalek yi'nogo hilingi'no ti'nogo hilingi'no iluk werek mene a'nogo hologo hilingitik, hilingisugun en he, hemi andoma ineagwi inomat mugusogo wilaginabugun iluk Allah elokhoma nen hombuk paluok.

KISAH PARA RASUL 9:6

Hebe menla'luk he, o kota ari lambik kwino. Kugunem ap ekhe nen, hat yi'nogo hilingi'no, iluk yagahesigin mene werego,” iluk yagatunem,

FILIPI 2:19

Hit eroma hilingiti lagep mene faget, hinabok an nelu asimbik nendawimo fano asuageluk, nendawinggen ninoe Enupogot Yesus oba himbirik were'ma, aren lebetniikherek andiba, at Timotius a'nogo weak-weak hinoba lakfei wesigeluk anggikhi lagi.

1 KORINTUS 4:14

An nen lisu palhi lagi yi re, hit hinenggali wasigeluk palhi lagi fuk. We, hit hinebe an nebe nagainafuri mene hak nendawi logolik komothinafi lagi o.

FILIPI 4:15

Hit Allah againafuri o Filipi mene nerugwi nagaila'lak. Attak, an fano wene yagaisilik nikhi logoigeluk, o Makedonia nen wagunem he, Allah againafuri o fenakwe nen lebetniikhi lagaukwa lek meneat he, hit enek ninom hundik logolik, lebetniugunem helikhi lagagi andi hineluaro.

KISAH PARA RASUL 16:29

A'nogo yagatikhemo re, esage kino isikhesik he, fungusek oak lei'leik inoba kwisikhesik he, it Paulus Silas emberek inawe a'ma soma isikhe.

FILIPI 1:6

At Allah nen hit fano hilinghinabigiluk omanggum enggi fakhinobagasikhesik he, fano hilinghinafi logombigen, huli at Yesus Kristus wesigin andi sambul o eil hondologo wutarek hak, fano hilinghinabi wesigin andi eberogoat iluk, nendawinggen hambukhogo welagi.