DANIEL 4:17 - Allah Wene Fano Wene Hupla Inane

¹⁷ Nit malaikat Allah onggwarek faget tegelek logolik, kagalek welago mene nen wene arat tekhogo ogo mene re andi. Nit a'nogo ogo andi re, it afuni o kweangma yi awi ti awi werek mene nen he, Allah Enupogot yi mene ti mene enggiba welagarek mene andi nen he, ap inenupogot logolik ferinarek logouwageluk wogisikheresik, hobuk waganogo ap ekhe inebe yenggerugwi elo'lek meneat he, inenupogot logouwagaluk wogisikheregat higi, iluk inelu asuageluk a'nogo ogo andi, iluk ugunem yethigi o.

DANIEL 4:17 Referans Kwoze

DANIEL 4:25

Noe hat hebe afuni inoba nen mugusogo lakhobagaumo re, yi wam ti wam hinom o leimo andoma logogun. Andoma 7 tahun logolik he, wam sapi nen engga ninggerek andi hak ninggik, enda'ma leimo nogo igik, ugunem, hebene meiso henanggikil hoati logogin. A'nogo nugunem 7 tahun arat logombik enek he, noe haren, Ap inenupogot logolik, afuni ferinarek welagaikharek andi re, At Allah Lego Mondok welagarek mene enggiba welagare'ma higi. A'nogo enggiba logolik Aren, at andi hak enupogot logouwak, iluk anggikherek higithogoat inenupogot logouwageluk menfisikhere'ma, higi o, iluk hambeba nen fakhogo igin o.

DANIEL 2:21

Arenat ti sambul hibi asigin ti sambul salim asigin iluk inom, nen yi wene ti wene agarek oba asuageluk inom kagalogo fikherek oba hilinglagik, it ap inenu werek logouwageluk Aren liakfisigik, sebelfisigik, ikherek. Aren ogore afuni inendawinggen kagalek mene hilingfisigik, yi wene ti wene elok futfikhi logouwagaluk hilinginafik, ikherek.

1 SAMUEL 2:8

Afuni inangge lek mene mondok weak were'ma woginafik, hele warek hangge weak welagaikharek mene andi fikhalogo inenu werek mene inom fano hilingisogo fisigik, agaugwerinafi logouwageluk ineabu fano mene wogisigik, egendek. Kweang helage tik warek he, nineisena Tuhan mene andi nen he, kweang hat mene andiba loukhogo walhasiginmo welagarek.

1 KORINTUS 1:28

At Allah endawimo nenat he, afuni kweangma mene nen fogerati logolik esinet fagarek mene andi, legetfisageluk he, it afuni kweangma mene inendawimo nen he, ”It andi inebe re kembu, inabit mene, inenu re lek,” iluk anggagarek mene andi re, Allah nen wenagaisogo inayonggo fesikhe.

DANIEL 11:21

Malaikat a'nogo nen nekhengge ane ikhi logolik, ”Raja ombo'ne mene utara fikhit andoma faget menlasimbik ferinarek logogin mene andi re mondok sebelek mene raja menlasu re we elo'lek mene. Oba nen he at ebe ferekhogoat wesimbik ane nen lalogo raja logogin iluk menlasigin.

KELUARAN 9:16

A'nogo meneat he, yi mene ti mene inugisagarek andi hak, An nomame hoageluk, An nenu o yi awi ti awi loageluk, hinebe mondok hinoati'lek herakhinobagagi andi o.

YEHEZKIEL 25:17

An nen nanini mondok hokho mene inoba figirik welagi mene andiba unggum inoba engginhogo wogisambik enek he noba homo igin. A'nogo hilingfisambik An na'mage nen hilinginabigin mene a'nogo hikhi logolik enek he, iren An nebe Tuhan welagirek mene a'nogo inelu asugun o,” iluk ikhe.

YEHEZKIEL 7:24

Ap inunggulenu inanini mondogat weak mene re hit hinawi wuri'mo andoma kwi wesimbik logouwageluk An nen lakfisa wesigin. It ap inunggulenu andoma nen hiren wene kabogeti lagep oba omanogo mondok wolelenggenhogo fouwageluk An nen herakfisamo re ap hit mene inanini logolik hinebe hokhondek logogun meneba nen ogore inoak leigesugun.

YESAYA 6:3

A'nogo logolik it-it inane mondok hokhorogo ikhi logolik he, ”Horek mene, Horek mene, Horek mene. Tuhan Mondok Homame Hokho mene. Kweangma yikwe tikwe mondogat he Hat Homameba nek sagarek welagen o,” iluk fogerati lagaikha.

MAZMUR 9:16

Yi afuni ti afuni inunggulenu lombok Hat hebe inonggot mene re, it inonggwaregen kweang habul fakhagarek oba andoma pilagik, nen hele webet fakhagarek oba omanogo ke'nok igik, agarek.

1RAJA-RAJA 21:25

At Ahab Allah eilhanem onggwaregen ebe weak hilingirikhi logogiluk wenagaisogo fakhaluk weak hilingiti lagaikhe andi hangge afuni nen ekhe hilingiti'lek. At Ahab mondok weak hilingiti lagaikhe andi mondogat he, agwe Izebel en endawimo kagalhu kwelek hilingiti lagaikhe andi.

WAHYU 4:8

It andi inebe enggaminogo mene re, inebe lombok inogolabi falfaligen were'ma re, inomak abel endakwe inom, a'makwe inom, ineilenggen mondok hokhorogo welaga, were'ma re, inane kamo igi'lek, lingge hundik, hup hundik, Allah apne wanhi logolik he, ”Nineisena Tuhan Allah omame hokho mene, Attak tegelek welaga, Yogondak tegelek werek, Hobuk tegelegat logogin,” iluk fogeratu mondok welagaikha.

1 TIMOTIUS 5:21

Wene yagaheti mene andi, haren he afuni ekhe helokhoma fisigik, ekhe hambotma fisigik, igi'lek higithogo yagaisikhi logoino, iluk Allah inom, Kristus Yesus inom, ineilhanemat, malaikat Allah nen wenaginafikhesik yonggo pelakfisa wagarek mene inom, ineilhanemat yagaheti andi.

YESAYA 6:8

A'nogo yaganetunem Tuhan ane ugu mene an nen holhugunemen he, ”An nen ap sa ayonggo fembik lak fagain he. Nit ninane waluk lagu mene re ap sa asigin,” iluk ugunem an nesanggo holhirik an nen ikhi logolik, ”An nebe welagi yi o. Anat la'nobagain,” iluk igi.

MAZMUR 12:8

Ap weak hilingitarek mene re irenek yikwe-tikwe hokhorogo sagarek logolik, afuni inebe lombogen weak hilingitarek mene a'nogo faget fogeratu logolik enu liafu werek. Oba nen he nineisena Tuhan, nit he we Harenat fetninarek mondok welagenma re, afuni weak hilingitarek mene andi nen nit weaget ninobagai nogoluk Haren kagalninarek logoin o, neisena.

2 TAWARIKH 28:22

Enggin fenggin a'nogo hilingi'mo aremnogo re at Ahas nen Tuhan elokhoma weak mene nek hilingitu mene omanogo re ekhe inomat hilingitu welagaikhe.

ROMA 13:1

Hinogogwi kaindek pemerintah mene andi, ero alek mene fugo. Ero at Allah aro. Arenat menfisasikhemo kain welagaikharek andi nen he, hit hinebe lombok it inane hologo logoino o.

MAZMUR 103:19

Nineisena Tuhan ebe pogoroba logolik, yi'nogo hilingi'ni ti'nogo hilingi'ni iluk melalinafu were'ma, yi afuni ti afuni ekhe mene-ekhe mene mondogat he, at a'ma nek welagarek.

DANIEL 4:2

Allah lego mondok welagarek mene a'nogo nen, at ebe futfouwageluk hilingitik, elalin mene hilingitik, ikherek mene a'nogo nen an faget hilingite mene nendawimo namolo anggigirik yagahisagain o.

DANIEL 7:25

At andi nen ikhi logolik he, Allah Enupogot mene ebe mondok nabiro, iluk Allah onggwarek againafuri yi enggin ti enggin hilinginafi logogin. A'nogo logolik, Allah againafuri at Allah ane hologo higithogo hilingitarek mene andi inom, pesta Allah faget hilingitarek andi inom, hunogoat hilingisogo feigiluk walhagain. A'nogo walhikhi logolik, inebe enggi ferinarek 3 tahun inom tugi 6 en ekhe inom logogin.