Revelation 5:12 - Keley-i Bible (Antipolo Ifugao)

¹² Daka pan-eleta a-appeh da e kanday “Wada kelebbengan etan ni kameingngadnin Impah ni Kalneroh ni pintey dan menewwat ni et-eteng ni kabaelan, ya kinedangyan, niya laing. Ey lebbeng tu dedan ni melispituh, medeyyaw niya metbal.”

Revelation 5:12 Referans Kwoze

Revelation 5:9

Et ia-appeh da eya baluh ni a-appeh e kanday “Hi-gam hu wada kelebbengan tun mengella etan ni neludun ni papil ma-lat ekalen mu hu peket tu tep ya nemateyan daka hu neneklaan mun liwat idan tutu-ud kebebbebley e nambakbaklang hu nahlagan da, ya ehel da niya neitu-wan da et nambalin ida law ni tuun Apu Dios.

Revelation 19:1

Negibbuh huyya ey wada dingngel kun heni ngalan dakel ni tuud kabunyan e kanday “Daydayaw tayu hi Apu Dios! Hi-gatu hu kamedeyyaw, tep ya kabaelan tu niya hi-gatu kaumhelaknib.

Revelation 4:11

“Apu e Dios mi, deyyawen daka kumaddan, tep ya kasina-gey mu niya et-eteng ni kabaelan mu, tep hi-gam nanletun emin. Em, lintum idan emin eyan wadan nunya tep humman pinhed mu.”

2 Corinthians 8:9

Tep inamta yu hu impahding Apu tayun hi Jesus Christo ni nengipeang-angan tun binabbal tun hi-gatsu, tep anin ni wadan emin hu kayyaggud ni hi-gatud kabunyan et nambalin ni newetwet eman ni inlian tu eyad puyek et iketey tu liwat tayu ma-lat maila-kam itsud emin ni kayyaggud ni wadan hi-gatu.

Revelation 7:12

Kanday “Amen! Hi Apu Dios hu metbal, melispituh niya medeyyaw ni ingganah. Ey hi-gatu pansalamatan emin ni tuu tep ya kalinaing tu, ya kabaelan tu niya kasina-gey tu. Amen.”

John 17:2

Indawat mu kelebbengan kun man-ap-apun emin ni tuud puyek, ma-lat wadaen ku biyag ni endi pappeg tuddan tuun impangulug mun hi-gak.

Matthew 28:18

Neka-ihnup hi Jesus idan disipol tu et kantuy “Neidwatannak ni eta-gey ni saad et hi-gak hu ngenamung ni emin eyan wadad puyek et yad kabunyan.

Revelation 5:6

Entanni ey inang-ang ku etan kameingngadnin Impah ni Kalneroh di kad-an etan ni yuddungngan ni ap-apu e immehneng di nanggawwaan ida etan ni epat ni mategu niyadda etan aap-apu. Inang-ang ku hu liput tun nemateyan dan nunman. Pitu ha-duk tu niya pitu matetu e humman ida immatun ni Ispirituh Apu Dios e wada pitun kabaelan tun neitu-dak eyad puyek.

John 1:29

Yan newa-waan tu, ey inang-ang John hi Jesus e iyyallid kad-an tu et kan John idan tuu ey “Iyalli etan intu-dak Apu Dios ni kamei-ellig di Kalneroh tun mengkal ni liwat ni tuu.

Revelation 13:8

Emin ida tuud puyek ey daydayawen dalli huyyan heni animal ni anggetakkut. Ebuh idalli etan neitudek hu ngadan dad libluh ni kakeittuddekiddan tuun wada biyag dan endi pappeg tu hu eleg menaydayaw ni hi-gatu. Ya etan libluh ey neitudek et han maweda emin eya wadan nunya. Ya kanlibluh nunman ey ya etan kameingngadnin Impah ni Kalneroh e pintey dan nunman.

Revelation 5:13

Ey dingngel ku a-appeh idan emin ni wadad kabunyan, yad puyek, yad nandaul niyad baybay e kanday “Ya etan yimmudung di yuddungngan ni Ap-apu niya etan Impah ni Kalneroh hu lebbeng tu dedan ni metbal, melispituh, medeyyaw niya wada et-eteng ni kabaelan dan ingganah.”

1 Timothy 1:17

Et humman hu, hi Apu Dios e Patul ni endi laputu, endi pappeg tu niya eleg meang-ang, hu medaydayaw niya metbal ni ingganah. Hi-gatun ebuh hu Dios. Amen.

Sekariah 13:7

Kan Apu Dios e Kabaelan tun emin ey “Inah ka e ispadah et tewikem hu nakka pampattul e gayyum ku! Patey mu et maiwehit ida kalneroh ni tuka ippattul et pateyen kudda.

Revelation 1:6

Pinili daitsun mekilla-kam di nan-ap-apuan tu niya impambalin daitsun heni padin mengippahding ni pinhed Apu Dios e hi Ametu. Kayyaggud hedin hi-gatu man-ap-apun daydayawen tayun kenayun. Amen.

Revelation 5:8

Yan nengal-an tun nunman ni neludun ni papil ey nandukkun ida etan epat ni mategu niyadda etan dewampulut epat ni aap-apu di hinangga tu et daydayawen da. Wada singnged dan gitalah da niya mahukung ni duyun balituk e napnun insensoh e humman hu neiha-adan ni dasal idan tuun Apu Dios.

Revelation 6:1

Entanni ey inang-ang ku etan Impah ni Kalneroh e ingkal tu etan nemangulun impamket da etan ni neludun ni papil ey dingngel ku ehel etan ni hakey ni mategu e heni kidul tep na-let ehel tu e kantuy “Ikay.”

Revelation 15:3

Daka pan-ia-appeh hu a-appeh nan Moses e bega-en lan Apu Dios niya humman dama a-appeh ni meippanggep etan ni Impah ni Kalneroh. Kandad a-appeh da ey “Kaketngain emin eya dakel ni muka pehpehding, Apu Dios e Han-ipahding tun emin. Meandeng niya makulug ni emin hu elaw mu. Hi-gam dedan hu Ap-apun emin ni tuu niya hi-gam ali hu Ap-apun ingganah.