Revelation 3:8 - Keley-i Bible (Antipolo Ifugao)

⁸ Kantuy ‘Inamtak hu yuka pehpehding. Ey inamtak e kulang kabaelan yu, nem inenu-unnud yu hu nakka ittenuttuddu ey nanengtun nunyan hi-gak hu yuka kulluga. Et humman hu, imbeghul ku etan dellanen yun habyen ni endi tuun han-ilekbi tu.

Revelation 3:8 Referans Kwoze

1 Corinthians 16:9

tep dakel ida neminhed ni mengngel ni nakka ittenuttuddudya meippanggep nan Apu tayu, anin ni dakel ida buhul ku.

Colossians 4:3

Idasali dakemi anhan ma-lat baddangan dakemin Apu Dios di mi pengitenuttudduan eyan meippanggep ni kapenellaknibin Jesus Christo idan neliwtan e huyya eleg peamtan Apu Dios ni nunman, nem ay impeamta tu law et nak ituttuddu et huyya gaputun neikelabutan ku.

Revelation 3:7

Kantu pay ni hi-gak ey “Pantudek ka etan ni anghel idan kamengullug di Philadelphia et ehelen mu e kammuy: Huyya inhel etan ni kayyaggud ni peteg niya makulug ni Dios, niya nangnged etan ni alladdu lan David et hedin in-alladdu tu etan habyen ni dellanen, man endi tuun han-ibeghul tu. Ey hedin mewan imbeghul tu, man endi tuun han-ilekbi tu.

2 Corinthians 2:12

Yan dintengan kud Troas ni an mengituttuddun meippanggep nan Jesus Christo, ey inang-ang ku e indaddan Apu tayu etan ida tutu-un mengebbulut ni ituttudduk.

Acts 14:27

Yan nambangngadan dad Antioch ey inemung dadda kamengullug diman et e-ehhelen dan emin hu nemenaddangan Apu Dios ni hi-gada et ya nengipeamtaan tuddan Gentiles e dammutu daman mehellakniban ida hedin mengulug idan Jesus.

Philippians 4:13

Mukun kabaelan kun ennusan hu hipan meippahding ni hi-gak, ey tep tuwak kabaddangin Jesus Christo.

Luke 12:9

Nem hedin ya etan tuun menghel di edum tun tuu e eleg tuwak kulluga ey eggak ali dama ibbilang ni tuuk di hinanggaddan anghel Apu Dios.

Revelation 2:13

Inamtak e yad kad-an yu ey lawah idan peteg hu dakel ni tuudtan tep hi Satanas hu daka u-unnuda. Nem inamtak e nehammad hu yuka pengullug tep anin ni pintey da hi Antipas e hakey ni kameiddinnel ni kamengituttuddun meippanggep ni hi-gak et eleg kayu tumekut et eleg yu iwalleng hu yuka pengullug. Kayu kamelilligasidtan tep huttan ni bebley ey heni yadtan nambebleyan nan Satanas.

John 17:6

Impeamtak hu meippanggep ni hi-gam idan tuun impangulug mun hi-gak. Eleg ida la ni mengullug, nem pinutuk muddan mengullug ni hi-gak. Tuum ida dedan, mukun nengulug idan hi-gak niya impaka-u-unnud da tugun mu.

Revelation 3:15

‘Inamtak ni emin hu yuka pehpehding. Heni kayun danum ni kulang atung tu niya kulang tengnin tu, tep eleg yuwak peka-u-unnuda. Et humman hu, ibbu-yak dakeyu tep iwwalak dakeyun hi-gak hedin eleg kayu mantuttuyyun yuka pehpehding. Heballi ni-ngangu hu maetung kayu winu metengnin kayu.

Revelation 22:7

Immehel hi Jesus et kantuy “Dengel yu eya e-helen ku tep anggegannu law et um-ali-ak. Emin ida etan kamengullug ni neitudek eyad libluh ey man-am-amleng idalli.”

Revelation 3:10

Inu-unnud yu hu tugun ku et ihikal yu ligat yu, et mukun eleg dakeyulli pekihelheltap di ligat ni peellik ni pematnaan kun emin ni tuu eyad puyek.

1 Timothy 5:8

Nem hedin wada tuun eleg tu ippaptek ida agi tu, nema-ma hu pamilyah tu, ey endi silbin tuka pengullug, tep beken ni hanniman hu elaw ni kamengullug. Hedin henin nunman hu elaw ni hakey ni kamengullug, ey kedukdul etan eleg mangulug nem hi-gatu, tep anin yadda eleg mangulug et daka ippaptek hu pamilyah da niyadda agi da.

2 Timothy 4:7

Impahding kun emin hu kabaelan kun nengipahding ni impangunun Apu Dios ni hi-gak, et deh e negibbuh. Heni-ak etan ni kameki-apput e nengapputtak, tep inu-unnud kun emin hu tugun tu niya impannananeng ku hu nakka pengullug.

Revelation 3:1

Kantu mewan ni hi-gak ey “Pantudek ka etan ni anghel idan kamengullug di Sardis et ehelen mun hi-gada e kammuy: Kan etan ni pitu kabaelan tun Ispirituh Apu Dios niya nangnged ni pitun bittuwen ey ‘Inamtak hu yuka pehpehding. Kan idan tuu ey mategu kayu, nem ya kakulugan tu e heni kayu netey, tep eleg maihammad hu yuka pengullug.

Revelation 2:2

‘Inamtak hu yuka pehpehding. Inamtak hu hinlu yu niya ya yuka pengissippelin ligat ni ngunu yun mansilbin hi-gak. Ey inamtak e eleg yu u-unnuden ida etan mangkaitek ni tuun kanday apostles ida, nem beken ida kaya, tep pinatnaan yudda et inamta yu law e lawah ida niya maitek ida.

Jude 1:4

Intudek ku huyya tep humman idan edum ni tuu ey eleg da deyyawa hi Apu Dios, nem eleg mi amta e eleg ida mengullug nan Jesus ni nunman ni nengabulutan midda. Daka hehwia hu binabbal Apu Dios idan neliwtan, tep intudu da hu neihla e kanday anin pehding da hu hipan pinhed ni annel da, yaggud eleg umbunget hi Apu Dios, tep et-eteng impeminhed tun hi-gatsun neliwtan. Ya hakey mewan ey eleg da ebbuluta e hi Jesus Christo e Apu tayun ebuh hu meunnud, e endi edum. Nem humman idan tuu ey wada dedan neitudek eman ni nebayag ni inhel Apu Dios ni kastiguddan henin nunman ni tuu.

John 15:20

Nemnem yu hu inhel ku lan hi-gayu e ya bega-en ey beken ni eta-ta-gey nem ya aputu, henin hi-gayu et hi-gak. Impanhelheltap da-ak idan eleg mengullug, et hanniman ali daman hi-gayu e makulug ni panhelheltap dakeyulli dama. Gullat et ni kinulug da hu intuttudduk, ey kullugen dalli et dama hu ituttuddu yu.

Proverbs 30:9

Tep entannit kimmedangyannak ey eggak law mandinnel ni hi-gam, et kangkuy eleg daka law mahapul e Dios ku. Nem hedin mewan mewetwettak, ey entanniy menekkewwak et mebe-ing ngadan mu.

Daniel 11:34

Dakel ali hu panliggatan idan kamengullug nan Apu Dios, nem hahakkey idalli hu makulug ni umbaddang ni hi-gada, tep ma-nut dakel idalli hu mei-dum ni hi-gada, nem hinkukkullugan dallin ebuh, tep ya annel dan ebuh hu daka ipapaptek.