Nehemiah 8:6 - Keley-i Bible (Antipolo Ifugao)

⁶ Kan Ezra ey “Medaydayaw hi Apu Dios e eta-gey ni Dios!” Ey inta-gey idan emin ni tutu-u ngamay da et kanday “Amen! Amen!” Nandukkun ida et manyuung ida et dayawen da hi Apu Dios.

Nehemiah 8:6 Referans Kwoze

1 Timothy 2:8

Pinhed kun anin di attun kakeemmungiddan kamengullug ni menaydayaw nan Apu Dios ey yadda lalakki hu mandasal e itta-gey da ngamay da. Huyyaddan lalakki ey mahapul ni beken idan matutut winu mabunget.

Lamentations 3:41

Ehel tayun emin ni hi-gatu hu wadad nemnem tayud pandasalan tayu ey kan tayuy

Exodus 4:31

Ey kinulug dan makulug ni intu-dak idan Apu Dios. Ey yan nunman nengamtaan da e tuka hehhemekaddad daka panhelheltapi. Et manyuung ida et dayawen da hi Apu Dios.

2 Chronicles 20:18

Dingngel da huyya ey nanyuung hi Jehoshaphat e patul niya nanyuung damadda emin hu helag Israel et dayawen da hi Apu Dios.

Revelation 7:11

Yadda etan anghel ni kaman-eh-ehneng di nanlinikweh di kad-an etan ni yimmudung di kayuddungin ap-apu et yadda etan epat ni mategu niyadda etan aap-apu ey nandukkun idad hinanggan Apu Dios ni menaydayaw ni hi-gatu.

Psalms 134:2

Em, ita-gey yu hu ngamay yun pandasalan yud Tempol et daydayawen yu hi Apu Dios.

Nehemiah 5:13

Inubad ku hu in-awekeh kud gitang ku et yagyagak hu balwasik et kangkuy “Hanneya pehding Apu Dios ni tuun eleg mengippahding ni inhel tun pehding tu. Ellan Apu Dios hu baley tu ey emin limmu tu et endin hekey hu metdaan ni hi-gatu.” Kan idan emin ni tuun humang day “Amen!” Et dayawen da hi Apu Dios. Ey impahding ida numan ni aap-apu hu inhel dan pehding da.

Genesis 24:26

Nandukkun etan bega-en et dayawen tu hi Apu Dios.

1 Chronicles 29:20

Ginibbuh David ni nandasal et hantu iolden idan tutu-u e kantuy “Dayaw yu hu Ap-Apu e Dios tayu!” Et emin ida etan tuun neamung ey dineyaw da hu Ap-Apu e Dios idan aammed da e nanyuung ida ey nandukkun idad hinanggan Ap-Apu e Dios niyad hinanggan David e patul.

Leviticus 9:24

Ey pinhakkeyey impaelin Apu Dios hu kamantetebbel ni apuy, et giheben tun emin etan ida neiappit ni kagihheba et yadda tabad altar. Inang-ang idan tuu humman ey ida kamantetekkuk ni amleng da et lumukbub idad puyek.

Exodus 12:27

ey kanyun ihhumang yuy ‘Huyya piyestah ni penaydayaw min Apu Dios e i-appitan mi tep linabhan idan anghel tu baballey min helag Israel, et endi tu pinetey ni hi-gami, et ebuh ida ngu pengulwan ni lakin u-ungngaddan iEgypt ni pintey tu.’” Dingngel idan helag Israel humman ey nandukkun ida et dayawen da hi Apu Dios.

1 Peter 1:3

Daydayaw tayu hi Apu Dios e Aman Jesus Christo e Apu tayu. Tep et-eteng hemek tun hi-gatsun nenaguan tun Jesus Christo eman ni neteyyan tu et wada law hu baluh ni biyag tayu. Et humman hu, et-eteng law namnamah tayun iddawat alin Apu Dios ni hi-gatsu etan wadad kabunyan ni iddawat tuddan tuu tu.

Ephesians 1:3

Daydayaw tayu hi Apu Dios e Aman Apu tayu e hi Jesus Christo, tep indawat tun hi-gatsun kamengullug emin hu panyaggudan tayun kamelpud kabunyan tep ya neiegian tayun Jesus Christo.

1 Corinthians 14:16

Tep hedin eleg yu pehding humman, ey inna-nu hedin in-ehel etan ni kamandasal di ehel ni eleg han-awat ni edum tu, inna-nun penghelan dan “Amen,” hedin eleg da awatan hu dasal tu?

Matthew 26:39

Limmaw hi Jesus di a-allaw tu ey limmukbub di puyek et mandasal nan Apu Dios et kantuy “Ama, hedin dammutu, man ekal mu huyyan nak panhelheltapan. Nem ngenamung ka, ya pinhed mu hu meunnud, beken ni ya pinhed ku.”

Matthew 6:13

Ipaptek dakemi ma-lat eleg kami madinin manliwwat. Ey baddangi dakemi ma-lat eleg dakemi haulen nan Satanas ni mengippahding ni lawah.’”

Jeremiah 28:6

“Tam em, kayyaggud ni peteg huttan ni inebig mu! Hehheggeden ku hu pengippahdingan Apu Dios nuntan ni inhel mu! Kayyaggud hedin pannenneng tu huttan ni inebig mu et ibangngad tun emin ida ngunut ni Tempol niya emin ni tutu-un neilaw ni balud di Babilon.

Psalms 141:2

Abulut mu anhan huyyan dasal kun henin muka pengebbulusin kayyaggud ni hamuy ni bangbanglu. Niya abulut mu anhan hu nakka pengitata-geyin ngamay kun mandasal ni hi-gam ni henin muka pengebbulusin kamei-appit ni hi-gam ni kekahkahdem.

Psalms 63:4

Itta-gey ku hu ngamay kun mandasal ni hi-gam niya mansalamattak ni hi-gam ni ingganah eyan ketagguk.

Psalms 41:13

Kamedeyyaw hu Ap-Apu e Dios idan helag Israel! Em, medaydayaw ni ingganah. Amen. Em, amen!

Psalms 28:2

Em, dengel mu anhan hu dasal kun nakka pampehemmehemmeki e nakka itta-gey hu ngamay kun indengdeng kud appit ni Tempol mu.

2 Chronicles 29:30

In-olden ni patul niyadda opisyal tu e ia-appeh idan helag Levi hu a-appeh di David nan Asap ni penaydayaw dan Apu Dios. Et man-a-appeh idan kamengippeamleng niya nanyuung idan penaydayaw dan Apu Dios.

2 Chronicles 6:4

Kantuy “Kamedeyyaw hi Ap-Apu e Dios tayun helag Israel. Tep impeamnu tu hu insapatah tu lan ama e hi David e kantuy

Genesis 14:22

Nem kan Abram ey “Eleg, tep insapatah kun Ap-Apu e Dios e Keta-ta-geyyan niya nanletun kabunyan niya puyek

1 Chronicles 16:36

Daydayaw tayu hu Ap-Apu e Dios tayun helag Israel. Em, daydayaw tayun ingganah. Emin itsu ey kantayuy “Amen! Daydayaw tayu hi Apu Dios!”

Nehemiah 8:7

Yadda helag Levi e di Jeshua, hi Bani, hi Serebiah, hi Jamin, hi Akkub, hi Sabbethai, hi Hodiah, hi Maaseiah, hi Kelita, hi Asariah, hi Josabad, hi Hanan, et hi Pelaiah, hu nengituttuddun Tugun ey man-eh-ehneng ida tutu-u.

1 Chronicles 29:10

Hi David ey dineyaw tu hi Apu Dios di hinanggaddan neamung ni tuu e kantuy “Ap-Apu e Dios idan eman ni ammed mi e hi Jacob, medaydayaw kan ingganah!

2 Chronicles 29:10

Nem yan nunya ey pinhed kun mekitbal nan Ap-Apu e Dios tayun helag Israel et eleg law bumubbunget ni hi-gatsu.

Psalms 95:3

Tep hi-gatu hu Apu Dios ni kabaelan tun mengippahding ni emin niya hi-gatu hu keta-ta-geyyan ni Patul idan emin ni dios.