James 4:9 - Keley-i Bible (Antipolo Ifugao)

⁹ Lemyung kayu niya pantuttuyyu kayud nanliwatan yu et beken ni ya am-amleng hu pehpehding yu.

James 4:9 Referans Kwoze

Matthew 5:4

Man-am-amleng ida etan tuun kaumlelemyung, tep a-alluken idallin Apu Dios.

Proverbs 14:13

Ya etan tuun kaumlelemyung ey dammutun manggelgelakgak ma-lat eleg meamta e kaumlelemyung. Nem hedin negibbuh ni nangngi-ngi-ngi, man nanengtun kaumlelemyung.

Luke 6:25

Hi-gayuddan wadan emin hu mahapul tun nunya, anggehemmek kayu tep mangkulakulang kayulli. Hi-gayun kamangngi-ngi-ngin nunya, anggehemmek kayulli tep umlelemyung kayulli ey umnanginangih kayulli.

Psalms 119:67

Kinastigu muwak ni nunman tep ya lawah ni impenahding ku, nem yan nunya ey ya tugun mu hu nakka u-unnuda.

Ezekiel 16:63

Liwwanen kuddalli law liwat mu, nem nenemnemem idalli impenahding mun liwat mu et um-i-ineng kallin baing mu. Hi-gak e Eta-gey ni peteg ni Ap-Apu hu nanghel idan nunya.”

Ezekiel 7:16

Yadda hahhakkey ni metdaan ni hi-gada ey umbebsik idad kedunduntug e henidda paluman nedegyun di nangkedeklan et ida kaan-umhamahamak ni keihhikkugan da. Wadalli law hakkey ey mantuttuyyun liwat tu niya umlelemyung.

Luke 16:25

Nem kan Abraham ey ‘Ungngak, nemnem mu e yan wada ka lad puyek ey nan-am-amleng ka tep wadan ingganah emin mahapul mu, nem hedin hi Lasarus katteg, man anggehemmek. Nem yan nunya, ey kaman-am-amleng hi Lasarus di deya et hi-gam hu kamanhelheltap.

Job 30:31

Ey ya law nakka deddengngelan nunya ey yadda kamantete-ul niya kamannanangih e beken law ida etan ni kamengippeamleng.

Luke 6:21

Hi-gayun kameu-upan nunya ey man-am-amleng kayu tep mepeppehel kayulli. Hi-gayun kaumnangih ni nunya ey man-am-amleng kayu tep mangngi-ngi-ngi kayulli.

Lamentations 5:15

Endi law an-anlad puhu mi. Nambalin ni lemyung hu mika penayyatayyawi.

Jeremiah 31:13

Yadda kakat-agun bibi-i ey idalli menattayyaw gapuh ni amleng da, anin idan kakat-agun lalakki niyadda nangkea-amma. Tep ellubyagen kudda ey peamleng kudda et eleg idalli law umlelemyung.

Jeremiah 31:9

Mandasal idalli ey mannengngih idan mangkeibbangngad. Ippanguluk ida et umenamut ida. Iddalan dad gilig idan wangwang niyaddad nandeklan ni keltad et eleg ida meihungbub. Heni-ak ali aman Israel niya heni pengulwan ni u-ungngak hi Epraim.”

Ecclesiastes 2:2

Tam heni ita kaman-angngaw hedin ian-anteng hu ngi-ngi. Kaw wada kayyaggud ni megun-ud hedin ebuh pan-amlengan ni annel ni peppepdugen.

Psalms 119:71

Kayyaggud hu nambalbalinan tu hu nanlelehhanan kun impengastigum ni hi-gak, tep na-duman hu inedal kun tugun mu.

Psalms 119:136

Nakka i-anteng hu nangih tep ya eleg pengu-unnudiddan tutu-un tugun mu.

Nehemiah 8:9

Dingngel idan tutu-u hu neitudek di Tugun ni mahapul ni pehding da ey kanengih ida. Et kan di gobernor e hi Nehemiah, hi Ezra e padin nekangngamta Tugun et yadda edum tun helag nan Levi ni kamampengituttuddun Tugun ey “Entan nangih yu tep yan nunyan aggew ey daydayawan tayu hi Ap-Apu e Dios tayu.”

Matthew 21:41

Kandan hi-gatuy “Pepettey tudda et pepaptek tu puyek tun edum ni tuun mengidwat ni dewa tu hedin nedateng.”