Isaiah 26:14 - Keley-i Bible (Antipolo Ifugao)

¹⁴ Humman idan nan-ap-apun hi-gami ey endidda law, tep kinastigum ida et matey ida et eleg ida law mambangngad. Meliwwan ida law ni ingganah et endi an mannemnem ni hi-gada.

Isaiah 26:14 Referans Kwoze

Proverbs 10:7

Kamengippeamleng ni nemnemnemen ida kayyaggud ni tuu, nem hedin yadda lawah ni tuu, man meliwwan ida.

Isaiah 8:19

E-helen idallin tutu-un hi-gayun mahmahan yuddan kamammagguway ni kaumtenuttubbu hu pinhed yun amtaen. Nem hedin ya e-helen kun hi-gayu ey hi Apu Dios kumaddan hu pengibgai yuddan nunman. Kele an mahmahan idan mategud nangketey hu meippahding alin edum ni aggew?

Psalms 106:28

Ya mewan eman ni wadaddad Peor ey nei-dum idaddan kamenaydayaw nan Baal e dios idan tuudman, niya nekikakikan idadda etan ni kamei-appit idan netey.

Revelation 20:5

Yadda etan nekiap-apun Jesus ey hi-gada nemangulun netagwan, tep yadda etan edum ni nangketey ey eleg ida metagwan ingganah nelabah hu hanlibun toon.

Matthew 2:20

“Bangun ka et awiten mudda eya han-ina et mambangngad kayud bebley di Israel, yaggud netey law etan memettey eyan u-ungnga.”

Isaiah 10:3

Hipa pehding yu hedin medettengan etan aggew ni pengastiguan dakeyun Apu Dios e peelli tu tutu-un melpud edum ni bebley ni memahbah ni hi-gayu? Hipa pampebaddangan yu? Ey attu yu pampengitluan idan kinedangyan yu?

Psalms 109:13

Niya heballi mangkettey idan emin hu helag tu ma-lat keliwwanan ni ngadan tu.

Psalms 9:6

Impeka-apput mudda buhul mi ey nambahbah mu bebley da, et meliwwan idallin ingganah.

Deuteronomy 4:28

Ey yaddad bebley ni keillawwan yu ey deyyawen yudda kinapkapyan tuun dios ni keyew niya batun eleg pakeang-ang ey eleg pekadngel, eleg mengngan ey eleg pakehamuy.

Exodus 14:30

Natngadda helag Israel ey et-eteng law hu dinel dan Apu Dios et hi Moses e bega-en tun nenang-angan dan kabaelan tun nengihwangan tun hi-gadan nunman ni aggew e inapput tudda iEgypt et nangkalsing idan impahding tu. Et mangkaiwehit hu annel dad gilig ni baybay.

Isaiah 26:19

Nem kami kamedinnel e yadda netey ni tutu-um e Apu Dios, ey metegguan idalli et maweda mewan annel dan wada biyag tu. Umbangun idalli humman ni kaman-u-uggip di kulung da et man-a-appeh idan amleng da. Humman ni biyag ni nalpun hi-gam, Apu Dios, ey heni delnun kakkabbuhhan. Hanniman ali pehding mu e tegguem ida nangketey.

Psalms 36:12

Neapput ida humman ni lawah ni tuu. Netu-lidda et eleg ida pakebangun.

Psalms 135:17

Wada tangila da, nem eleg da handengel niya endi yayyah da.

Ecclesiastes 9:5

Makulug humman! Tep hedin ya mategu ey amta da e mettey ida, nem hedin yadda netey ey endi inamta da. Endilli da gun-uden ey meliwwan idalli.

Isaiah 29:6

Tep nekekemtang ey i-alin Apu Dios e Kabaelan tun emin hu na-let ni pewek, ya kidul, ya yegyeg niya kamanhihinyab ni apuy et ihwang dakeyu.

Isaiah 37:19

Nanggiheb dadda beken ni makulug ni dios di diman idan bebley, tep humman ida ey i-ingngeh ni ebuh e nekapyad keyew niya batun pinaot ni tuu.

Job 7:9

Ya tuu ey henin kulput e hedin neendi man eleg law mambangngad. Henin nunman hu tuu e hedin netey man eleg law mambangngad et liwwanen law idan emin ni nengamtan hi-gatu.

Job 18:17

Et endi law mee-ehhel ni hi-gatud bebley tu, anin di edum ni bebley, ey endin ingganah law hu mannemnem ni hi-gatu.

Job 24:20

Et endi law hu an mannemnem ni hi-gada, anin idan ineda et liwwanen dadda. Kennen alin bigih hu annel da. Ey heniddalli etan ni nalngeh ni keyew.