Hosea 5:1 - Keley-i Bible (Antipolo Ifugao)

¹ Dengel yu eya e-helen kun hi-gayun papaddi. Niya hi-gayuddan iIsrael, nemnem yu huyya, anin ni hi-gayun pamilyah nan patul. Huyya kastigu yu: Eleg kayu meihwang! Tep heni impangulu yudda tuud keknaan dan nenaydayawan dan beken ni makulug ni dios di Mispah niyad Tabor.

Hosea 5:1 Referans Kwoze

Hosea 9:8

Hi-gak ni hakey ni prophet ey binega tuwak nan Apu Dios ma-lat ehelan dakeyun iIsrael e tutu-u tu et panyaggudan yu. Nem emin kumedek hu nakka lawwi ey heni-ak sisit ni yuka kekkeknaa. Anin di Tempol Apu Dios et nambalin ida tuudman ni buhul idan prophet.

Micah 7:2

Henin nunman neipahding idan kayyaggud ni tutu-un kamengu-unnud nan Apu Dios e endi natdaan ni hi-gada. Ebuh ida law hu maheul niya ihik ni umpatey ni edum dan tuun natdaan.

Micah 3:9

Dengel yu e aap-apuddan helag Jacob. Anggebe-hel yu hu limpiyuh niya yuka pambalin ni lawah hu kayyaggud.

Hosea 6:9

Hi-gayun papaddi, ey heni kayuddan matekew e mapiliw ni limmun tuu. Kayu kamanhehhegged ni tuun pilliwen yu limmu tu. Anin etan di keltad ni mampellaw di bebley di Sekem et kayu kamambebtak diman ni pimmatey kayu. Anggeba-ing ida huyyan yuka pehpehding.

Judges 4:6

Hakey ni aggew ey impaeyag tu hi Barak e u-ungngan Abinoam e nambebley di Kedes di Naptali et kantun hi-gatuy “In-olden nan Apu Dios e Dios ni Israel e kantuy ‘Ikuyug mu hu hampulun libun sindalun helag Naptali nan Sebulun et ipengulum idad duntug di Tabor.

Malachi 2:1

Kan Apu Dios e Kabaelan tun emin ey “Dengel yu e papaddi tep hi-gayu penghelak nunya!

Amos 7:9

Mebahbah alin emin hu kapandeyyawiddan iIsrael. Hedin yadda pamilyah nan patul e hi Jeroboam ey mettey idallin emin et mepappeg pan-ap-apuan ni helag tu.”

Hosea 10:15

Hanniman ali meippahhding ni hi-gayun iBethel tep nemahhig liwat yu. Ey yallin keillepuan nunman ni gubat ey mettey hu patul yun iIsrael et humman ali pappeg ni pan-ap-apuan tu.’”

Hosea 4:1

Dengel yu hu ehel Apu Dios e tutu-ud Israel. Heninnuy hu inhel tun bahul yu. Kantuy “Endi kameiddinnel ni hi-gayu niya endi impeminhed yun edum yun tuu. Niya inwalleng yuwak e Dios yu.

Malachi 1:6

Kan Apu Dios e Kabaelan tun emin idan padi ey “Ya u-ungnga ey tuka lispituha ametu. Hanniman dama hu bega-en e tuka lispituha hu kan bega-en ni hi-gatu. Ey hedin hi-gayu, man hi-gak hu ameyu niya apu yu, nem eleg yuwak lispituha. Nginhay yuwak. Nem kanyuy ‘Hipa inna-nu min nangngehay ni hi-gam?’

Micah 3:1

Dengel yuwak e aap-apud Israel. Gullat et ya limpiyuh hu pehding yun man-ap-apu.

Hosea 13:8

Pehding kun hi-gayu hu henin kapehding ni bimmunget ni inan bear tep imbesik da impah tu. Ya pengastiguk ni hi-gayu ey henin kapehding ni layon etan ni animal ni kennen tu e tuka pamba-nuta.

Jeremiah 46:18

Ya etan Patul ni Apu Dios e Kabaelan tun emin e wadan ingganah ey kantuy “Wadalli um-alin eta-gey ey neka-let ni tuun mengubbat ni hi-gayu. Henillin kasina-gey ni Duntug e Tabor niya Duntug e Karmel di gilig ni baybay.

Jeremiah 13:18

Entanni ey immehel mewan hi Apu Dios ni hi-gak et kantuy “Ehel mun patul et hi inetu et ma-kal idad nan-ap-apuan da tep meapput ali hu nan-ap-apuan da.”

Joel 1:2

Hi-gayun kamengipappangngulu niya hi-gayun emin ni iJudah, kaw wada an neipahding eman ni tsimpuh idan aammed yun heni eyan nekapkapyan nunya?

Judges 4:12

Yan nengamtaan Sisera e nanteyed hi Barak e u-ungngan Abinoam di Duntug e Tabor,

1 Samuel 7:5

Entanni ey impalaw Samuel di kebebbebley di Israel hu mengippeamtan emin idan edum tun helag Israel, ma-lat maemung idad Mispah e kantuy “Kaemmung kayun emin di Mispah et idasalan dakeyun hi-gak diman.”

1 Samuel 7:6

Neamung idan emin di Mispah et tuma-nuk idan danum et iduyag dad puyek ni in-appit dan Apu Dios. Ey nantepel idan nunman ni aggew e eleg ida mangan tep humman pengippeang-angan da e ida kamantuttuyyun nanliwatan da. Kandan dasal day “Mika ebbuluta e nanliwat kamin hi-gam e Apu Dios.” Yan nunman di Mispah ey nambalin hi Samuel ni ap-apu da.

1 Samuel 7:16

Yan nunman ni ketaggun Samuel ey katootoon ni tuka e-pengan umlaw di emin ni bebley idan helag Israel e tuka ippalpud Bethel, yad Gilgal ingganah lad Mispah. Ey kamansilbin huwet di edum tun helag Israel.

Jeremiah 11:7

Tep yan eman ni nengipenguluan kuddan aammed dan neni-yanan dan Egypt ey inhelan kudda e mahapul ni u-unnuden da-ak ma-lat eleg ida mekastigu. Ey impenidwak ni inhel huyyaddan helag da ingganah nunya.

Amos 3:1

Hi-gayun iIsrael, ey dengel yu eya e-helek ni inhel Apu Dios ni hi-gayun heni hakey ni pamilyah ni impangulu tun neni-yanan yun Egypt.