Exodus 2:3 - Keley-i Bible (Antipolo Ifugao)

³ Nem entanni ey eleg tu law han-itlu et lumaggan basket ni heni labba et pampudlitan tun pukut ma-lat eleg humgep danum. Inha-ad tudman etan gelang et tu itlud mekatlubbung di gilig ni Wangwang e Nile.

Exodus 2:3 Referans Kwoze

Exodus 1:22

Entanni law ey in-olden etan ni patul idan tutu-u tu e kantuy “Yu pan-ibbeng ida hu pakeiungngan lalakkin Hebrew di Wangwang e Nile di diman Egypt, nem entan tudda ilegat hu biin pakeiungnga.”

Acts 7:19

Humman ni patul ey namplanuh ni lawah ni pehding tuddan aammed tayu niya makabbunget ni hi-gada. Pinilit tuddan ibbeng da u-ungnga da ma-lat mangkatey ida.

Genesis 6:14

Et humman hu, kapya kan bapor e ya kayyaggud ni keyew hu ussalen mu et kuwakuwaltuhen mu. Pudlitim ni pukut ida nambattanan ni dingding ma-lat endi an umhegep ni danum.

Matthew 2:16

Entanni ey neamtaan nan Herod e himmak ida etan ni tuu etan u-ungnga, nem eleg ida mambangngad di kad-an tu ey bimmunget et iolden tu e petteyen daddan emin hu gelang ni lakid Bethlehem niyad bebley di nanlinikweh diman ni dewwa toon da winu kulang ni dewwa, tep inhel ida etan ni tuu e umlaw ni dewwan toon hu nelabah neipalpu eman ni laputun nenang-angan da etan ni bittuwen.

Isaiah 18:2

Yadda impaeli yun nanlugan di bangkan nekapyad katlubbung ey daka iddalan di Wangwang e Nile et lumaw idad edum ni bebley. Ey hi-gayun impaeli dan kamehahwisik ni an menghel ni kaippaad idan tutu-ud kebebbebley, anemut kayud bebley yun ginedwan wawangwang, hi-gayun etata-gey ni tutu-u e mangkalinah belat yu niya hin-appil ehel yu niya katekkusiddan tutu-ud kebebbebley. Huyya yu ehel di bebley yu.

Matthew 2:13

Limmaw ida etan tuu, ey nan-i-innep mewan hi Joseph ey nampeang-ang hu anghel nan Apu Dios et kantuy “Pandaddan kayu kuma et bumsik kayud Egypt, tep kaan hemmahemmakan Herod eya u-ungnga ma-lat papetey tu. Panha-ad kayudman ingganah penghelan kun dammutun hi-yanen yu humman ni bebley.”

Genesis 11:3

Et wada hakkeyey kanday “Mengapya itsun et-eteng ni bebley tayu. Ey behwaten tayu et-eteng niya eta-gey ni binattun baley et datengen tu kabunyan et mandingngel itsu niya eleg itsu mawehit eyad puyek.” Et ilepu dan mengapya.

Isaiah 19:6

Anin idallin alak niyadda kulukul di diman Egypt et mampanhemmuy ida, tep mambabbabbal ni metduk et makling ida katlubbung niya helek diman.

Genesis 14:10

Nem yadman ey dakel hu edallem ni bitu. Et umbebsik ida-et hu sindalun patul di Sodom niyad Gomorrah, ey nakna edum ni hi-gadadman. Nem yadda etan tellun edum dan patul ey bimmesik idad duduntug.

Isaiah 35:7

Mambalin alin lebeng hu maka-atung ni palnah niya meweddalli dakel ni hebwak di mamegan puyek. Umtemel ali helek niya katlubbung di nambalyan idan jakal ni nunman.