Amos 2:7 - Keley-i Bible (Antipolo Ifugao)

⁷ Heni daka pan-igsin hu endi elet tun tuu niya en-endi-an, niya eleg da iddawat kelebbengan da. Da mewan kababbainga ngadan ku, tep kamanhuhhullul hu han-aman mengi-ullig ni himbut dan bii.

Amos 2:7 Referans Kwoze

Amos 5:12

Inamtak e himmalla liwat yu niya inamtak ida etan lawah ni impahding yun edum yu. Yuka panliligat ida limpiyuh ni tuu ey yuka ebbuluta pemeyyad dan hi-gayu ma-lat man-itek kayu et eleg maipahding hu limpiyuh. Hi-gayu kaumhani et eleg ida law han-alan nangkewetwet hu kelebbengan dad korteh.

Ezekiel 22:11

Yadda edum ni hi-gayu ey daka i-abek ahwa da. Ey wadadda edum ni daka i-ulig hu inepu da niya agi da.

Isaiah 10:2

Yuka kapkapyaa huttan idan linteg ma-lat wada inna-nu yun mengkal ni kelebbengan idan nangkewetwet, yadda nangkebalu niyadda nangkepu-hig, niya ma-lat wada inna-nu yun mengellan limmu da.

1 Corinthians 5:1

Wada nengidaddatteng ni hi-gak e wada hakey ni hi-gayun lawah ni peteg tuka pehpehding, tep piniliw tu hu binintan ametu. Nela-med hu bahul tu, tep anin idan eleg mengullug et eleg da pehding humman.

Micah 2:9

Anin idan bibi-in tutu-uk et dineg-al yuddad nehammad ni baballey da. Inendi yu law ni ingganah hu panyaggudan idan u-ungnga dan indawat kun hi-gada.

Micah 2:2

Yuka pampiliwa papayyew niya baballey ni pinhed yun ellan. Yuka tellama bineltan ni edum yun tuu.”

Romans 2:24

Ambuley neitudek dedan di Ehel Apu Dios e kantuy “Humman ni lawah ni elaw yun Jews hu kapemihhuliddan Gentiles nan Apu Dios.”

Sephaniah 3:3

Henidda kaman-elmem ni layon hu opisyal da niya henidda ahhud muyung hu huwet da e tuka kennan emin kennen tun hileng et endi law natdaan ni kennen tun kakabbuhhan.

Amos 8:4

Dengel yu huyya, hi-gayun kamengippelilligat idan anggehemmek niya newetwet ni tutu-u eyad bebley.

Amos 4:1

“Dengel yu eya e-helen ku, hi-gayun mangkateban bibi-id Samaria ni heniddan kamepeppehel ni mangkateban bakad Bashan. Hi-gayun bibi-in kamengippelilligat idan nekapuy niya anggehemmek ni tutu-u. Hedin kuma, kanyun aahwa yuy ‘I-li ka pay ni ibbuteng ta.’”

Ezekiel 36:20

Nem emin di kebebbebley ni neiwehitan da ey kameibabbaing hu ngadan ku tep kan idan katuutuu ey ‘Tutu-un Apu Dios ida huyya, nem endi hu kabaelan tun mengippaptek ni hi-gada et mukun dinegyun idan buhul dad bebley da.’

Proverbs 28:21

Beken ni kayyaggud hu wada an pengippahhigan ni huwes di pengippennuhan tun kasuh, nem yadda edum ni tuu ey ida kamanggagalid ni mengippahding ni lawah, anin ni ekket ibbayad dan hi-gada.

1 Kings 21:4

Immanemut hi Ahab ey kaumbubunget ey kaumlelemyung ni nenumang Nabot ni hi-gatu. Bimmaktad di uggippan tu e inhangga tud dingding ey eleg tu pinhed ni mengngan.

2 Samuel 12:14

Nem ya huyyan impahding mu hu umhulun ni pemihhulan idan buhul Apu Dios ni hi-gatu. Et humman hu mettey etan u-ungngam ni laki.”

Leviticus 20:3

Iwwalleng ku hu tuun mengippahding nunya ey eggak law ibbilang ni tuuk, tep pambalin tun beken ni malinih hu baley ku niya langlangkuyyaen tu ngadan kun pengidwatan tun u-ungnga tun Molek.

Leviticus 18:15

Entan tu iulig hu inepu yun bii, tep ahwan u-ungnga yu.

Leviticus 18:8

Ey entan tu iulig hu ahwan ameyu, tep kebe-ingan nan ameyu.

Hosea 4:14

Nem eggak ida kastigua, tep anin daman hi-gayu et kayu kaumlaw di kad-an idan bibi-id tempol ni daka pebeyyad annel da. Ey kayu kamei-dum ni hi-gadan man-appit idan dios da. Endi nemnem yu! Kaw eleg yu amta e mebahbah kayulli tep eleg yu pinhed ni ewwatan hu pinhed kun pehding yu?

Leviticus 18:21

Entan tu iebulut ni mei-appit hu u-ungnga yun Molek, tep langlangkuyyaen yu hu ngadan ku e Dios yu. Hi-gak hu Ap-Apu.

Isaiah 3:14

Anin idan ap-apun tutu-u tu et huwetan tudda et hiktaman da bunget tu. Heninnuy hu kan Apu Dios ni hi-gada: “Binahbah yudda iIsrael e hi-gada kamei-ellig ni leguntak ni netaneman ni grapes. Hineuheul yudda nangkewetwet et penuen yu baballey yun inla yun hi-gada.

Isaiah 3:15

Endi lebbeng yun mengippeligligat idan tutu-uk niya menellatellam idan nangkewetwet. Hi-gak hu Ap-apu e hi Apu Dios e Kabaelan tun emin, hu nanghel idan nunya.”

Isaiah 10:1

Nanna-ud ni mekastigu kayun kamengapyan beken ni neandeng ni linteg e kapanliggasiddan tutu-uk.

Amos 5:11

Impanliligat yudda nangkewetwet niya piniliw yu kennen da tep impeta-gey yu buwis da niya nengina hu yuka pebeyyad ni abang da. Et humman hu, anin ni kinapya yu kakkayyaggud ni batun baballey yu et eleg kayu manha-ad diman. Niya anin ni nantanem kayun grapes di legunta yu et beken alin hi-gayu menginnum idan nunman.