Acts 13:6 - Keley-i Bible (Antipolo Ifugao)

⁶ Impeng da kebebbebley di Cyprus ni da nantuttudduan et lektattuy dimmateng idad Papos e gilig ni bebley diman. Yadman nenammuan dan Bar-Jesus e magician. Kantuy hi-gatu hu prophet Apu Dios, nem itek tu kaya.

Acts 13:6 Referans Kwoze

Matthew 7:15

Helipat-i yuddalli etan tuun kanday prophet idan Apu Dios tep heni kayyaggud hu daka peang-ang e henidda etan ni kalneroh ni maka-ayup, nem lawah ni peteg hu wadad nemnem da e henidda etan ni mabunget ni ahhu tep pinhed dan bahbahen etan kayyaggud ni neitugun ni hi-gayu.

1 John 4:1

Hi-gayun kaegiegi, ey entan tu kulug hu linggeman ni tuun menghel ni wada hu Ispirituh Apu Dios ni hi-gatu. Nem patnai yun ibbag-an hedin makulug ni nalpun Ispirituh Apu Dios humman ni tuka ituttuddu winu eleg, tep dakel ida limmaw di kebebbebley ni an mantuttuddun itek. Kanday prophets ida, nem beken kaya.

2 Corinthians 11:13

Ya kakulugan tu, ey humman idan tuu ey beken idan makulug ni apostles, nem hi-gada etan kaumhaul. Kanday apostles idan Jesus Christo, nem beken kaya.

Mark 10:46

Entanni ey dimmateng di Jesus di Jerico. Yan daka pampeni-yanin nunman ni bebley ey dakel ida neikuyug ni hi-gada. Wada etan nekulap ni kamanyuyyuddung di gilig ni keltad e kamangkedekedew idan tuun kamelebbah di kad-an tu. Ya ngadan tu numman ni nekulap ey hi Bartimeo e u-ungngan Timeo.

Matthew 24:24

Tep wadaddalli tuun kanday hi-gada hi Christo niya kan alin edum ey prophet ida. Ippahding dalli kaketngain tuu niya peang-ang dalli hu et-eteng ni kabaelan da. Et humman hu, gullat ni dammutu et, anin idallin tuun Apu Dios et mehe-ul ida.

Matthew 16:17

Kan Jesus nan Peter ey “Hi-gam e Simon e u-ungngan John ey man-am-amleng ka, tep huttan ni inhel mu ey beken ni nalpud nemnem mu, nem impeamtan Ama Apu Dios di kabunyan ni hi-gam.

Sekariah 13:3

Hedin wada hu tuun mengippillit ni mambalin ni beken ni makulug ni prophet et ippahding tu etan ngunu tu, ey mahapul ni e-helen nan ametun inetun hi-gatu e kanday ‘Mahapul ni mettey ka, tep itek hu in-inhel mu ey kammuy nalpun Apu Dios.’ Et tetwiken nan inetun ametu et matey.

Exodus 22:18

Mahapul ni pepettey ida maeyak.

Revelation 19:20

Nanggugubat ida ey nengapput etan nantakkay di kebayyu niyadda sindalu tu. Bineludda etan heni animal ni anggetakkut niya etan beken ni makulug ni prophet et pambekahen daddad apuy e wada sulfur tu. Ya etan beken ni makulug ni prophet hu nenauhaul idan dakel ni tuu tep ya tuka peennang-ang ni kaketngain tuud hinangngab etan heni animal ni anggetakkut. Yadda etan tuun nangkehaul ey inebulut dan pemalkaddan malka etan heni animal ni anggetakkut et daka daydayawa etan u-ukkul tun kinapya da.

2 Timothy 3:8

Humman idan kamantuttuddun hin-appil ey daka kehhinga hu makulug ni kameituttuddu, henidda lad Hanes nan Hambres e impatna dan la-pahan hi Moses e bega-en lan Apu Dios. Nebahbah hu nemnem idan nunyan tutu-u niya neihla hu kinulug da. Entan tu ibilang ni kamengullug nan Jesus hu heniddan nunman ni tuu.

1 Chronicles 10:13

Hanniman neipahding nan Saul e netey tep eleg tu u-unnuden hu tugun Apu Dios. Nginhay tu hi Apu Dios et mekihummangan ni linnawan netey ma-lat ibega tu hedin hipa kayyaggud ni pehding tu,

1 Kings 22:22

Kan Apu Dios ey ‘Hipa pehding mu?’ Kan etan ni ispirituh ey ‘Umlawwak et nak pan-itek idan emin prophet Ahab.’ Kan Apu Dios ey ‘Lakkay, et nanna-ud ni mehe-ul.’

Leviticus 20:6

Hedin wada hakey ni tuun mampebaddang niya mengu-unnud ni e-helen idan tuun kamekihhummangan ni linnawan netey, ey iwwalleng ku et eleg law meibbillang ni tuuk.

Acts 13:8

Nem kapihhulan Bar-Jesus (e kandan hi Elimas di ehel ni Greek) hu kaituttuddud Paul nan Barnabas, tep eleg tu pinhed ni kullugen Sergius Palus hu daka ituttuddun meippanggep nan Jesus.

Acts 13:13

Entanni ey hini-yan di Paul et yadda etan edum tu hu bebley di Papos et ida mambangka et lumaw idad Pelga di Pampilya. Yadman hu neni-yanan John Mark ni hi-gada et mambangngad di Jerusalem.