1 John 2:5 - Keley-i Bible (Antipolo Ifugao)

^5-6 Nem ya tuun kamengu-unnud ni intugun Apu Dios ey makulug ni et-eteng hu impeminhed tun hi-gatu. Ya keang-angan tun makulug ni wadan hi-gatu hi Apu Dios ey ka-immatun tep tuka u-unnuda elaw Apu Dios henin nengu-unudan Jesus Christo ni hi-gatu eman ni kaweda tud puyek.

1 John 2:5 Referans Kwoze

John 14:23

Kan Jesus ni hi-gatuy “Tep ebuh ida etan neminhed ni hi-gak niya kamengu-unnud ni tugun kun pengippeamtaan ku hedin hipa-ak. Pinheden idan Ama niya ippaptek midda tep wada kamin hi-gadan ingganah.

John 14:21

Ya tuun kamengu-unnud ni tugun ku ey hi-gatu neminhed ni hi-gak. Ey ya tuun neminhed ni hi-gak ey pinpinhed daman Ama niya pinhed ku dama. Ey hi-gatu pengippeewwatan ku hedin hipa-ak.”

Luke 11:28

Nem kan Jesus ey “Nem nema-ma-ma amleng etan ni nangngel ni ehel Apu Dios et u-unnuden tu.”

1 John 3:24

Emin ida etan tuun kamengu-unnud ni tugun Apu Dios ey mannananeng idan mengiddinnel ni hi-gatu niya ipapaptek tudda daman kenayun. Hi Apu Dios ey impaeli tun hi-gatsu hu Ispirituh tu, et humman pengamtaan tayun wadan hi-gatsu hi Apu Dios.

Psalms 119:2

Ey man-am-amleng ida hu tuun kamekangngu-unnud ni tugun tu niya hi-gatun ebuh hu daka heppulad biyag da.

Revelation 14:12

Hi-gayuddan tuun Apu Dios ni kamengu-unnud ni tugun tu niya impannaneng da hu daka pengullug nan Jesus ey mahapul ni eddalen yun mengissippel ni ligat yu.

1 John 5:2

Hedin pinhed tayu hi Apu Dios et tayu kau-unnuda hu tugun tu, man huyya keang-angan tun pinhed tayu etan ida u-ungnga tu e humman ida kamengullug ni hi-gatu.

John 15:5

Em, hi-gak hu kamei-ellig etan ni wakal ey hi-gayu hu kamei-ellig ni pingi tu. Ya tuun mannananeng ni hi-gak, henin hi-gak e pannananeng kun pemaptek kun hi-gatu ey kayyaggud ida ippahding tu et kamei-ellig ni dakel illameh tu. Tep makulug ni pakkadek baddangan ku hu tuu et han dammutun kayyaggud pehding tu.

Ezekiel 36:27

Et u-unnuden yun emin hu tugun ku ey pehding yun emin hu immandal kun pehding yu, tep weddaek ni hi-gayu hu Ispirituh ku.

1 John 4:18

Ya tuun nehammad hu impeminhed tun Apu Dios ey eleg tu tekkusi hi Apu Dios. Nem ya tuun kaumtakut tep yalli kehuwetan tu ey kulang impeminhed tun Apu Dios. Ya katekkusin tuud kehuwetan tulli ey ya kekastiguan tu.

Psalms 119:146

Em, nakka mandasal ni hi-gam ma-lat ihwang muwak, et wada inna-nu tun pengu-unnudan kuddan tugun mu.

2 Corinthians 5:17

Ya tuun nengulug nan Jesus Christo ey nambalin ni baluh ni tuu, tep nehullulan law ni kayyaggud hu lawah ni neitu-wan tun nunman.

Revelation 12:17

Nemahhig bunget etan ni dragon etan ni bii et lumaw, e tudda gubbaten ida helag etan ni bii e humman ida etan kamengu-unnud ni tugun Apu Dios niya intuttuddun Jesus.

1 John 5:20

Ey inamta tayu e immali hi Jesus Christo e U-ungngan Apu Dios, et idwat tun hi-gatsu hu tayu kapengewwat ma-lat amtaen tayu hu makulug ni Dios. Ey wada law nehammad ni neiegian tayun Apu Dios tep neibilang itsun agin U-ungnga tu e hi Jesus Christo. Tep hedin hi Jesus, man makulug daman Dios. Ey hi-gatu hu kamengidwat ni biyag ni endi pappeg tu.

1 Corinthians 1:30

Yan nengulugan tayu hu nengidagyuman Apu Dios ni hi-gatsun Jesus Christo. Intu-dak tu eyad puyek et matey di krus ma-lat mawedan hi-gatsu hu kalinaing ni pengamtaan tayun hi-gatu. Et ibilang daitsun kayyaggud ni neneklaan Jesus Christo ni nehellakniban tayud liwat et ieng-eng daitsun hi-gatu.

Romans 8:1

Et humman hu, hi-gatsuddan kamengullug nan Jesus Christo ey eleg itsu law mekastigu.

James 2:22

Huyyan impahding Abraham hu keang-angan tun ya kayyaggud ni kaippahding hu kakeang-angin kapengullug. Et humman hu, ya nengu-unnudan tun inhel Apu Dios hu nengipehammad ni tuka pengullug.

2 Corinthians 5:21

Hi Jesus ey endi liwat tu, nem gapuh ni panyaggudan tayu, ey intu-dak Apu Dios ni an mengikkettey ni liwat tayu ma-lat hedin mei-eggi itsun hi-gatu, man meilla-kam itsud kakinayyaggud Apu Dios.

John 6:56

Ya tuun mengngan ni annel ku niya menginnum ni kuheyaw ku ey wada-ak ni hi-gatun kenayun ey wadan hi-gak daman kenayun.

Ecclesiastes 8:5

Yadda kamengu-unnud ni hi-gatu ey eleg ida mekastigu. Ya nenemneman ni tuu ey inamta tu pehding tu niya inamta tu tsimpuh ni pengippahdingan tu.

Psalms 106:3

Kaman-am-amleng ida tutu-un limpiyuh daka pehding niya kayyaggud ni ingganah daka kapkapyaa.

Proverbs 8:32

Et humman hu, dengel yuwak e u-ungngak ida, tep hedin u-unnuden yu tugun ku, ey man-am-amleng kayu.

Psalms 119:4

Indawat mu e Apu Dios hu tugun mun hi-gami et ehlen mu e mahapul ni pannananeng min u-unnuden ida humman.

Proverbs 28:7

Ya etan nenemneman ni u-ungnga ey kamengu-unnud ni olden, nem ya etan u-ungngan kamekikkillaw di endi silbi tun tuu ey be-ingen tu a-ammed tu.

Psalms 105:45

Humman hu impahding tu ma-lat u-unnuden idan tutu-u tun emin hu tugun tu. Daydayaw tayu hi Apu Dios!

1 John 4:17

Hedin nehammad hu impeminhed tayun Apu Dios, man eleg itsulli umtakut ni kehuwetan tayun hakey ni aggew, tep humman ni tayu kapeminhed eyad puyek ey henin kapeminhed Jesus.