په پیلیپیان پولُسئے کاگد 3:3 - هُدائے پاکێن کتاب، بلۆچی زبانا

³ چێا که سُنّت بوتگێن ما اێن. اے ما اێن که هُدایا چه آییئے پاکێن روهئے برکتا پرستشَ کنێن. په ما پَهر و شانے که گۆن ایسّا مَسیها هئوار اێن و مارا چه وتی جِسما، بزان چه دنیایی چیزّان اُمێتے نێست،

په پیلیپیان پولُسئے کاگد 3:3 Referans Kwoze

پولُسئے کاگد په رومیان 7:6

بله نون ما چه شَریَتا آزات بوتگێن، چه هما چیزّا مُرتگێن که پێسرا مارا پابَندی کرتگ‌اَت، تانکه چه روهئے نۆکێن راها هُدائے هِزمتا بکنێن، چه شَریَتئے نِبشتهانی کوَهنێن راها نه.

په گَلاتیان پولُسئے کاگد 5:25

نون که ما پاکێن روهئے رِدا زندَ گوازێنێن، گڑا گۆن پاکێن روها همگام ببێن.

پولُسئے کاگد په رومیان 8:15

شمارا گُلامی روهے نرَستگ که پدا بتُرسێت، شما په چُکّی زورگ بوتگێت و هُدایی روه شمارا رَستگ. چه همے روها کوکّارَ کنێن ”اَبّا، او پِت!“

زَبور 105:3

آییئے پاکێن نامئے سرا پَهر بکنێت، هُداوندئے شۆهاز کنۆکانی دل شادمان بات.

پولُسئے کاگد په رومیان 1:9

هما هُدا که من په جان و دل، گۆن آییئے چُکّئے وشّێن مِستاگئے سر کنگا آییئے هِزمتا کنان، وت شاهد اِنت که وتی دْوایانی تها مُدام شمارا یاتَ کنان.

یَهودائے کاگد 1:20

بله او دُردانگان! شما وتا چه پاک و بےائیبێن ایمانا مُهر و مُهکم بکنێت و گۆن پاکێن روهئے مَدتا دْوا بلۆٹێت.

پولُسئے کاگد په رومیان 15:17

گڑا، په ایسّا مَسیهئیگی، په هُدایا وتی کرتگێن هِزمتانی سرا پَهرَ کنان.

پولُسئے کاگد په رومیان 8:39

نه بُرزی، نه جَهلی و نه سجّهێن هستیئے دگه چیزّے مارا چه هُدائے هما مِهرا جتا کرتَ کنت که چه مئے هُداوند ایسّا مَسیها مارا رسیت.

پولُسئے کاگد په رومیان 9:6

چُش نه‌اِنت که هُدائے هبرا پرۆش وارتگ. چێا که هر بنی اِسراییلیے، اِسراییلی نه‌اِنت.

په گَلاتیان پولُسئے کاگد 6:16

اێمنی و رَهم په همایان که اے رهبندئے سرا زندَ گوازێننت، بزان په هُدائے مهلوکا.

په پیلیپیان پولُسئے کاگد 1:1

چه ایسّا مَسیهئے هِزمتکار پولُس و تیموتاووسئے نێمگا، په ایسّا مَسیهئے هما سجّهێن پَلگارتگێن مردمان که پیلیپیا اَنت، گۆن کِلیسائے سرپرست و هِزمتکاران هئوار.

په پیلیپیان پولُسئے کاگد 3:12

منَ نگوَشان که من اے چیزّ دستا آورتگ و نون سَرجم و کامِلێن مردمے آن، بله جُهدَ کنان که منا هما چیزّ دَست بکپیت که په آییا ایسّا مَسیها منا دَست گِپتگ.

په پیلیپیان پولُسئے کاگد 3:14

من دێم په مِنزلا تَچان آن تانکه هما اِنام و دادا بِکَٹّان که په آییا هُدایا منا ایسّا مَسیهئے برکتا دێم په اَرشا تئوار کرتگ.