مَرکاس 14:61 - هُدائے پاکێن کتاب، بلۆچی زبانا

⁶¹ بله ایسّا بێتئوار اَت و هچّ پَسّئوے نداتی. مسترێن دینی پێشوایا پدا چه آییا جُست کرت و گوَشتی: ”تئو هما مَسیه، مَزَن‌شانێن هُدائے چُکّ ائے؟!“

مَرکاس 14:61 Referans Kwoze

مَرکاس 15:2

پیلاتوسا چه آییا جُست کرت: ”تئو یَهودیانی بادشاه ائے؟“ ایسّایا پَسّئو دات: ”تئو وت گوَشگا ائے.“

یوهَنّا 19:7

یَهودیان گوَشت: ”مارا شَریَتے هست‌اِنت که آییئے رِدا، اے مرد الّما کُشگ ببیت، چێا که گوَشتگی: ’من هُدائے چُکّ آن.‘“

پِتْرُسئے ائولی کاگد 2:23

بِلّ تُرے بےاِزّت کنگ بوت، بله اَنگت هم هچکَسی بےاِزّت نکرت. تنتنا وهدے سکّی سگّگا اَت، کَسّارا پادتراپی ندات. آییا هُدائے سرا تئوکل کرت که تچکێن اِنساپ و دادرَسیَ کنت.

یوهَنّا 10:36

گڑا شما هما مردمئے سرا چۆن کُپرئے بُهتاما جنێت که پتا آ گچێن کرتگ و اے جهانا رئوان داتگ؟ آ هم تهنا په اے هبرا که من گوَشتگ: ’هُدائے چُکّ آن.‘

یوهَنّا 1:34

من اے چیزّ دیستگ و گواهیَ دئیان که آ هُدائے چُکّ اِنت.“

مَتّا 16:16

شَمون پِتْرُسا پَسّئو دات: ”تئو مَسیه ائے، نمیرانێن هُدائے چُکّ.“

مَتّا 8:29

آیان کوکّار کرت و گوَشت: ”او هُدائے چُکّ! ترا گۆن ما چِه کار اِنت؟ چه گیشّێنتگێن وهدا پێسر، په مئے اَزاب دئیگا آتکگئے؟“

مَتّا 3:17

چه آسمانا تئوارے آتک: ”اے منی دۆستێن بَچّ اِنت و من چه اِشیا باز وشّ و رَزا آن.“

زَبور 119:12

ترا ستا بات، او هُداوند! وتی هُکمان منا سۆج دئے.

زَبور 39:9

بێتئوار آن و دپا پَچَ نکنان، چیا که اے تئو کرتگ.

زَبور 2:7

نون هُداوندئے هُکما درشانَ کنان که منا گوَشتی: ”تئو منی بچّ ائے، مرۆچی من ترا پێدا کرتگ.

په تیموتاووسا پولُسئے ائولی کاگد 6:15

هُداوندێن ایسّا مَسیهئے آیگئے وهدا هُدا وتَ گیشّێنیت، هما یکّێن مزن‌شانێن هاکم که بادشاهانی بادشاه و هُداوندانی هُداوند اِنت.

په تیموتاووسا پولُسئے ائولی کاگد 1:11

هما تالیم که آییئے سرچمّگ مزن‌شانێن هُدائے پُرشئوکتێن وشّێن مِستاگ اِنت که منی دستا دئیگ بوتگ.

کاسِدانی کار 8:32

آ مرد، اِشئیا نبیئے پاکێن کتابئے هما بهرا وانگا اَت که اے ڈئولا گوَشیت: ”پَسێئے ڈئولا که آییا په کۆشا برنت، آاِش په کُشگا برت، اَنچُش که گوَرانڈ، پَژم چِنۆکئے دێما بێتئوارَ بیت، همے ڈئولا چه آییئے دپا هم تئوارے در نئیاتک.

یوهَنّا 19:9

پیلاتوس پدا وتی کلاتا شت و اۆدا چه ایسّایا جُستی کرت: ”تئو چه کجا آتکگئے؟“ ایسّایا پَسّئو ندات.

یوهَنّا 18:37

پیلاتوسا گوَشت: ”اَچه، تئو بادشاهے ائے؟“ ایسّایا گوَشت: ”تئو وت منا بادشاهے گوَشگا ائے. من پێدا بوتگ و دنیایا آتکگان که په راستیا گواهی بدئیان. هرکَسا که راستی دۆستَ بیت، منی هبران گۆشَ داریت.“

یوهَنّا 10:24

یَهودی آییئے چپّ و چاگردا مُچّ بوتنت، گوَشتِش: ”تان کدێن مارا اے ڈئولا شکّئے تها دارئے؟ اگن تئو مَسیه ائے، راست و پکّا بگوَش.“

مَرکاس 14:60

مسترێن دینی پێشوا پاد آتک و سجّهێنانی دێما چه ایسّایا جُستی کرت: ”تئیی بارئوا چۆنێن شاهدی دئیگا اَنت؟ اِشانی هچّ پَسّئوَ ندئیئے؟“