Zekariah 10:4 - Hawaii Pidgin Bible

⁴ One guy az importan jalike one corna block stay importan fo one building goin come from da Judah ohana. One guy goin stay importan Jalike one tent peg stay importan fo one tent, An importan jalike one bow stay importan fo fight. Ery leada guy goin come from Judah!

Zekariah 10:4 Referans Kwoze

Zekariah 9:10

He goin take away da war wagons from da Efraim peopo, An da war horses from Jerusalem. He goin broke da bow dey use fo fight. He goin tell da peopos dey gotta come good wit each odda. He goin be da leada from one sea to da odda sea, An from da Eufrates riva to da end a da world.

Zekariah 9:8

But I goin guard my Temple Agains da army guys dat come by dea. I no goin eva let anodda army give my peopo hard time, Cuz I da one stay watch fo take kea dem.”

Census 24:17

“I see him, but az not fo now. Wat I see, no stay nea. One star goin come out from da Jacob peopo. One king goin come from da Israel peopo. He goin smash da Moab peopo head, An da skulls a da Shet peopo.

Jesus Show 17:14

Dey goin make war an fight God Bebe Sheep Guy. But he goin win ova dem, cuz he Da One In Charge Ova All Da Bosses an da King ova all da kings! All da peopo dat God Bebe Sheep Guy wen pick an tell dem fo come be his guys, dey do wat dey tell dey goin do, an dey goin stay tight wit him.”

2 Timoty 2:4

Anybody in da army, dey no do all da regula kine stuff da odda guys do dat not army guys. Da army guys, dey ony do wat dea army leada guy tell um fo do fo make him stay good inside.

Matthew 9:38

Dass why you guys gotta tell da boss guy dat own da crop fo sen da worka guys fo harves um.”

Jeremiah 1:18

Today, I make you come strong, Jalike one big town wit one strong wall, Jalike one iron pos, An jalike one bronze wall. You goin stan face all da peopo Inside da whole land! You goin go agains da Judah kings an military guys, Da pries guys an da peopo dat live dea.

Isaiah 54:16

“Tink bout dis! I da One wen make da guy Dat work wit da iron, An fan da coals fo make fire, An make tings peopo use fo fight. An I da One make da army guys Dat wipe out da peopo.

Isaiah 49:2

He make da stuff I tell, jalike one sharp sword. He hide me inside his hand wea nobody can see me. He make me jalike one shiny arrow dat he make sharp, An he hide me inside his arrow bag.

Isaiah 19:13

Da leada guys fo Zoan town, Dey go do stupid kine tings cuz dey no undastan. Da leadas fo Memphis, az da main Egypt town, somebody wen bulai dem. Da leadas fo da Egypt ohanas wen make dea peopo go da wrong way.

Songs 118:22

Da peopo tell: “Had one big rock. Da builda guys tell, ‘Dis rock, no good!’ But afta, dass da rock dey wen put Fo da main corna block.”

Ezra 9:8

“An jus now, you oua God, dass Da One In Charge a us, you wen help us plenny fo short time an do good tings fo us. You wen leave some a us guys fo stay alive, an let us come back to dis place dat stay good an spesho fo you. You even make us happy litto bit. No matta we ony slaves, you help us fo stay alive.

1 Samuel 14:38

Az why Saul tell, “All you main leada guys fo da army, come ova hea by me. Go find out wat bad ting we wen do today.

Start 49:24

But Joseph guys, dea bow neva lose fight An dea arm stay strong fo move quick. Az cuz me Jacob, I pray to da Strong God. Az why he make Joseph guys come strong too. God jalike da Sheep Guy dat take kea me, Jalike he da Big Rock dat stay help me, Israel.

Luke 20:17

Jesus look dem in da eye an tell, “Den wat dis mean inside da Bible dat tell, “ ‘Had one big stone, Da builda guys neva like use um, An dey tell dis rock, no good! But dat stone, Dass da corna block Dat make da building strong.’

Efesus 2:20

Dass jalike God wen build one house. Da guys he wen sen all ova fo tell da peopo da Good Stuff bout him, an da guys dat wen go talk fo him, dey jalike da foundation. An you guys, jalike he build you guys togedda on top um. An Jesus Christ, he jalike da corna block.

1 Peter 2:6

Cuz inside da Bible, God tell, “Eh, try look. I put down da corna block inside Zion, Dass da one I wen pick. Dat stone real importan fo me. Anybody dat goin trus him plenny, Dey no need worry notting.”

Jeremiah 51:20

“You Babylon guys, you jalike my war club fo fight, My war club fo make war. Wit you, I goin use you fo bus up da peopos, An fo wipe out kings an dea peopos.

Isaiah 28:16

Cuz dass how you guys tink, Da One In Charge a me tell dis: “Dis, wat I do! I da One goin put one stone on top da Zion hill Wea my Temple stay. One fo shua solid kine stone. Dat stone, jalike da corna block. Dass real importan Fo make da foundation stay solid. An da stone mean dis: ‘Anybody dat trus him, no need worry.’