Titus 2:11 - Hawaii Pidgin Bible

¹¹ How come us guys gotta make lidat? Az cuz God wen show erybody he get one good heart fo help dem. An dass why he can take erybody outa da bad kine stuff dey do.

Titus 2:11 Referans Kwoze

1 Timoty 2:4

He like take all da peopo outa da bad kine stuff dey stay do, an he like dem come fo know da true stuff.

Efesus 2:8

Cuz God like do plenny fo you guys, an dass how he stay, he stay hemo you guys from da bad kine stuff you do if you trus him. No mo notting you guys can do fo make dis happen. God make um lidis fo you guys jalike he give you one spesho present.

Isaiah 45:22

“All you peopo from da mos far places all ova da world, Turn aroun an come by me Fo me get you guys outa trouble, Cuz I God. No mo anodda god, ony me.

Hebrews 2:9

But get one Guy dat “fo short time, da angel guys was litto bit mo importan den him.” Dass Jesus! Cuz Jesus wen go suffa an mahke fo erybody, God “make him awesome, an show him plenny respeck, jalike God go put one crown on top his head.” Dass how God do plenny fo us guys, cuz Jesus wen suffa an mahke fo us no need get punish.

Efesus 2:5

Us guys was cut off from God an mahke inside awready. Az cuz we stay broke da Rules God wen make. But wen God make his Spesho Guy Christ come back alive, same time he make us guys come back alive too. He like do plenny good kine stuff fo all you guys. Dass why he hemo you from da bad kine stuff you guys stay do.

2 Tessalonika 2:16

Da One In Charge a us guys, Jesus Christ, an God oua Faddah too, dey get love an aloha fo all us guys. God get one good heart, an he no stop give us guys good kine words an help us wait till da good tings happen.

Rome 5:15

Da bad kine stuff dat Adam wen do, dass way diffren den da good kine stuff Jesus wen do fo us guys. Had da one guy Adam dat wen do wat God tell um not fo do, an cuz a dat, erybody mahke. But den da odda guy, Jesus Christ, he do plenny good kine stuffs fo us, an he neva expeck notting back from nobody. Dass mo den enuff fo erybody cuz God erytime like do plenny fo us.

John 1:14

Dat “God, He Talk” Guy, he come one guy dat get one body jalike us guys get. He stay wit us short time, an us see how awesome he stay. He awesome, cuz he da One an ony Boy dat come from da Faddah. He like do plenny good stuff fo us cuz dass how he stay. Eryting he tell bout God stay fo real.

Isaiah 52:10

Da One In Charge goin show how strong him Cuz he good an spesho! An all da peopo inside all da countries, Even da ones inside da mos far places on top da earth, Dey goin see How oua God get his peopo outa trouble!

Songs 84:11

Cuz oua God, Da One In Charge, He show us guys wea fo go Jalike wen da sun shine. An he proteck us guys Jalike one shield. He like do plenny fo us guys, An he make us come mo awesome. Da One In Charge, He no goin hold back notting good From da peopo dat stay do wass right.

Jesus Guys 11:23

Wen he come, he see dat God wen do plenny good tings fo dem. He stay good inside, an give dem good kine words fo stay tight wit Jesus, Da One In Charge, an trus him bout eryting.

Jesus Guys 20:24

But den, fo me, fo stay alive, dass notting. I ony like do eryting Da One In Charge, Jesus, tell me fo do to da end. He tell me fo tell erybody da Good Stuff bout how plenny good tings God do fo us.

Luke 3:6

An all da peopo inside da whole world Goin see dat God goin take us Outa da bad kine stuff we stay in.”

1 Timoty 1:14

Da One In Charge a us guys, he wen do choke plenny good tings fo me. Now I stay tight wit Jesus Christ. Az why I can trus him, an I can show love an aloha jalike him.

Rome 5:2

Christ make us guys come tight wit God cuz we trus Christ. God like us know he like do plenny fo us guys cuz dass how he stay. An dass how us guys come solid inside. Us guys feel good inside cuz we stay shua dat bumbye God goin make us come awesome jalike him.

Zekariah 12:10

“Me, Da One In Charge, goin make da David ohana an da Jerusalem peopo like do good kine stuff fo odda peopo, an dey goin pray to God fo help dem too. Dey goin look me, da guy dey wen stab. Dey goin stay real sore inside, jalike somebody stay sore cuz dea firs boy dat born wen mahke.

Songs 96:10

Tell all da diffren nations, “Da One In Charge, he da King! Fo shua, da world stay solid, No can throw um off. Wen Da One In Charge judge all da diffren peopos, He judge um da right way!”

Colosse 1:6

Dass da Good Kine Stuff From God dat you guys wen hear awready. All ova da world get mo an mo plenny peopo dat stay trus dis Good Stuff. Dat make dem do good tings fo each odda, jalike da firs time wen you guys wen hear um an undastan um, same ting. Dass wen you wen find out da trut fo shua bout how God like do plenny fo you guys.

Galatia 2:21

I no goin tell all da good tings God wen do fo us guys good fo notting. If us ony get um right wit God cuz we do wat da Rules tell us guys fo do, den poho Christ wen mahke fo us.

2 Corint 6:1

Cuz us guys stay work togedda wit God, we like give you guys good kine words: No let all da good kine stuff God wen do fo you guys stay fo notting.

Jesus Guys 13:47

Cuz dis wat Da One In Charge tell us fo do, “ ‘I make you guys jalike one light Fo da diffren peopos dass not Jew guys, Fo you tell all da peopo all ova da world Dat I can get dem outa da bad kine stuff dey stay do.’ ”

Jesus Guys 13:43

Wen da peopo go way from da Jew church, plenny Jew guys an guys dat come jalike Jews go wit Paul an Barnabas. Dey talk to dose guys, an tell um fo stay tight wit da God dat do choke plenny good tings fo dem.

John 1:9

Dat time wen John stay teach, jalike da light dass fo real stay come inside da world. Dass da light dat show erybody wass true.

Luke 24:47

Afta dat, his guys goin teach all da diffren peopos inside da whole world bout da Christ Guy, da Spesho Guy God Wen Sen. Dey goin tell da peopos dey gotta come sorry fo all da bad kine stuff dey stay do, an no do um no moa. So den, God goin let go da peopos an hemo dea shame fo all da bad kine stuff dey wen do. His guys goin go teach lidat cuz dey his guys an dey get his powa, an dey goin start Jerusalem side.’

Mark 16:15

Den he tell um, “Go all ova da world, an teach da Good Stuff Bout Me to erybody in da world.

Matthew 28:19

So you guys, go all ova da world an teach all da diffren peopos fo dem learn bout me an come my guys. Baptize dem, an dey goin get da right fo come tight wit my Faddah, an wit me his Boy, an wit da Good An Spesho Spirit.

Zekariah 4:7

Yoa problems jalike dis big strong mountain. But da mountain goin come flat land in front Zerubbabel. Den he goin put da las stone block fo da temple wea suppose to stay, an da peopo goin yell, ‘Az beautiful! Az beautiful!’ ”

Isaiah 49:6

So now, dis wat Da One In Charge tell: “But dass ony one small kine job, Fo you bring back by me Da ohanas dat come from Jacob, An da ones from da Israel ohanas Dat I wen take kea. Mo den dat, I goin make you Jalike one light fo da peopo dass not Jew guys Fo you come da one Dat goin get peopo all ova da world outa trouble fo me, Even da peopo from da mos far places inside da world.”

Hebrews 12:15

Watch out fo each odda, how you live. No good if somebody tell “Laytas” to all da good kine stuff dat God like do fo us. Dass jalike wen get one bad kine plant dat shoot up an make all da odda plants come poho. Dat kine guy goin make plenny odda peopo come pilau inside.

2 Timoty 4:17

Still yet, Da One In Charge, he wen back me up an make me strong! He like me fo tell da peopo eryting bout him, dass why. All da diffren peopos wen hear wat I tell um. An Da One In Charge wen take me out from dat place, jalike from inside da lion mout.

Colosse 1:23

But fo shua, you guys gotta hang in dea an trus God fo real kine. Den nobody can make you guys trus odda stuffs, an make you guys no trus da Good Stuff From God dat you guys wen hear bout, da stuff you guys stay waiting fo come. Get guys dat stay tell erybody all ova da world da Good Stuff From God. Eh, dass me Paul too, an I help tell dat Good Stuff From God.

Rome 10:18

Wat you tink? You guys tink da Israel peopo neva hear notting, o wat? Fo shua dey wen hear someting! Jalike da Bible tell befo time: “All ova da world, get peopo dat wen hear da Good Kine Stuff. Da tings dey tell, go all ova da world fo peopo hear.”

Songs 67:2

Wen you do dat, Peopo all ova da world Goin find out da way you do tings, An all da nations goin know Dat you get um outa trouble.

Jesus Guys 17:30

Befo time, God give chance wen peopo neva know wat dey suppose to do. But now he tell dis to da peopo all ova da world: Dey gotta come sorry fo all da bad kine stuff dey do, an no do um no moa.

2 Timoty 1:10

But now God stay show us guys his plan, An how he like do good tings fo us guys. We wen find out all dat Cuz Jesus Christ show up hea an us guys wen see him. He da One dat take us outa da bad kine stuff us guys do. Cuz a Christ, us guys no goin mahke no moa! Christ wen tell us da Good Stuff Dat tell he goin make oua body come diffren kine Dat no goin mahke o come rotten, But goin stay alive fo real kine foeva!