She tell da luna guy, “Eh, dat guy ova dea inside da open country, da one dat stay walk dis way, who him?” Da luna tell, “Him, my boss.” Den Rebecca take one piece cloth an hide her face fo show respeck fo da guy dat goin come her husban.
Den Isaac marry Rebecca. He bring Rebecca fo live inside da same tent wea his muddah Sarah live befo she mahke. Isaac get plenny love an aloha fo Rebecca. Az why, no matta his muddah wen mahke, he no stay sad no mo cuz he get Rebecca.
