Songs 72:3 - Hawaii Pidgin Bible

³ I like da peopo stay do wass right, Cuz den, da up country land Goin give enuff food Fo make eryting okay fo dem, An da hill land Goin give um plenny too.

Songs 72:3 Referans Kwoze

Isaiah 52:7

Real nice! Wen we see da messenja guy feet Stay coming ova da mountains Fo tell us good kine stuff! He make shua erybody hear, “Eryting goin come good now! Good tings goin happen! Da One In Charge goin get us outa trouble.” He tell God peopo, Jerusalem town, “Yoa God, he da king now!”

Joel 3:18

“Dat time, goin be jalike da mountains stay drip wit new wine. An jalike milk goin run down da hills jalike rivas. All da gulches inside Judah goin get plenny watta. One watta spring goin come outa da Temple Fo Da One In Charge, An goin give watta inside da gulch wea get koa trees.

Daniel 9:24

“Seventy times seven year, az da time God wen make fo yoa peopo an fo yoa town dat stay spesho fo God: fo make da peopo dat go agains God stop, fo make da ones stay do bad kine stuff stop, fo make sacrifice, fo make da peopo dat do wass wrong come pono wit God, fo make dem do da right kine stuff all da time, fo put seal fo show dat wat da guy dat talk fo God dream stay fo real, an fo make da Real Real Spesho Place inside da Temple come spesho fo God one mo time.

Songs 72:16

I like fo da land grow Plenny food fo harves, Dat grow food all da way To da mountain tops! I like da land get plenny fruits, Jalike Lebanon! I like fo eryting go good Fo da peopo inside da towns. I like fo da peopo come Jalike wen da grass get flowas All ova da country side!

Songs 65:12

Da nice places inside da boonies Get plenny watta. Da hills, dey look Jalike dey feel good inside.

Isaiah 45:8

“I like eryting come right, All ova da place, Jalike da rain come down from da sky All ova da place. I like get peopo outa trouble An same time, do plenny right kine tings, Jalike da clouds sen down da rain, An da earth suck um up, Fo plenny plants grow all ova da place. Me, Da One In Charge, An I make all dis happen!

Isaiah 60:17

I goin bring you guys gold an not bronze. I goin bring you guys silva an not iron. I goin bring you guys bronze an not wood. I goin bring you guys iron an not stones. Eryting goin come good fo you guys, An dass da kine govmen I goin give you. Peopo goin do wass right erytime, An dass wat goin make you guys like do yoa work.