Smart Guys 9:8 - Hawaii Pidgin Bible

⁸ No try tell one big head guy Dat ony talk bad bout erybody, Dat he not suppose to do someting. Cuz if you tell um dat, Da guy goin hate you. But if you go tell one guy dat erytime know wat fo do Dat he not suppose to do someting, Dat guy goin get love an aloha fo you.

Smart Guys 9:8 Referans Kwoze

Songs 141:5

If da peopo dat stay do wass right Slap my head, Dat show dey my frenz Dat stay tight wit me! If dey tell wat I do stay wrong, Dass good, jalike dey put Da bestes kine haku lei On top my head! All da time I stay pray Dat da bad guys no can do notting.

Smart Guys 13:18

Da kine peopo dat no lissen Even wen dey tell um fo learn wass right, Dey goin come shame, Cuz dey no mo notting. But da kine peopo dat lissen good Wen you tell dem dat dey wen jam up, Bumbye, dey goin get plenny respeck.

Smart Guys 23:9

No say notting To da kine guy dat tink he too smart But yet he not too smart, Cuz you know wat fo do erytime. But you talk to him lidat, He goin ack jalike wat you tell no mean notting.

Smart Guys 15:12

Da peopo dat no mo respeck fo nobody Cuz dey tink dey know eryting, Dey no like wen peopo tell dem dey wrong. Dey no goin go By da peopo dat know wat fo do erytime, Fo aks dem fo help.

Matthew 7:6

“No give stuff dat stay spesho fo God to da guys dat goin talk bad bout um an goin wase um. Cuz dey jalike da dogs dat goin turn aroun fo attack you guys. An dey jalike da wild pigs—if you give um fancy kine jewelry dat worth plenny, dey ony goin walk all ova on top um. Den dey goin turn aroun an wase you guys.

Smart Guys 29:1

Da kine guy dat make deaf ear Cuz peopo tell um ova an ova He do wrong an he betta stop, Fo real Da One In Charge goin bring down dat guy one time. Cuz no way da guy can come good bumbye.

Smart Guys 28:23

Whoeva do wass wrong, An you tell um wat he do stay wrong, Bumbye he goin show you plenny respeck. But if you talk jalike no mo notting wrong, An eryting stay okay, Den da odda guy no goin get respeck fo you.

Prieses 19:17

“No hate yoa braddah. Wen anodda guy do someting wrong, tell um az wrong fo real kine, fo you no get da blame wit him.

Matthew 15:14

Laytas wit dem awready! Dey jalike one blind guy stay go aroun, an show anodda blind guy wea fo go. Bumbye da two blind guys goin fall down inside one puka.”

1 Kings 1:23

Da palace guys tell da King, “Look! Nathan, da guy dat talk fo God, stay hea.” Nathan come in front da King, an go down an put his face on top da groun fo show um respeck.

1 Kings 22:8

King Ahab tell, “Still get one guy I can aks um wat Da One In Charge tink. But I hate da buggah! Weneva he talk fo Da One In Charge, he no tell me notting good! He erytime tell bad tings goin happen to me! His name, Mikaiah, Imlah boy.” King Jehoshafat tell, “Eh, brah, no good you talk lidat!”

1 Kings 1:32

King David tell his guys, “Go tell Zadok da pries guy, an Nathan da guy dat talk fo God, an Colonel Benaiah Jehoiada boy, fo come hea.” Wen dey come in front da King,

Smart Guys 10:8

Da peopo dat know how fo tink, Dey goin lissen an do wat dey suppose to do. Da peopo dat do bad kine stuff an no bodda dem, Dey all mout, an dey goin fall down an crack dea head.

Smart Guys 13:1

You get somebody dat know wat fo do erytime, Dat mean dea faddah make dem learn. But da buggahs dat no mo respeck fo nobody Cuz dey tink dey so smart, Dass why dey no lissen, neva mind you scold dem.

Smart Guys 19:25

Punish da buggahs dat no mo respeck fo nobody Cuz dey tink dey smart. An den, da odda guys dat donno notting an easy fo bulai dem, Dey goin come mo akamai An learn how fo tink strait. An if you tell da kine guy dat undastan stuff, Dat he wen do someting wrong, Dat guy goin learn someting.

Isaiah 36:21

But da three guys stay no tell da Assyria guy notting cuz King Hezekiah wen tell dem befo time, “Ony lissen an no talk back to him.”

Smart Guys 1:5

Da smart peopo dat know awready wat fo do, Dey goin lissen up mo an moa, An erytime dey goin undastan even mo betta. Da peopo dat lissen good, Dey goin find out wat dey gotta do.

Smart Guys 23:23

Go learn wass true, jalike you buying um. But no throw way wass true, jalike you selling um. Learn how fo know wat fo do erytime, An how fo live da way you suppose to live, An how fo undastan stuff.