Smart Guys 23:11 - Hawaii Pidgin Bible

¹¹ Cuz God, he da One get da kuleana Fo take kea dem, An he real strong. He goin talk to da judge fo dem, An agains you.

Smart Guys 23:11 Referans Kwoze

Smart Guys 22:23

Cuz Da One In Charge, him goin be da One Dat goin help dose guys in front da judge. An fo da ones dat take away stuff from dem, He goin take away dea life!

Job 19:25

Fo me, I know da one dat goin help me fo shua stay alive, He da One goin show proof I neva do notting wrong! An he goin stan up fo me wen time fo da las word!

Jeremiah 51:36

Az why Da One In Charge tell dis: “You know wat?! I goin fight fo you guys. I goin pay back da Babylon guys Fo wat dey do to you guys. I goin dry up da place dea watta come from An make dea pukas fo watta come dry.

Songs 12:5

But Da One In Charge, dis wat he tell: “Get peopo dat like wipe out Da peopo dat no mo notting An need plenny stuff. An get peopo dat need somebody Fo take kea dem, an dey moaning. Cuz a dat, I goin do someting! I goin do wateva I gotta do Fo get dem outa trouble, Cuz fo shua, dass wat dey like me fo do!”

Rules Secon Time 27:19

“Da Levi guys goin tell dem: ‘God goin punish whoeva no make right in front da judge to one guy from some odda place, one kid dat no mo faddah o muddah, o one wahine dat no mo husban.’ “All da peopo goin tell: ‘Az right!’

Smart Guys 23:12

Wen somebody like teach you Da right way fo live, Lissen plenny bout wat dey tell! Wen somebody talk Bout stuff you need fo know, Lissen wat dey tell!

Songs 68:6

God da one dat give one ohana To da peopo dat no mo ohana. Wen he let da prisona guys Go outa prison, He make shua dey come out solid. Ony da peopo dat go agains God Goin live Inside one hot an dry land Wea no mo notting.