Smart Guys 22:4 - Hawaii Pidgin Bible

⁴ Wen you make um so you come jalike you notting, An you feel jalike you sked Wen you come in front Da One In Charge, Den you goin get plenny stuffs, An peopo goin show you respeck, An you goin live long time.

Smart Guys 22:4 Referans Kwoze

Matthew 6:33

Main ting, make God Da One In Charge a you, cuz he da King. Do da right ting jalike he do, an you guys goin get all da stuffs you need.

James 4:10

No make jalike you mo betta den da odda guys da way Da One In Charge see you. Den, he goin make you come somebody fo real kine.

Smart Guys 21:21

Whoeva go all out fo come Da kine guy dat do wass right erytime, An dat stay tight wit his ohana, Long time he goin live, An peopo goin do good tings fo him, An show um choke respeck.

Isaiah 57:15

Da One In Charge, da One stay far away up dea Inside da sky, an real importan. He stay alive foeva. He stay good an spesho cuz dass wat kine god him. He tell: “I live inside da mos high place, Da place dat stay spesho fo me! But still yet, I stay live wit da one Dat feel all heavy inside, An know dat dey notting. Az cuz I like make da peopo dat know dey notting, An da ones dat feel heavy inside, Come strong inside.

Smart Guys 3:16

Wen you know wat fo do erytime, You goin live long time, An get plenny stuffs an plenny respeck too.

James 4:6

But God like do even mo plenny good tings still yet. Az why da Bible tell, “God stay agains da guy Dat get big head. But da guy dat make shua he da las one, An put da odda guy befo him, God goin do plenny fo dat guy.”

Isaiah 33:6

All da time you stay alive, Da One In Charge goin be jalike one solid foundation fo you. He goin do plenny good tings fo you— Get you outa trouble, Help you know wat fo do erytime, Help you know how fo do stuff. Wen you Jerusalem peopo get respeck Fo Da One In Charge fo real kine, Goin be jalike az rich kine stuff he give you.

1 Timoty 4:8

Wen one guy work out fo make his body come strong, dass good fo some tings. But gotta do da tings dat God like. Dass good fo eryting, fo da life ova hea inside dis world, an fo da real kine life we goin get bumbye.

Smart Guys 21:20

Da peopo dat know wat fo do erytime, Dey get nice place fo put all nice kine stuffs Dat dey like, an plenny fancy kine food too. Da kine peopo dat tink dey get plenny wen dey no mo notting, Fas, dey eat up wateva dey get.

Smart Guys 22:3

Da akamai kine peopo see Someting bad goin happen, An dey go hide. But da peopo dat donno notting An easy fo bulai dem, Dey keep going, An bumbye, dey pay da price.

Smart Guys 22:5

Ery place da crooked kine guy go, Jalike get thorn bush an trap all ova da place Fo stop him. But da kine guy dat take good kea his life, He no goin go dat way.

Smart Guys 29:23

Anybody dat ack high makamaka, Dey goin come notting cuz a dat. Anybody dat no ack high makamaka, Dey goin get plenny respeck.

Smart Guys 31:30

Get wahines dat talk nice to you, But az all bulai. Get wahines, dey good looking, But fo ony short time. Da kine wahine dat stay sked fo no do wat Da One In Charge tell, Az good, erybody tell good tings bout her.

Daniel 4:36

“Dat same time dat I wen start fo tink good one mo time. Da peopo show me plenny respeck now cuz I da king. Dey show me dat I stay importan fo dem an I come awesome one mo time. Da smart guys dat wen teach me wat fo do, an my alii guys wen go all out fo come by me. An I wen come king one mo time. I get even mo plenny powa den befo time.

Smart Guys 19:23

If you feel jalike you sked wen you in front Da One In Charge, Den you goin get one good kine life! You goin feel jalike eryting goin be okay, An no way you goin get trouble.