Smart Guys 12:8 - Hawaii Pidgin Bible

⁸ Wen erybody know dat somebody can tink strait an akamai, Da peopo goin talk good kine bout um. But wen peopo head all hamajang, Da peopo no mo respeck fo dem.

Smart Guys 12:8 Referans Kwoze

2 Corint 10:18

You talk big bout ony you, dat no goin make Da One In Charge tell, “Dis guy get um.” So den, who get um? Da guy Da One In Charge talk good bout, he da one get um!

1 Corint 4:5

So, no make jalike you guys da judge fo odda peopo. Wait till Da One In Charge come back. He da One goin bring out in da light all da bad kine stuff da peopo try hide in da dark. He goin show all da tings dat dey tink inside dem. Den God goin talk good bout da good tings erybody do.

Jesus Guys 12:23

But King Herod neva tell notting. So right den an dea, cuz Herod no talk good bout God an tell um “Mahalo plenny!” one angel guy from Da One In Charge wack him, an he get worms dat eat up his inside an he mahke.

Luke 16:8

No matta da luna no do wass right befo time, da boss talk good to him now bout dis smart ting he wen do. You know, da peopo dat stick wit dis world mo smart wit money kine stuff den da peopo dat stick wit da light.

Daniel 12:2

Plenny peopo dat stay mahke, jalike dey stay sleep unda da groun, dey goin come alive one mo time, jalike dey wake up. Some a dem goin come alive fo get da kine life dat stay foeva. Odda peopo goin come alive fo come shame foeva, an odda peopo goin feel pilau wen dey even tink bout dem.

Smart Guys 5:23

Dey goin mahke, Cuz inside, dey no like learn Wass importan fo do, An cuz dey ony like do Wat dey like do, An no bodda dem.

Smart Guys 3:35

Da peopo dat know wat fo do erytime, Dey goin get plenny respeck. But az diffren, fo da stupid guys wit attitude. Shame, dass all dey goin get.

Smart Guys 1:26

Az why, wen you guys get all bus up, Me, I goin laaaugh, laugh, laugh! Wen bad tings happen, Da kine dat make you real sked so you no can handle, I goin make fun a you guys!

Songs 132:18

I goin make shua, wen you tink bout Da peopo dat stay agains my king, You ony goin rememba Dat I put plenny shame on dem. But da crown on top da king head Goin shine so you no foget How awesome him!”

Start 41:39

Den da Pharaoh guy tell Joseph, “Eh! Cuz God wen let you know all dis stuff, fo shua, no mo nobody mo betta den you fo figga out tings an fo know wat fo do!

1 Samuel 25:17

Now, tink bout all dis, an figga out wat fo do, cuz David guys stay ready fo do someting real bad to oua boss an all his ohana peopo, an all us worka guys too. You know Nabal, aah? He da kine guy dass ony bad, so no mo nobody can talk to him.”

1 Samuel 18:30

Weneva da main leada guys fo da Filisha army take dea guys out fo make war, da same ting happen—David an his guys win ova dem, mo plenny den da odda leada guys fo Saul army. Dass how erybody know dat David one awesome kine guy.

1 Samuel 16:18

One a da worka guys tell, “You know wat?! I wen see one a Jesse boys from Betlehem dat fo real kine know how fo play da harp. He no sked fo fight, an know how fo fight. He erytime tink befo he talk. An he good looking. Da One In Charge stay tight wit him.”

1 Samuel 13:13

Samuel tell Saul, “Bummahs! You wen ack stupid! You neva lissen an do wat yoa God, Da One In Charge, wen tell you fo do! If you wen do wat Da One In Charge tell, den he make you come da ancesta awready fo da kings ova da Israel peopo, foeva. But, you neva do um!

Teacha 8:1

So, wat you tink?! Get guys dat know fo real kine wat fo do erytime?! You figga get guys dat know wat tings mean, o wat?! One guy dat know wat fo do erytime, his face goin show dat, Cuz no goin look jalike he huhu.

Smart Guys 12:7

Wen God make da bad kine peopo fall down, Den no mo dem. But da good kine peopo ohana Dey still stay.

Smart Guys 12:9

Da kine guy dat peopo tink not importan But still yet he get one guy dat work fo him, Is mo betta den da kine guy Dat make erybody tink he da main man, But he no mo notting fo eat.

Smart Guys 29:27

Da peopo dat stay do wass right, Dey tink az pilau, wen peopo do wass wrong. Da bad kine peopo, Dey tink az pilau, wen peopo live da right way!

Isaiah 19:14

Da One In Charge, him da one wen make da Egypt peopo So dey no can tink strait. Cuz a Da One In Charge, da leada guys make dea peopo Go da wrong way bout eryting dey stay do. Da Egypt peopo, dey jalike one piloot guy Dat stay fall all ova, even in his puke.

1 Samuel 2:30

“ ‘Me, Da One In Charge, da God fo da Israel peopo. Az why I tell you dis: I wen make one promise dat yoa ohana, an yoa ancesta Aaron ohana, goin live in front me foeva. But cuz me Da One In Charge, I tell you dis too: No way goin be how stay now! Cuz da peopo dat show respeck fo me, I goin show respeck fo dem. But da peopo dat make to me jalike I notting, I goin put kahuna on top dem!