Rules Secon Time 30:3 - Hawaii Pidgin Bible

³ den wen you guys come back, yoa God, Da One In Charge, goin make tings come good one mo time fo you guys, an get love an pity fo you guys. He goin bring you guys back togedda from all da diffren countries he wen sen you guys to.

Rules Secon Time 30:3 Referans Kwoze

Jeremiah 29:14

I goin let you guys find me!” Az wat Da One In Charge tell. “I goin make eryting come good fo you guys one mo time. I goin give you guys back yoa property. I goin bring you guys togedda from all da nations an da places wea I wen make you guys go wen I kick you outa hea. I goin bring you guys back dis place wea you guys wen stay, befo I make you guys come prisonas an go way.”

Ezekiel 36:24

I goin take you guys outa da odda nations an bring you guys togedda from all da odda lands. I goin bring you guys back inside yoa land.

Sad Song 3:32

No matta he make us suffa, He goin show aloha an pity too, Cuz he stay real tight wit his peopo!

Songs 147:2

Da one dat stay build Jerusalem town One mo time, az Da One In Charge! He bring back togedda da peopo Dat was prisonas Babylon side.

Rome 11:31

Cuz a dat, God give you guys chance. An goin be same ting fo da Jew guys. God goin give dem chance too.

Sad Song 3:22

Da One In Charge, he stay tight wit us guys foeva! Da tings he do fo show pity fo us guys, goin be lidat foeva!

Rome 11:23

Same ting wit da Jew guys, if dey change an start fo trus God, God goin graf dem in on top da main olive tree one mo time. God can graf um back in jalike befo time.

Jeremiah 31:10

“Lissen wat me, Da One In Charge, tell, you peopos! Make shua erybody inside da far away islans know dis! Tell um: ‘Da One dat wen scatta da Israel peopo, He da One goin bring dem back togedda. He goin take kea dem Jalike one sheep guy take kea his sheeps.’

Isaiah 56:8

Dass wat Da One In Charge, da Boss, tell! He goin bring togedda Da Israel peopo dat stay scatta all ova da place, Cuz odda peopo wen throw um outa dea land. He tell, “I still yet goin bring mo odda peopo Fo come togedda wit dem.”

Rome 11:26

Dass how God goin take all da Israel peopo outa da bad kine stuff dey stay in, jalike God tell inside da Bible befo time: “Goin get one guy dat goin take us outa da bad kine stuff, He goin come from Jerusalem, Zion side. He goin make da peopo dat come from Jacob tink diffren kine, Dem guys, dey ack jalike God no matta, Bumbye, dey no goin tink lidat no moa.

Start 28:15

So you know wat? I stay wit you. I goin take kea you, ery place you goin go. Bumbye I goin bring you back hea, dis land. I no goin leave you behind. I make dis promise: I goin do eryting dat I tell you I goin do.”

Start 48:21

Den Israel tell Joseph, “I goin mahke pretty quick now. But God goin stay wit you guys. He goin bring you guys back to da land wea yoa ancesta guys wen live.

Rules Secon Time 4:27

Den Da One In Charge goin make you guys go all ova inside odda peopos land, an ony litto bit a you guys goin stay alive ova dea wit da odda peopos, wea Da One In Charge goin make you guys go.

Rules Secon Time 13:17

You guys betta not carry away notting from dat town dat you was suppose to wipe out fo God. So den, God, Da One In Charge, no goin stay huhu no moa. He goin show pity fo you guys, an give you chance, an he goin make you guys come mo plenny peopo, jalike he wen make one strong promise to yoa ancestas fo do.

Nehemiah 1:9

But if you guys come back an change how you ack, be my guys, an stay do all da tings I tell you gotta do, den I goin bring you guys back. I goin bring you guys togedda ova dea, da place I wen pick fo show wat kine god me fo you guys show respeck fo me. No matta you guys stay far place all ova da world, I goin bring you guys back!’

Job 42:10

Afta Job pray fo his frenz, Da One In Charge make eryting come good fo him one mo time. Da One In Charge even give him double wat he get befo time.

Songs 107:3

God wen bring his peopo back togedda From all da diffren countries Wea dey stay, From wea da sun come up To wea da sun go down, From da north side An from da south side.

Isaiah 27:12

Dat time, Da One In Charge goin pick his peopo Jalike wen peopo wack da wheat o barley dey wen harves Fo get da good wheat one side an da junks da odda side. He goin take you Israel peopo, one by one, An bring you togedda, Jerusalem side, Even from da big Eufrates Riva An from da stream dass da borda fo da Egypt land.

Jeremiah 12:14

Dis wat Da One In Charge tell: “All da real bad kine peopos dat live nea me, dey like grab da land I wen give to my Israel peopo fo come dea property. I goin throw out dose bad peopos from dea land. But I goin throw out da Judah ohana from dea land too!

1 Records 16:35

Call out, “God, get us outa trouble! You da One can do dat! Bring us togedda, An get us outa trouble from da odda peopos! Den us goin feel awesome wen we tell erybody we know who you, An tell dat you stay good an spesho! Fo us tell erybody Dat you da greates!”

Isaiah 43:5

No sked cuz I stay wit you guys. I goin bring da ones dat goin come from you, from da east side, An bring all you guys togedda from da west side.

Isaiah 54:7

Da One In Charge tell: “Eh my peopo, Ony short time I wen leave you guys. But I get plenny love an pity fo you guys, An I goin bring you guys back togedda wit me.

Jeremiah 23:3

“Me, I goin bring togedda da ones from my peopo dat still stay alive. I goin bring um all back dea place, from all da lands wea I wen make dem go. Dey jalike my sheeps, an dey goin get plenny bebes.

Ezekiel 11:17

“Az why you gotta tell: ‘Dis wat Da One In Charge, da Boss, tell: I goin bring you guys back togedda from dose nations. I goin bring you guys back from da lands wea you guys stay scatta all ova da place. I goin give you guys back da Israel land one mo time.’

Ezekiel 39:28

Den dey goin know dass me dea God, Da One In Charge, do all dis. Cuz no matta I wen make dem come prisonas an sen dem far away inside da odda lands, I goin bring dem back inside dea land. I no goin even leave nobody far away.

Micah 7:19

You goin take us back one mo time, Cuz you get love an pity fo us. You goin hemo all da bad kine stuff we wen do, Jalike you goin throw all da bad kine stuff us guys wen do Down inside da mos deep ocean.

Zekariah 10:9

No matta I wen scatta dem wea da odda peopos stay, Still yet dey no goin foget me from da lands far away. Dem an dea kids goin stay alive, An dey goin come back.